نشيد 3 - الكتاب المقدس بالعربي الدارجي هنا تشاد

¹ وَ بِاللَّيْل، فِي سَرِيرِي، أَنَا فَتَّشْت الْقَلْبِي بِرِيدَهْ، أَنَا فَتَّشْتَهْ وَ مَا لِقِيتَهْ.

² أَنَا قَمَّيْت وَ حَوَّقْت الْمَدِينَةْ فِي الشَّوَارِعْ وَ فِي أَيِّ بَكَانْ. أَنَا فَتَّشْت الْقَلْبِي بِرِيدَهْ، أَنَا فَتَّشْتَهْ وَ مَا لِقِيتَهْ.

³ وَ الْحُرَّاسْ الْبُرُوغُوا الْحِلَّةْ بِاللَّيْل لِقَوْنِي وَ أَنَا قُلْت: «مَا شِفْتُوا الْقَلْبِي بِرِيدَهْ؟»

⁴ وَ مِنْ فُتّْ مِنْهُمْ، أَنَا لِقِيتْ الْقَلْبِي بِرِيدَهْ. حَضَنْتَهْ وَ مَا خَلَّيْتَهْ لَحَدِّي وَدَّيْتَهْ فِي حَوْش أَمِّي وَ دَخَّلْتَهْ فِي بَيْت هَنَا الْوِلْدَتْنِي لَحَدِّي فِي الْغُرْفَةْ.

⁵ يَا بَنَاتْ مَدِينَةْ الْقُدُسْ، نَحَلِّفْكَنْ بِجَمَالْ الْغُزْلَانْ وَ أَرَايِلْ الْكَدَادَةْ كَدَرْ مَا تِقَوِّمَنْ وَ لَا تِوَعَّنْ الْحُبّ قَبُلْ وَكْتَهْ.

كلام المحْبوبة

⁶ يَاتُو الْجَايِ مِنْ الصَّحَرَاءْ وَ عَجَاجَهْ مِثِلْ دُخَّانْ الطَّالِعْ؟ يَاتُو الْمُعَطَّرْ بِصَنْدَلْ وَ لُبَانْ وَ بِكُلَّ دُخَّانْ التُّجَّارْ؟

⁷ أَيْوَى، دَا سُلَيْمَانْ الرَّاكِبْ فِي بَاصُورْ عُطْفِتَهْ. مُحَوِّقِينَهْ 60 رُجَالْ فُرَّاسْ مِنْ أَحْسَنْ فُرَّاسْ بَنِي إِسْرَائِيلْ.

⁸ كُلُّهُمْ شَايْلِينْ سُيُوفْ وَ هُمَّنْ نَاسْ مُحَارِبِينْ. أَيِّ وَاحِدْ سَيْفَهْ فِي صُلْبَهْ جَاهِزْ لِأَيِّ خَطَرْ الْيَجِي بِاللَّيْل.

⁹ الْمَلِكْ سُلَيْمَانْ عِنْدَهْ عُطْفَةْ السَّوَّوْهَا بِحَطَبْ لُبْنَانْ.

¹⁰ وَ عَمَدْهَا مُجَمَّلِينْ بِفُضَّةْ وَ بَاصُورْهَا بِدَهَبْ. وَ فُرَاشْهَا لَوْنَهْ قَرَضِي وَ بَنَاتْ مَدِينَةْ الْقُدُسْ عَدَّلَنْ دَاخِلْهَا وَ جَمَّلَنَّهْ بِمَحَبَّةْ.

¹¹ أَمُرْقَنْ، يَا بَنَاتْ صَهْيُون! تَعَالَنْ شِيفَنْ الْمَلِكْ سُلَيْمَانْ! عِنْدَهْ تَاجْ الْأَمَّهْ خَطَّتَهْ لَيَّهْ فِي يَوْم عَرِيسَهْ وَ دَا يَوْم الْفَرَحْ مَلَا قَلْبَهْ.