نشيد 2 - الكتاب المقدس بالعربي الدارجي هنا تشاد

¹ أَنَا مِثِلْ نُوَّارْ الْقَشّ فِي سَهَلَةْ شَارُونْ وَ مِثِلْ زَهْرَةْ جَمِيلَةْ فِي الْوَادِي.

كلام المحْبوب

² حَبِيبْتِي فِي أُسْط الْبَنَاتْ مِثِلْ زَهْرَةْ جَمِيلَةْ فِي لُبّ الشَّوْك.

كلام المحْبوبة

³ حَبِيبِي فِي أُسْط الصُّبْيَانْ مِثِلْ شَدَرَةْ التُّفَّاحْ فِي لُبّ شَدَرْ الْغَابَةْ. فِي ضُلَّهْ، نِرِيدْ نِنْجَمَّ وَ هُو حَلُو لَيِّ مِثِلْ فَوَاكِهْ فِي لِسَانِي.

⁴ هُو وَدَّانِي فِي بَيْت الْعَازُومَةْ وَ غَطَّانِي بِحُبَّهْ.

⁵ أَكُّلُونِي بِكَعَكْ الْعِنَبْ وَ أَزْقُونِي بِعَصِيرْ التُّفَّاحْ أَشَانْ أَنَا مِرِضْت مِنْ كَتَرَةْ الشَّهْوَةْ.

⁶ إِيدَهْ الْإِسْرَةْ قَاعِدَةْ تِحِتْ رَاسِي وَ إِيدَهْ الزَّيْنَةْ حَضَنَتْنِي.

⁷ يَا بَنَاتْ مَدِينَةْ الْقُدُسْ، نَحَلِّفْكَنْ بِجَمَالْ الْغُزْلَانْ وَ أَرَايِلْ الْكَدَادَةْ كَدَرْ مَا تِقَوِّمَنْ وَ لَا تِوَعَّنْ الْحُبّ قَبُلْ وَكْتَهْ.

كلام المحْبوبة

⁸ أَسْمَعَنْ، دَاهُو حَبِيبِي جَايِ. يُنُطّ مِنْ جَبَلْ لِجَبَلْ وَ مِنْ حَجَرْ لِحَجَرْ.

⁹ حَبِيبِي مِثِلْ الْغَزَالْ وَ مِثِلْ جِدِي الْأَرْيَلْ. دَاهُو وَاقِفْ وَرَاءْ دُرْدُرْنَا. يِشِيفْنِي بِالشُّبَّاكْ وَ يِتَاوِقْنِي بِالْقُدُودْ.

¹⁰ هُو شَالْ الْكَلَامْ وَ قَالْ لَيِّ: «قُمِّي، يَا حَبِيبْتِي الْجَمِيلَةْ، وَ تَعَالِي لَيِّ.

¹¹ أَشَانْ وَكْت الصَّيْف كَمَّلْ وَ الْمَطَرْ بَدَا وَ الْخَرِيفْ جَاءْ.

¹² وَ فِي كُلَّ الْبَلَدْ، النُّوَّارْ بَانْ وَ وَكْت الْغِنَيْ جَاءْ. وَ حِسّ الْقِمْرِيْ أَنْسَمَعْ فِي كُلَّ الْبَلَدْ.

¹³ شَدَرْ التِّينْ رَمَى عِيَالَهْ وَ نُوَّارْ الْعِنَبْ أَنْشَمَّ. قُمِّي، يَا حَبِيبْتِي الْجَمِيلَةْ، وَ تَعَالِي لَيِّ.

¹⁴ «يَا حَمَامْتِي، الْمُلَّبِّدَةْ فِي كَرَاكِيرْ الْجِبَالْ وَ فِي جُرُوفْ الْحُجَارْ. وَصِّفِي لَيِّ وِجِهْكِ وَ خَلِّي نَسْمَعْ حِسِّكِ أَشَانْ حِسِّكِ حَلُو وَ وِجِهْكِ جَمِيلْ.

¹⁵ «أَطُرْدُوا لَيْنَا الْبَعَاشِيمْ، أَيْوَى، الْبَعَاشِيمْ الْيِتَلُّفُوا الْعِنَبْ أَشَانْ شَدَرْ عِنَبْنَا نَوَّرْ.»

¹⁶ حَبِيبِي، أَنَا لَيَّهْ هُو وَ هُو لَيِّ أَنَا. وَ هُو سَارِحْ بِغَنَمَهْ فِي النُّوَّارْ.

¹⁷ وَ قَبُلْ بُرُودَةْ اللَّيْل وَ وَكِتْ الضَّلَامْ يِسِدّ، قَبِّلْ، يَا حَبِيبِي، وَ تَعَالْ لَيِّ. أَبْقَى مِثِلْ الْغَزَالْ وَ مِثِلْ جِدِي الْأَرْيَلْ فِي جُرُوفْ الْجِبَالْ.