رَوْمَا 3 - الكتاب المقدس بالعربي الدارجي هنا تشاد

¹ وَ مِثِلْ دَا، شُنُو فَايْدَةْ الْيَهُودْ؟ وَ طَهُورِتْهُمْ دِي، عِنْدَهَا فَايْدَةْ وَلَّا؟

² أَيْوَى، الْيَهُودْ عِنْدُهُمْ فَايْدَةْ كَبِيرَةْ بِلْحَيْن! وَ أَوَّلْ شَيّءْ، اللّٰهْ أَمَّنَاهُمْ بِكَلَامَهْ.

³ وَ مَالَا؟ كَنْ وَاحِدِينْ مِنْهُمْ مَا عِنْدُهُمْ أَمَانْ، هَلْ قِلَّةْ أَمَانْهُمْ دِي تِبَطِّلْ أَمَانْ اللّٰهْ وَلَّا؟

⁴ لَا، أَبَداً. كَنْ كُلَّ النَّاسْ كَدَّابِينْ كُلَ، اللّٰهْ يُقُولْ دَايْماً الْحَقّ. أَشَانْ دَا، الْكِتَابْ بُقُولْ: <يَا اللّٰهْ، إِنْتَ صَادِقْ وَكِتْ تِكَلِّمْ وَ تِنَّصِرْ وَكِتْ تِحَاكِمْ.>

⁵ كَنْ بِفَسَالِتْنَا اللّٰهْ يِوَصِّفْ كَدَرْ هُو عَادِلْ، نُقُولُوا شُنُو؟ هَلْ نُقُولُوا اللّٰهْ مَا عَادِلْ وَكِتْ يِنَزِّلْ غَضَبَهْ فَوْقنَا وَلَّا؟ بِالْكَلَامْ دَا، نِحَجِّي بِفِكِرْ إِنْسَانِي بَسْ.

⁶ لَا، أَبَداً! كَنْ اللّٰهْ مَا عَادِلْ، كِكَّيْف يَقْدَرْ يِحَاسِبْ الْعَالَمْ؟

⁷ أَكُونْ نَادُمْ وَاحِدْ يُقُولْ: «صَحِيحْ، أَنَا كَدَبْت لَاكِنْ كِدْبِي يَنْطِي فُرْصَةْ لِلّٰهْ أَشَانْ يِوَصِّفْ بِزِيَادَةْ كَدَرْ كَلَامَهْ صَحِيحْ. وَ أَشَانْ دَا، النَّاسْ يِمَجُّدُوهْ بِزِيَادَةْ. وَ كَنْ كَيْ دَا، مَالَا اللّٰهْ يِحَاسِبْنِي مَعَ الْمُذْنِبِينْ؟»

⁸ وَ خَلَاصْ، مَالَا مَا نُقُولُوا: «خَلِّي نِسَوُّوا شَيّءْ فَسِلْ أَشَانْ شَيّءْ سَمَحْ يَجِي مِنَّهْ؟» وَ دَا بَسْ الْكَلَامْ النَّاسْ وَاحِدِينْ يُقُولُوا بِكِدِبْ هُو تَعْلِيمْنَا. الْعَذَابْ الْيَجِي فَوْقهُمْ وَاجِبْ لَيْهُمْ!

كل الناس مُذْنِبين

⁹ وَ كِكَّيْف؟ أَنِحْنَ الْيَهُودْ أَفْضَلْ مِنْ النَّاسْ الْآخَرِينْ وَلَّا؟ لَا، دَا مَا صَحِيحْ. أَوَّلْ وَصَّفْت بِكَلَامْ وَاضِحْ كَدَرْ الْيَهُودْ وَ الْمَا يَهُودْ كُلُّهُمْ قَاعِدِينْ تِحِتْ الذَّنِبْ سَوَا سَوَا.

¹⁰ وَ الْكِتَابْ بُقُولْ: <مَا فِي نَادُمْ صَالِحْ وَ لَا وَاحِدْ.

¹¹ مَا فِي نَادُمْ وَاحِدْ عَاقِلْ وَ مَا فِي نَادُمْ وَاحِدْ يِفَتِّشْ اللّٰهْ.

¹² كُلُّهُمْ سَوَا بَعَّدَوْا وَ وَدَّرَوْا، مَا فِي نَادُمْ الْيِسَوِّي الْخَيْر وَ لَا وَاحِدْ.>

¹³ <كَلَامْ خُشُومْهُمْ يِوَدِّي لِلْقَبُرْ وَ لِسْنَيْهُمْ مَلَانِينْ بِكَلَامْ حَلُو غَشَّاشْ.><وَ شَلَالِيفْهُمْ عِنْدُهُمْ سَمّ أَمْ شِدَيْقَاتْ.>

¹⁴ <وَ كَلَامْهُمْ إِلَّا لَعَنَةْ وَ كَلَامْ مُرّ مَرَّةْ وَاحِدْ.>

¹⁵ <رِجْلَيْهُمْ يَجْرُوا لِدَفِّقِينْ الدَّمّ.

¹⁶ الدَّمَارْ وَ الْفَسَالَةْ فِي دَرِبْهُمْ

¹⁷ وَ مَا يَعَرْفُوا دَرِبْ السَّلَامْ.>

¹⁸ <وَ فِي نُفُوسْهُمْ، مَا عِنْدُهُمْ خَوْف مِنْ الرَّبّ.>

¹⁹ وَ نَعَرْفُوا كَدَرْ أَيِّ شَيّءْ الْمَكْتُوبْ فِي التَّوْرَاةْ يِحَجِّي لِأَهَلْ شُرُوطْ التَّوْرَاةْ. وَ بِمِثِلْ دَا، مَا فِي نَادُمْ وَاحِدْ الْيَقْدَرْ يِدَافِعْ لِنَفْسَهْ قِدَّامْ اللّٰهْ. وَ خَلَاصْ كُلَّ نَاسْ الدُّنْيَا يَقْعُدُوا تِحِتْ حِسَابْ اللّٰهْ.

²⁰ أَشَانْ مَا فِي إِنْسَانْ يَبْقَى صَالِحْ قِدَّامْ اللّٰهْ بِطَبِّقِينْ شُرُوطْ التَّوْرَاةْ. بِالْعَكْس، الشُّرُوطْ قَاعِدِينْ أَشَانْ بَيْهُمْ الذَّنِبْ يِنْعَرِفْ.

اللّه يسوّي الناس صالِحين

²¹ لَاكِنْ هَسَّعْ اللّٰهْ بَيَّنْ الدَّرِبْ الْبَيَّهْ هُو يِسَوِّي النَّاسْ صَالِحِينْ قِدَّامَهْ وَ دَا مَا بِطَبِّقِينْ شُرُوطْ التَّوْرَاةْ. وَ الدَّرِبْ دَا، التَّوْرَاةْ وَ كُتُبْ الْأَنْبِيَاء يَشْهَدَوْا لَيَّهْ.

²² اللّٰهْ يَجْعَلْ النَّاسْ صَالِحِينْ قِدَّامَهْ بِالْإِيمَانْ بِعِيسَى الْمَسِيحْ. وَ يِسَوِّي نَفْس الشَّيّءْ لِكُلَّ النَّاسْ الْيِآمُنُوا. كُلَّ النَّاسْ سَوَا سَوَا

²³ أَشَانْ كُلَّ النَّاسْ أَذْنَبَوْا وَ بَيْدَا، مَا يَقْدَرَوْا يَلْحَقَوْا مَجْد اللّٰهْ.

²⁴ لَاكِنْ اللّٰهْ يِسَوِّي كُلَّ النَّاسْ صَالِحِينْ بِالنِّعْمَةْ الْيَنْطِيهَا لَيْهُمْ بَلَا تَمَنْ، بِعِيسَى الْمَسِيحْ الْفَدَاهُمْ مِنْ ذُنُوبْهُمْ.

²⁵ اللّٰهْ قَدَّمْ الْمَسِيحْ مِثِلْ ضَحِيَّةْ أَشَانْ دَمَّهْ يَمْحَا ذُنُوبْ النَّاسْ الْيِآمُنُوا بَيَّهْ. وَ بِمِثِلْ دَا، اللّٰهْ وَصَّفْ كَدَرْ هُو دَايْماً عَادِلْ. فِي الزَّمَنْ الْفَاتْ، اللّٰهْ مَا حَاسَبْ الْمُذْنِبِينْ بِسَبَبْ صَبْرَهْ الْعَظِيمْ.

²⁶ وَ فِي الزَّمَنْ الْحَالِي، هُو وَصَّفْ بِالضَّحِيَّةْ دِي كَدَرْ هُو عَادِلْ. أَيْوَى، هُو عَادِلْ وَ أَيِّ نَادُمْ الْيِآمِنْ بِعِيسَى، هُو يِسَوِّيهْ صَالِحْ.

²⁷ وَ كَنْ بِقِي مِثِلْ دَا، الْإِنْسَانْ عِنْدَهْ حَقّ يِسْتَكْبَرْ وَلَّا؟ لَا، مَا عِنْدَهْ حَقّ وَاحِدْ كُلَ. مَالَا مَا يَقْدَرْ يِسْتَكْبَرْ؟ أَشَانْ هُو مَا يَبْقَى صَالِحْ بِعَمَلَهْ، إِلَّا بِإِيمَانَهْ.

²⁸ خَلَاصْ نُقُولُوا بِكَلَامْ ثَابِتْ كَدَرْ نَادُمْ يَبْقَى صَالِحْ قِدَّامْ اللّٰهْ بِسَبَبْ إِيمَانَهْ بَسْ وَ مَا بِطَبِّقِينْ شُرُوطْ التَّوْرَاةْ.

²⁹ وَ اللّٰهْ، هُو رَبّ الْيَهُودْ وِحَيْدهُمْ وَلَّا؟ وَ النَّاسْ الْآخَرِينْ هُو مَا رَبُّهُمْ وَلَّا؟ أَكِيدْ، هُو رَبّ كُلَّ الْأُمَمْ.

³⁰ أَشَانْ اللّٰهْ وَاحِدْ. وَ هُو يِسَوِّي الْيَهُودْ صَالِحِينْ بِسَبَبْ إِيمَانْهُمْ. وَ يِسَوِّي الْمَا يَهُودْ كُلَ صَالِحِينْ بِسَبَبْ إِيمَانْهُمْ، سَوَا سَوَا.

³¹ وَ بِمِثِلْ دَا، هَلْ بَدَّلْنَا مَرَّةْ وَاحِدْ شُرُوطْ التَّوْرَاةْ بِالْإِيمَانْ وَلَّا؟ لَا، أَبَداً. بِالْعَكْس، أَنِحْنَ ثَبَّتْنَا شُرُوطْ التَّوْرَاةْ.