رَوْمَا 10 - الكتاب المقدس بالعربي الدارجي هنا تشاد1 يَا أَخْوَانِي فِي الْمَسِيحْ، نِتْمَنَّى بِكُلَّ قَلْبِي كَدَرْ أَخْوَانِي الْيَهُودْ يَنْجَوْا وَ دَا الشَّيّءْ الْأَنَا دَايْماً نَطُلْبَهْ مِنْ اللّٰهْ. 2 أَنَا نَشْهَدْ لَيْهُمْ كَدَرْ هُمَّنْ مُنْكَرِبِينْ فِي عِبَادَةْ اللّٰهْ لَاكِنْ فِيَّهْ شَيّءْ وَاحِدْ مَا يَعَرْفُوهْ. 3 هُمَّنْ مَا يَعَرْفُوا كِكَّيْف اللّٰهْ يِسَوِّي النَّاسْ صَالِحِينْ وَ خَلَاصْ يِدَوْرُوا يَبْقَوْا صَالِحِينْ بِجُهُدْهُمْ. وَ أَبَوْا مَا يَقْبَلَوْا الدَّرِبْ الْاللّٰهْ فَتَحَهْ لِلنَّاسْ الْبَيَّهْ يَبْقَوْا صَالِحِينْ. 4 أَشَانْ الْمَسِيحْ جَاءْ وَ تَمَّ شُرُوطْ التَّوْرَاةْ وَ بِالْمَسِيحْ كُلَّ النَّاسْ يَبْقَوْا صَالِحِينْ، كَنْ يِآمُنُوا بَيَّهْ. 5 وَ فِي الْكِتَابْ، مُوسَى فَسَّرْ لَيْنَا كِكَّيْف النَّاسْ يَبْقَوْا صَالِحِينْ بِشُرُوطْ التَّوْرَاةْ. هُو قَالْ: <النَّادُمْ الْيِطَبِّقْ كُلَّ الشُّرُوطْ دَوْل يَحْيَى بَيْهُمْ.> 6 لَاكِنْ هُو قَالْ بَتَّانْ كِكَّيْف النَّاسْ يَبْقَوْا صَالِحِينْ بِالْإِيمَانْ. مَكْتُوبْ: <مَا تُقُولْ فِي قَلْبَكْ، يَاتُو الْيَطْلَعْ فِي السَّمَاءْ؟> يَعْنِي يِنَزِّلْ الْمَسِيحْ. 7 وَ بَتَّانْ مَكْتُوبْ: <مَا تُقُولْ يَاتُو الْيَنْزِلْ فِي الْهَاوِيَةْ؟> يَعْنِي يَمْرُقْ الْمَسِيحْ مِنْ أُسْط الْمَيْتِينْ. 8 لَاكِنْ الشَّيّءْ الْبُقُولَهْ شُنُو؟ بُقُولْ: <الْكَلَامْ قَاعِدْ قَرِيبْ لَيْك. هُو فِي خَشْمَكْ وَ فِي قَلْبَكْ.> وَ الْكَلَامْ دَا، هُو كَلَامْ الْإِيمَانْ النِّبَلُّغُوهْ لَيْكُو. 9 كَنْ بِخَشْمَكْ تَشْهَدْ لِعِيسَى وَ تُقُولْ هُو الرَّبّ وَ فِي قَلْبَكْ تِآمِنْ كَدَرْ اللّٰهْ بَعَثَهْ مِنْ أُسْط الْمَيْتِينْ، بِمِثِلْ دَا تَنْجَى خَلَاصْ. 10 أَشَانْ بِسَبَبْ الْإِيمَانْ الْقَاعِدْ فِي الْقَلِبْ، اللّٰهْ يَجْعَلْ النَّادُمْ صَالِحْ وَ بِسَبَبْ شَهَادَةْ خَشْمَهْ، اللّٰهْ يِنَجِّيهْ. 11 الْكِتَابْ بُقُولْ: <أَيِّ نَادُمْ الْيِآمِنْ بَيَّهْ أَبَداً مَا يَخْجَلْ.> 12 وَ دَا بِقِي سَوَا سَوَا لِلْيَهُودْ وَ لِلْمَا يَهُودْ أَشَانْ الرَّبّ الْوَاحِدْ، هُو رَبّ كُلَّ النَّاسْ وَ هُو كَرِيمْ لِأَيِّ نَادُمْ الْيَدْعِي بِأُسْمَهْ. 13 أَشَانْ مَكْتُوبْ: <أَيِّ نَادُمْ الْيَدْعِي بِأُسُمْ اللّٰهْ يَنْجَى.> بلِّغين البِشارة واجِب 14 وَ كِكَّيْف يَدْعُوا بِالرَّبّ، كَنْ مَا آمَنَوْا بَيَّهْ؟ وَ كِكَّيْف يِآمُنُوا بِالرَّبّ، كَنْ مَا سِمْعَوْا بَيَّهْ؟ وَ كِكَّيْف يَسْمَعَوْا بَيَّهْ، كَنْ مَا فِي نَادُمْ بَلَّغْ لَيْهُمْ الْبِشَارَةْ؟ 15 وَ كِكَّيْف يِبَلُّغُوا لَيْهُمْ الْبِشَارَةْ، كَنْ مَا رَسَّلَوْهُمْ؟ أَشَانْ دَا، الْكِتَابْ بُقُولْ: <مَرْحَباً بِجَيَّةْ الْمُرْسَالْ الْيِبَلِّغْ الْبِشَارَةْ.> 16 وَ لَاكِنْ مَا كُلَّ النَّاسْ قِبْلَوْا الْبِشَارَةْ. أَشَانْ دَا، النَّبِي إِشَعْيَا قَالْ: <يَا اللّٰهْ، يَاتُو الْآمَنْ بِخَبَرْنَا؟> 17 خَلَاصْ، النَّاسْ مَا يَبْقَوْا مُؤمِنِينْ بِالْمَسِيحْ إِلَّا كَنْ يَسْمَعَوْا الْبِشَارَةْ وَ مَا يَسْمَعَوْا الْبِشَارَةْ إِلَّا كَنْ نَادُمْ يِبَلِّغْهَا لَيْهُمْ. 18 لَاكِنْ نَسْأَلْ شَيّءْ وَاحِدْ. صَحِيحْ، الْيَهُودْ لِسَّاعْ مَا سِمْعَوْا الْبِشَارَةْ دِي وَلَّا؟ لَا، هُمَّنْ سِمْعَوْهَا. الْكِتَابْ بُقُولْ: <حِسُّهُمْ أَنْسَمَعْ فِي كُلَّ الْأَرْض، أَيْوَى كَلَامْهُمْ لَحَدِّي آخِرْ الدُّنْيَا.> 19 وَ بَتَّانْ نَسْأَلْ، بَنِي إِسْرَائِيلْ مَا فِهْمَوْا الْكَلَامْ وَلَّا؟ أَوَّلْ بِخَشُمْ مُوسَى، اللّٰهْ قَالْ: <نِسَوِّيكُو حَسُودِينْ بِالشَّعَبْ الْمَا تَمَّوْا أُمَّةْ وَ نِزَعِّلْكُو بِأُمَّةْ جَاهْلَةْ.> 20 وَ النَّبِي إِشَعْيَا قَمَّ حَجَّى كَلَامْ اللّٰهْ لَيْهُمْ بَلَا شَكَكْ وَ قَالْ: <النَّاسْ اللِّقَوْنِي، هُمَّنْ مَا النَّاسْ الْفَتَّشَوْنِي. وَ بَيَّنْت نَفْسِي لِنَاسْ الْمَا نَادَوْنِي.> 21 لَاكِنْ فِي بَنِي إِسْرَائِيلْ، هُو قَالْ: <كُلَّ يَوْم أَنَا مَدَّيْت إِيدَيْنِي لِشَعَبْ عَاصِيِينْ وَ رَاسْهُمْ قَوِي.> |
La Bible en arabe tchadien © Alliance biblique du Tchad, 2019
Bible Society of Chad