رُؤية 10 - الكتاب المقدس بالعربي الدارجي هنا تشاد

المكتوب الفاتِح

¹ وَ فِي الْبَكَانْ دَا، أَنَا شِفْت بَتَّانْ مَلَكْ آخَرْ نَازِلْ مِنْ السَّمَاءْ وَ هُو قَادِرْ. وَ هُو لَابِسْ سَحَابَايْ مِثِلْ خَلَقْ وَ عِنْدَهْ حَجَّازْ الْمَطَرْ فِي رَاسَهْ. وَ وِجْهَهْ يِرَارِي مِثِلْ الْحَرَّايْ وَ رِجِلَيْنَهْ يِشَابُهُوا مِثِلْ عَمُودْ هَنَا نَارْ.

² وَ عِنْدَهْ فِي إِيدَهْ مَكْتُوبْ صَغَيَّرْ وَ الْمَكْتُوبْ دَا فَاتِحْ. وَ خَطَّ رِجْلَهْ الزَّيْنَةْ فِي رَاسْ الْبَحَرْ وَ رِجْلَهْ الْإِسْرَةْ فِي التُّرَابْ.

³ وَ حَجَّى بِحِسّ شَدِيدْ مِثِلْ قَرْقَرَانْ الدُّودْ. وَ وَكِتْ هُو حَجَّى، السَّبْعَةْ رَعَدْ كَلَّمَوْا.

⁴ وَ وَكِتْ السَّبْعَةْ رَعَدْ دَوْل كَلَّمَوْا خَلَاصْ، أَنَا دَوَّرْت نَكْتِبْ كَلَامْهُمْ. لَاكِنْ سِمِعْت حِسّ مِنْ السَّمَاءْ قَالْ لَيِّ: «مَا تِكَلِّمْ لِأَيِّ نَادُمْ بِالْكَلَامْ الْقَالَوْه السَّبْعَةْ رَعَدْ دَوْل. وَ مَا تَكْتِبَهْ.»

⁵ وَ الْمَلَكْ الشِّفْتَهْ وَاقِفْ رِجْلَهْ الْوَاحِدَةْ فِي الْبَحَرْ وَ رِجْلَهْ الْآخَرَةْ فِي التُّرَابْ رَفَعْ إِيدَهْ الزَّيْنَةْ لِلسَّمَاءْ.

⁶ وَ هُو حَلَفْ بِاللّٰهْ الْحَيّ إِلَى الْأَبَدْ، خَالِقْ السَّمَاوَاتْ وَ الْأَرْض وَ كُلَّ شَيّءْ الْفَوْقهُمْ وَ الْبَحَرْ وَ كُلَّ شَيّءْ الْفَوْقَهْ وَ قَالْ: «الْوَكِتْ تَمَّ.

⁷ وَ وَكِتْ الْمَلَكْ السَّابِعْ يَضْرُبْ الْبُرُنْجِي الْعِنْدَهْ، خَلَاصْ اللّٰهْ يِتِمّ الشَّيّءْ الْهُو قَدَّرَهْ الْهُو وِحَيْدَهْ يَعَرْفَهْ مِثِلْ أَوَّلْ كَلَّمْ بَيَّهْ لِعَبِيدَهْ الْأَنْبِيَاء.»

⁸ وَ فِي الْبَكَانْ دَا، الْحِسّ الْأَنَا سِمِعْتَهْ الْجَايِ مِنْ السَّمَاءْ كَلَّمْ لَيِّ بَتَّانْ وَ قَالْ: «أَمْشِي شِيلْ الْمَكْتُوبْ الْفَاتِحْ الْقَاعِدْ فِي إِيدْ الْمَلَكْ الْوَاقِفْ رِجْلَهْ الْوَاحِدَةْ فِي الْبَحَرْ وَ رِجْلَهْ الْآخَرَةْ فِي التُّرَابْ.»

⁹ وَ خَلَاصْ، أَنَا مَشَيْت لِلْمَلَكْ وَ طَلَبْت مِنَّهْ الْمَكْتُوبْ الصَّغَيَّرْ. وَ هُو حَجَّى لَيِّ وَ قَالْ: «شِيلَهْ وَ آكُلَهْ. وَ أَكِيدْ بَعَدَيْن قَلْبَكْ يَوْجَعَكْ وَ لَاكِنْ فِي الْأَوَّلْ يَبْقَى حَلُو مِثِلْ الْعَسَلْ فِي خَشْمَكْ.»

¹⁰ وَ أَنَا شِلْت الْمَكْتُوبْ الصَّغَيَّرْ مِنْ إِيدَهْ وَ أَكَلْتَهْ. وَ هُو بِقِي لَيِّ حَلُو مِثِلْ الْعَسَلْ فِي خَشْمِي لَاكِنْ وَكِتْ زَرَطْتَهْ، قَلْبِي وَجَعَانِي.

¹¹ وَ قَالَوْا لَيِّ: «وَاجِبْ تِتْنَبَّأْ بَتَّانْ بِكَلَامْ الْبُخُصّ نَاسْ كَتِيرِينْ مِنْ الشُّعُوبْ وَ الْأُمَمْ وَ اللُّغَّاتْ وَ مُلُوكْهُمْ.»