زَبُور 88 - الكتاب المقدس بالعربي الدارجي هنا تشادغِنَيْ، مَزْمُورْ لِأَوْلَادْ قُورَحْ، وَصِيَّةْ لِكَبِيرْ الْغَنَّايِينْ: لِيِغَنُّوهْ بِحِسّ الصُّفَّارَةْ. تَعْلِيمْ مِنْ هَيْمَانْ الْأَزْرَاحِي 1 يَا اللّٰهْ إِلٰـهِي التِّنَجِّينِي! لَيْل وَ نَهَارْ، أَنَا نَشْحَدَكْ. 2 خَلِّي صَلَاتِي تَلْحَقَكْ وَ إِنْتَ أَسْمَعْ شَكْوِتِي. 3 أَشَانْ نَفْسِي شَبْعَانَةْ مِنْ الْبَلَاءْ وَ أَنَا قَرَّبْت لِلْمَوْت. 4 جَعَلَوْنِي مَعَ الْيَنْزُلُوا فِي الْقُبُورْ وَ قُدُرْتِي كُلَ كَمَّلَتْ. 5 وَ رَقَّدَوْنِي مَعَ الْمَيْتِينْ مِثِلْ الْمَكْتُولِينْ وَ مُرَقَّدِينْ فِي الْقَبُرْ وَ مِثِلْ النَّاسْ الْإِنْتَ مَا تِفَكِّرْ فَوْقهُمْ وَ لَزَمْت إِيدَكْ مِنْهُمْ. 6 إِنْتَ رَمَيْتنِي فِي نُقْرَةْ مَا عِنْدَهَا حَدّ وَ فِي ضَلَامْ هَالِكْ. 7 غَضَبَكْ نَزَلْ فَوْقِي وَ بِمَوْج الْمَوْت غَطَّيْتنِي. وَقْفَةْ. 8 إِنْتَ بَعَّدْتِنِي مِنْ كُلَّ الْيَعَرْفُونِي وَ سَوَّيْتنِي مَكْرُوهْ لَيْهُمْ. وَ أَنَا مَسْجُونْ، مَا نَقْدَرْ نَمْرُقْ. 9 عُيُونِي كَلَّوْا مِنْ التَّعَبْ وَ نَادَيْتَكْ كُلَّ يَوْم، يَا اللّٰهْ! وَ مَدَّيْت إِيدَيْنِي لَيْك. 10 هَلْ تِسَوِّي عَجَايِبْ لِلْمَيْتِينْ وَلَّا؟ هَلْ الْمَيْتِينْ يُقُمُّوا يَشْكُرُوكْ وَلَّا؟ وَقْفَةْ. 11 فِي الْقَبُرْ يِحَجُّوا بِرَحْمَتَكْ وَلَّا؟ وَ فِي الْهَلَاكْ يِحَجُّوا بِصِدْقَكْ وَلَّا؟ 12 عَجَايْبَكْ يِنْعَرْفُوا فِي الضَّلَامْ وَلَّا؟ وَ عَدَالْتَكْ فِي بَلَدْ النِّسْيَانْ وَلَّا؟ 13 وَ لَاكِنْ أَنَا نِنَادِيكْ لِلْفَزَعْ، يَا اللّٰهْ، وَ بِفَجُرْ، نِقَدِّمْ لَيْك صَلَاتِي. 14 يَا اللّٰهْ! مَالَا خَلَّيْتنِي وَ أَبَيْت مَا تِوَجِّهْ وِجْهَكْ عَلَيِّ؟ 15 مِنْ أَنَا صَغَيَّرْ أَنَا مِسْكِينْ وَ مَيِّتْ وَ إِنْتَ حَمَّلْتِنِي بِخَوْفَكْ وَ أَنَا خَلَاصْ أَضَّايَقْت. 16 غَضَبَكْ نَزَلْ فَوْقِي وَ الْخَوْف مِنَّكْ سَكَّتْنِي. 17 كُلَّ يَوْم، هُمَّنْ بِقَوْا مِثِلْ أَلْمِي حَوَالَيِّ وَ حَوَّقَوْنِي مِنْ كُلِّ جِيهَةْ. 18 إِنْتَ بَعَّدْت مِنِّي مَحْبُوبِينِي وَ رُفْقَانِي وَ الضَّلَامْ بَسْ بِقِي رَفِيقِي. |
La Bible en arabe tchadien © Alliance biblique du Tchad, 2019
Bible Society of Chad