زَبُور 81 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ، لِأَسَافْ

¹ عِيطُوا مِنْ الْفَرَحْ لِإِلٰـهْنَا، الْهُو قُدْرِتْنَا! أَفْرَحَوْا بِإِلٰـهْ يَعْقُوبْ.

² أَرْفَعَوْا حِسّ الْمُسِيقَى وَ أَضُرْبُوا التَّنْبَلْ وَ الْجِقِنْدِيَّةْ الْحَلُوَّةْ وَ أَمْ سِبَيْبَةْ.

³ أَضُرْبُوا الْبُوقْ فِي أَوَّلْ يَوْم فِي الشَّهَرْ وَ فِي أُسْط الشَّهَرْ فِي يَوْم عِيدْنَا.

⁴ وَ دَا يُكُونْ شَرْط لِبَنِي إِسْرَائِيلْ وَ قَانُونْ مِنْ إِلٰـهْ يَعْقُوبْ.

⁵ اللّٰهْ شَالْ قَرَارْ فِي ذُرِّيَّةْ يُوسُفْ وَكِتْ هُو قَمَّ ضِدّ مَصِرْ. أَنَا سِمِعْت حِسّ الْمَا عِرِفْتَهْ وَ الْكَلَامْ دَا يُقُولْ:

⁶ «أَنَا شِلْت التَّقَلَةْ مِنْ كِتْفَكْ وَ إِيدَيْنَكْ نَزَّلَوْا الصَّوْصَلْ.

⁷ وَكِتْ إِنْتَ قَاعِدْ تَصْرَخْ مِنْ التَّعَبْ، أَنَا خَلَّصْتَكْ وَ رَدَّيْت لَيْك بِسِرّ فِي الرَّعَدْ وَ جَرَّبْتَكْ جَنْب أَلْمِي مَرِيبَةْ. وَقْفَةْ.

⁸ «يَا شَعَبِي، أَسْمَعَوْنِي عَدِيلْ! يَا بَنِي إِسْرَائِيلْ، نِحَذِّرْكُو كَنْ تَسْمَعَوْنِي.

⁹ خَلِّي مَا يِنْلَقِي فِي بَكَانْكُو إِلٰـهْ أَجْنَبِي وَ مَا تَسْجُدُوا قِدَّامْ إِلٰـهْ آخَرْ.

¹⁰ أَنَا بَسْ اللّٰهْ إِلٰـهْكُو الْمَرَقْتُكُو مِنْ بَلَدْ مَصِرْ. أَفْتَحَوْا خُشُومْكُو كُبَارْ وَ أَنَا نَمْلَاهُمْ.

¹¹ «لَاكِنْ شَعَبِي مَا سِمْعَوْا حِسِّي وَ بَنِي إِسْرَائِيلْ مَا دَوَّرَوْنِي.

¹² وَ خَلَاصْ، أَنَا خَلَّيْتهُمْ بِرُوسَيْهُمْ الْقَوِيِّينْ وَ مَشَوْا حَسَبْ نِيِّتْهُمْ.

¹³ «أَيْوَى، كَنْ شَعَبِي سِمْعَوْنِي وَ بَنِي إِسْرَائِيلْ تَابَعَوْا دَرْبِي،

¹⁴ أَنَا بِسُرْعَةْ نِعَيِّبْ عُدْوَانْهُمْ وَ نَرْفَعْ إِيدِي ضِدّ خُصْمَانْهُمْ.

¹⁵ «الْيَكْرَهَوْا اللّٰهْ يِنْهَانَوْا وَ عِقَابْهُمْ يُكُونْ دَايْماً وَ إِلَى الْأَبَدْ.

¹⁶ وَ نِأَكِّلْ بَنِي إِسْرَائِيلْ بِقَمَحْ عَدِيلْ وَ نَرْوِيهُمْ بِعَسَلْ الْكَدَادَةْ.»