زَبُور 71 - الكتاب المقدس بالعربي الدارجي هنا تشاد1 يَا اللّٰهْ! لَيْك إِنْتَ أَنَا نَلْجَأْ دَايْماً، خَلِّي مَا نَلْقَى عَيْب. 2 بِعَدَالْتَكْ، نَجِّينِي! خُطّ أَدَانَكْ لَيِّ وَ نَجِّينِي! 3 كُونْ لَيِّ مَلْجَأْ قَوِي النَّقْدَرْ نَلْجَأْ لَيَّهْ فِي كُلَّ وَكِتْ. إِنْتَ قَرَّرْت تِنَجِّينِي أَشَانْ إِنْتَ جَبَلِي وَ بَكَانِي الْقَوِي. 4 يَا إِلٰـهِي! نَجِّينِي مِنْ إِيدْ الْعَاصِي أَيْوَى، مِنْ كَرْبَةْ الْفَسِلْ وَ الظَّالِمْ. 5 يَا اللّٰهْ رَبِّي! إِنْتَ بَسْ النُّخُطّ فَوْقَكْ عَشَمِي وَ أَنَا أَتْوَكَّلْت عَلَيْك مِنْ صُبَايِ. 6 أَنَا أَنْتَكَلْت عَلَيْك مِنْ وِلْدَوْنِي وَ إِنْتَ بَسْ مَرَقْتِنِي مِنْ بَطُنْ أَمِّي وَ لَيْك إِنْتَ، نَحْمُدَكْ إِلَى الْأَبَدْ. 7 أَنَا بِقِيتْ عَجَبْ لِنَاسْ كَتِيرِينْ لَاكِنْ إِنْتَ مَلْجَئِي الْقَوِي. 8 لِسَانِي يَحْمُدَكْ وَ كُلَّ يَوْم، نِمَجِّدَكْ. 9 هَسَّعْ وَكِتْ أَنَا بِقِيتْ شَايِبْ، مَا تَزْقُلْنِي. وَ وَكِتْ قُدُرْتِي كَمَّلَتْ، مَا تِخَلِّينِي. 10 أَشَانْ عُدْوَانِي يِحَجُّوا فَوْقِي. أَيْوَى، الْيِرَاقُبُونِي يِشَّاوَرَوْا فَوْقِي. 11 وَ يُقُولُوا: «الرَّبّ خَلَّاهْ! طَارُدُوهْ وَ أَكُرْبُوهْ أَشَانْ مَا فِي الْيِخَلِّصَهْ!» 12 يَا إِلٰـهِي، مَا تِبَعِّدْ مِنِّي! يَا رَبِّي، وَجِّهْ عَلَيِّ وَ بِسُرْعَةْ، أَفْزَعْنِي. 13 خَلِّي الْيَتْهَمَوْنِي يَلْقَوْا الْعَيْب وَ يِدَّمَّرَوْا. وَ الْيِدَوْرُوا يِسَوُّوا لَيِّ الشَّرّ، خَلِّي الْعَيْب يِغَطِّيهُمْ وَ شَرَفْهُمْ يِوَدِّرْ. 14 دَايْماً أَنَا نَرْجَى بِعَشَمْ وَ نَشْكُرَكْ بِغِنَيْ. 15 خَشْمِي يِحَجِّي بِعَدَالْتَكْ وَ دَايْماً يِحَجِّي بِنَجَاتَكْ هُمَّنْ الْعَدَدْهُمْ مَا بِنْحَسِبْ. 16 يَا اللّٰهْ الرَّبّ! أَنَا نَجِي وَ نِخَبِّرْ بِأَعْمَالَكْ الْقَوِيِّينْ وَ نِذَّكَّرْ عَدَالْتَكْ إِنْتَ بَسْ. 17 يَا رَبّ! إِنْتَ عَلَّمْتِنِي مِنْ صُبَايِ وَ لَحَدِّي هَسَّعْ، أَنَا قَاعِدْ نِخَبِّرْ بِعَجَايْبَكْ. 18 هَسَّعْ، أَنَا شَيَّبْت وَ صُوفِي بِقِي أَبْيَضْ. يَا رَبّ، مَا تِخَلِّينِي لَحَدِّي نِخَبِّرْ الذُّرِّيَّةْ دِي بِقُوَّتَكْ وَ نِخَبِّرْ الْيَجُوا بَعَدْهُمْ بِقُدُرْتَكْ. 19 وَ عَدَالْتَكْ قَاعِدَةْ فَوْق، يَا رَبّ، أَشَانْ إِنْتَ سَوَّيْت أَشْيَاءْ كُبَارْ. يَا رَبّ، يَاتُو مِثْلَكْ؟ 20 إِنْتَ وَصَّفْتِنِي عِدَّةْ مَرَّاتْ الضِّيقَةْ وَ الْمَصَايِبْ. وَ لَاكِنْ بَعَدْ دَا، تَنْطِينِي الْحَيَاةْ وَ تَمْرُقْنِي مِنْ خَطَرْ الْمَوْت. 21 تِزِيدْ عَظَمَتِي وَ بَتَّانْ تِحَنِّسْنِي. 22 وَ خَلَاصْ، أَنَا نَشْكُرَكْ بِأَمْ سِبَيْبَةْ فِي شَانْ أَمَانَكْ، يَا إِلٰـهِي. وَ نَضْرُبْ جِقِنْدِيَّةْ فِي شَانَكْ إِنْتَ، يَا قُدُّوسْ إِسْرَائِيلْ! 23 أَيْوَى، أَنَا نَضْرُبْ الْجِقِنْدِيَّةْ وَ بِخَشْمِي نِغَنِّي مِنْ الْفَرَحْ أَشَانْ إِنْتَ فَدَيْت حَيَاتِي. 24 وَ بَتَّانْ، لِسَانِي يَنْطَقْ كُلَّ يَوْم بِعَدَالْتَكْ. أَشَانْ الْعَيْب وَ الشَّمَاتَةْ يَكُرْبُوهُمْ، هُمَّنْ الْيِدَوْرُوا يِسَوُّوا لَيِّ الشَّرّ. |
La Bible en arabe tchadien © Alliance biblique du Tchad, 2019
Bible Society of Chad