زَبُور 7 - الكتاب المقدس بالعربي الدارجي هنا تشاد

غِنَيْ شَكْوَةْ دَاوُدْ الْغَنَّى لِلّٰهْ فِي شَانْ كَلَامْ كُوشْ الْمِنْ قَبِيلَةْ بَنْيَامِينْ

¹ يَا اللّٰهْ إِلٰـهِي، إِنْتَ مَلْجَئِي، خَلِّصْنِي مِنْ الْيِطَارُدُونِي وَ نَجِّينِي.

² أَشَانْ أَنَا خَايِفْ يَضُرْبُونِي مِثِلْ الدِّيدَانْ وَ يِقَطُّعُوا جِسْمِي وَ مَا فِي نَادُمْ الْيِخَلِّصْنِي.

³ يَا اللّٰهْ إِلٰـهِي، كَنْ أَنَا سَوَّيْت شَيّءْ فَسِلْ أَوْ سَوَّيْت جَرِيمَةْ بِإِيدَيْنِي

⁴ أَوْ سَوَّيْت الْفَسَالَةْ لِسِيدْ زَيْنِي أَوْ بَلَا سَبَبْ نَهَبْت خَصِيمِي،

⁵ خَلَاصْ، خَلِّي الْعَدُو يِطَارِدْنِي وَ يَكْرُبْنِي وَ فِي الْأَرْض، يِفَجِّقْنِي وَ فِي التُّرَابْ، يَرْمِي شَرَفِي. وَقْفَةْ.

⁶ قُمّ، يَا اللّٰهْ، وَ أَغْضَبْ! قُمّ ضِدّ زَعَلْ الْخُصْمَانِي! إِنْتَ الْأَمَرْت بِالْعَدِلْ، فَكِّرْ فَوْقِي!

⁷ خَلِّي مُجْتَمَعْ الشُّعُوبْ يِلِمُّوا قِدَّامَكْ وَ مِنْ بَكَانَكْ الْعَالِي، أَحْكِمْ فَوْقهُمْ!

⁸ يَا اللّٰهْ، إِنْتَ التِّشَارِعْ الشُّعُوبْ! يَا اللّٰهْ، شَارِعْنِي حَسَبْ عَدَالْتِي وَ كَمَالِي.

⁹ وَقِّفْ فَسَالَةْ الْعَاصِيِينْ! وَ ثَبِّتْ نَاسْ الصَّالِحِينْ! يَا الْإِلٰـهْ الصَّادِقْ! إِنْتَ التَّكْشِفْ الْقَلِبْ وَ فِكِرْ الْإِنْسَانْ.

¹⁰ الرَّبّ هُو دَرَقَتِي وَ مُنَجِّي الصَّالِحِينْ.

¹¹ اللّٰهْ الرَّبّ هُو قَاضِي صَادِقْ وَ يِوَصِّفْ غَضَبَهْ كُلَّ يَوْم.

¹² وَ كَنْ الْإِنْسَانْ مَا يُتُوبْ، اللّٰهْ يِطَرِّقْ سَيْفَهْ وَ يَجْبِدْ نُبَّالَهْ وَ يِصَوِّبَهْ.

¹³ وَ يِجَهِّزْ سِلَاحْ الْمَوْت وَ يِسَوِّي نَشَاشِيبْ الْيِحَرُّقُوا.

¹⁴ دَاهُو الْيَغْلَبْ بِالشَّرّ وَ يَحْمَلْ بِالْفَسَالَةْ، يَلْدَ الْكِدِبْ.

¹⁵ وَ الْيَحْفِرْ هَوِيرَةْ وَ يِسَوِّيهَا طَوِيلَةْ، هُو ذَاتَهْ يَقَعْ فَوْقهَا.

¹⁶ فَسَالْتَهْ تَقَعْ فَوْقَهْ وَ الْعُنُفْ السَّوَّاهْ يِقَبِّلْ فِي رَاسَهْ.

¹⁷ أَنَا نَشْكُرْ اللّٰهْ فِي شَانْ عَدَالْتَهْ وَ نَمْدَحْ أُسُمْ اللّٰهْ الْعَالِي.