زَبُور 6 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: لِيِغَنُّوهْ بِآلَاتْ الْمُسِيقَى، بِجِقِنْدِيَّةْ الْعِنْدَهَا تَمَانَةْ حَبِلْ، مَزْمُورْ لِدَاوُدْ

¹ يَا اللّٰهْ! أَهْدِينِي بَلَا زَعَلْ وَ أَدِّبْنِي بَلَا غَضَبْ!

² أَرْحَمْنِي، يَا اللّٰهْ، أَشَانْ أَنَا مَا عِنْدِي قُدْرَةْ. أَشْفِينِي، يَا اللّٰهْ، أَشَانْ عُضَامِي مَاعَوْا.

³ أَنَا نِنْبَهِتْ زِيَادَةْ مِنْ دَاخَلْ قَلْبِي. وَ دَا لِمَتَى، يَا اللّٰهْ؟

⁴ تَعَالْ، يَا اللّٰهْ! خَلِّصْنِي وَ بِرَحْمَتَكْ، نَجِّينِي!

⁵ أَشَانْ الْيُمُوتُوا مَا يِذَّكَّرَوْا أُسْمَكْ وَ فِي الْقَبُرْ، يَاتُو يَشْكُرَكْ؟

⁶ أَنَا عِيِيتْ مِنْ شِدَّةْ الْقَنِتِينْ وَ دُمُوعِي يُرُشُّوا فُرَاشِي وَ كُلِّ لَيْلَةْ، يِبِلُّوا سَرِيرِي.

⁷ وَ عُيُونِي ضِعْفَوْا مِنْ الْحِزِنْ وَ بِسَبَبْ كُلَّ الْيِضَايُقُونِي.

⁸ كِسُّوا مِنِّي بَعِيدْ، إِنْتُو كُلُّكُو التِّسَوُّوا الظُّلُمْ أَشَانْ اللّٰهْ سِمِعْ بَكِيِّ!

⁹ أَيْوَى، اللّٰهْ سِمِعْ دُعَايِ وَ اللّٰهْ قِبِلْ صَلَاتِي.

¹⁰ كُلَّ عُدْوَانِي يِعِيبُوا وَ يَرْجُفُوا وَ طَوَّالِي كُلُّهُمْ يِقَبُّلُوا مُغَطَّيْهُمْ الْعَيْب.