زَبُور 57 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «مَا تِدَمِّرْ.» شِعِرْ لِدَاوُدْ، وَكِتْ دَخَلْ فِي الْكَرْكُورْ مُعَرِّدْ مِنْ شَاوُولْ

¹ حِنّ فَوْقِي، يَا رَبّ، حِنّ فَوْقِي! لَيْك إِنْتَ، أَنَا نَلْجَأْ. أَيْوَى، تِحِتْ جَنَاحَيْك أَنَا نَلْجَأْ لَحَدِّي يُفُوتْ الدَّمَارْ.

² نِنَادِي الرَّبّ الْعَالِي، الْإِلٰـهْ الْيِسَوِّي لَيِّ الْخَيْر.

³ وَ مِنْ السَّمَاءْ، يِرَسِّلْ لَيِّ النَّجَاةْ وَكِتْ الْيِضَايِقْنِي قَاعِدْ يِطَارِدْنِي. وَقْفَةْ. خَلِّي الرَّبّ يِرَسِّلْ لَيِّ رَحْمَتَهْ وَ أَمَانَهْ.

⁴ أَنَا رَاقِدْ فِي أُسْط النَّاسْ الْمِثِلْ دِيدَانْ الْيَاكُلُوا الْإِنْسَانْ. سُنُونْهُمْ مِثِلْ حُرَابْ وَ نَشَاشِيبْ وَ لِسَانْهُمْ مِثِلْ سَيْف طَرِينْ.

⁵ يَا رَبّ! وَصِّفْ عَظَمَتَكْ فِي السَّمَاءْ وَ وَصِّفْ مَجْدَكْ فِي كُلَّ الْأَرْض.

⁶ هُمَّنْ كَجَّوْا شَرَكْهُمْ لَيِّ وَ قَرِيبْ نَقَعْ فَوْقَهْ. وَ حَفَرَوْا نُقْرَةْ قِدَّامِي لَاكِنْ هُمَّنْ ذَاتْهُمْ وَقَعَوْا فَوْقهَا. وَقْفَةْ.

⁷ يَا رَبّ! قَلْبِي ثَابِتْ أَيْوَى، قَلْبِي ثَابِتْ. أَنَا نِغَنِّي لَيْك وَ نَمْدَحَكْ، يَا اللّٰهْ!

⁸ يَا نَفْسِي، أَقْعُدِي وَاعِيَةْ! يَا أَمْ سِبَيْبَةْ وَ الْجِقِنْدِيَّةْ، أَقْعُدُوا وَاعِيِّينْ! أَنَا نِوَعِّي الشَّقَاقْ!

⁹ يَا رَبّ! أَنَا نَشْكُرَكْ فِي أُسْط الشُّعُوبْ وَ نَمْدَحَكْ فِي أُسْط الْأُمَمْ.

¹⁰ أَشَانْ رَحْمَتَكْ كَبِيرَةْ فِي السَّمَاءْ وَ أَمَانَكْ لِحِقْ لَحَدِّي السَّحَابْ.

¹¹ إِنْتَ عَالِي فِي السَّمَاءْ، يَا رَبّ، وَ خَلِّي مَجْدَكْ يُكُونْ فِي كُلَّ الْأَرْض.