زَبُور 51 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ، وَكِتْ النَّبِي نَاتَانْ جَاءْ لَيَّهْ وَ دَا بَعَدْ دَاوُدْ دَخَلْ فِي بَتْشَابَعْ

¹ يَا رَبِّي! حِنّ فَوْقِي حَسَبْ نِعْمَتَكْ وَ بِرَحْمَتَكْ الْكَبِيرَةْ، أَمْحَا خَطَايِ.

² قُشّ خَطَايِ مَرَّةْ وَاحِدْ وَ طَهِّرْنِي مِنْ ذَنْبِي.

³ أَشَانْ أَنَا عِرِفْت خَطَايِ وَ ذَنْبِي قَاعِدْ دَايْماً فِي عَقْلِي.

⁴ ضِدَّكْ إِنْتَ وِحَيْدَكْ بَسْ، أَنَا أَذْنَبْت وَ سَوَّيْت شَيّءْ فَسِلْ قِدَّامَكْ. وَ فِي شَانْ دَا، إِنْتَ صَادِقْ وَكِتْ تِكَلِّمْ وَ عَادِلْ وَكِتْ تِحَاكِمْ.

⁵ دَاهُو مِنْ وِلْدَوْنِي، أَنَا فِي الْخَطَا أَيْوَى، مِنْ أَمِّي غِلْبَتْ بَيِّ، أَنَا مُذْنِبْ.

⁶ لَاكِنْ إِنْتَ تَفْرَحْ بِالْحَقّ الْفِي دَاخَلْ الْقَلِبْ. فِي دَاخِلِي، عَرِّفْنِي الْحِكْمَةْ.

⁷ طَهِّرْنِي مِنْ ذَنْبِي بِوَرْشَالْ زُوفَةْ وَ نَبْقَى طَاهِرْ. غَسِّلْنِي لَحَدِّي نَبْقَى أَبْيَضْ كَرّ زِيَادَةْ مِنْ الْقُطُنْ.

⁸ أَنْطِينِي الْفَرَحْ وَ السُّرُورْ وَ خَلِّي الْجِسِمْ الْإِنْتَ رِحِكْتَهْ يَفْرَحْ.

⁹ مَا تِوَجِّهْ عَلَيْ ذُنُوبِي وَ أَمْحَا كُلَّ خَطَايِ.

¹⁰ يَا رَبِّي! أَخْلِقْ فِي دَاخِلِي قَلِبْ طَاهِرْ وَ قَبِّلْ لَيِّ رُوحِي الثَّابْتَةْ!

¹¹ مَا تَزْقُلْنِي بَعِيدْ مِنْ حَضَرَتَكْ وَ مَا تِشِيلْ مِنِّي رُوحَكْ الْمُقَدَّسْ.

¹² أَنْطِينِي فَرَحْ نَجَاتَكْ وَ قَوِّينِي بِرُوحْ كَرِيمَةْ.

¹³ نِعَلِّمْ دُرُوبَكْ لِلْعَاصِيِينْ وَ الْمُذْنِبِينْ يِقَبُّلُوا لَيْك.

¹⁴ يَا رَبِّي، يَا إِلٰـهِي، يَا مُنَجِّي حَيَاتِي! نَجِّينِي مِنْ الدِّمَّةْ وَ لِسَانِي يِكَلِّمْ بِعَدَالْتَكْ.

¹⁵ يَا رَبّ، أَفْتَحْ خَشْمِي وَ لِسَانِي يَشْكُرَكْ.

¹⁶ إِنْتَ مَا تِدَوْر نَدْبَحْ ضَحِيَّةْ. حَتَّى كَنْ نِقَدِّمْ لَيْك ضَحِيَّةْ مُحَرَّقَةْ كُلَ، إِنْتَ مَا تَقْبَلْهَا.

¹⁷ الضَّحِيَّةْ الْيَقْبَلْهَا الرَّبّ، هِي ضَحِيَّةْ الرُّوحْ الْمُحَطَّمَةْ. يَا إِلٰـهِي، إِنْتَ مَا تَابَى الْقَلِبْ الْمَكْسُورْ وَ مَرْحُوكْ.

¹⁸ بِرِضَاكْ، سَوِّي الْخَيْر لِصَهْيُون وَ أَبْنِي بَتَّانْ دَرَادِرْ مَدِينَةْ الْقُدُسْ.

¹⁹ وَ بَيْدَا، تَرْضَى بِالضَّحَايَا الْمُوَافْقِينْ وَ دَوْل الضَّحَايَا الْمُحَرَّقِينْ وَ الْهَدَايَا الْكَامِلِينْ. أَيْوَى، يِقَدُّمُوا تِيرَانْ فِي مَدْبَحَكْ.