زَبُور 5 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: لِيِغَنُّوهْ بِصُفَّارَةْ، مَزْمُورْ لِدَاوُدْ

¹ خُطّ أَدَانَكْ لِكَلَامِي، يَا اللّٰهْ، وَ أَقْبَلْ شَكْوِتِي.

² أَسْمَعْ حِسّ مُنَادَاتِي لِتَفْزَعْنِي، يَا مَلِكِي، يَا إِلٰـهِي، إِنْتَ الْأَنَا نَشْحَدَكْ.

³ يَا اللّٰهْ، كُلِّ فَجُرْ أَسْمَعْ حِسِّي! وَ فِي كُلِّ فَجُرْ، أَنَا نِجَهِّزْ وَ نَرْجَاكْ.

⁴ أَشَانْ إِنْتَ إِلٰـهْ الْمَا تَرْضَى بِالشَّرّ وَ مَا تَقْبَلْ الْفَسَالَةْ.

⁵ الْمُتَكَبِّرِينْ مَا يَقِيفُوا فِي حَضَرَتَكْ وَ إِنْتَ تَكْرَهْ كُلَّ الْيِسَوُّوا الظُّلُمْ.

⁶ يَا اللّٰهْ! إِنْتَ تِدَمِّرْ الْكَدَّابِينْ وَ كَتَّالِينْ الدِّمَمْ وَ الْغَشَّاشِينْ، تَجْعَلْهُمْ مِثِلْ مُحَرَّمِينْ.

⁷ وَ لَاكِنْ بِرَحْمَتَكْ الْكَبِيرَةْ، أَنَا نَدْخُلْ فِي فَضَايَةْ بَيْتَكْ. وَ بِمَخَافَتَكْ، نَسْجُدْ عَلَيْ بَيْتَكْ الْمُقَدَّسْ.

⁸ يَا اللّٰهْ! قُودْنِي حَسَبْ عَدَالْتَكْ بِسَبَبْ عُدْوَانِي وَ سَهِّلْ لَيِّ دَرْبَكْ.

⁹ أَشَانْ مَا فِي شَيّءْ أَكِيدْ فِي كَلَامْهُمْ وَ قُلُوبْهُمْ مَلَانِينْ بِدَمَارْ وَ كَلَامْ خُشُومْهُمْ يِوَدِّي لِلْقَبُرْ. وَ لِسْنَيْهُمْ مَلَانِينْ بِكَلَامْ حَلُو غَشَّاشْ.

¹⁰ يَا رَبّ! أَجْعَلْهُمْ خَاطِيِّينْ وَ خَلِّيهُمْ يَقَعَوْا بِسَبَبْ مُؤآمَرَتْهُمْ! أَطْرُدْهُمْ بِسَبَبْ جَرَايِمْهُمْ الْكَتِيرِينْ أَشَانْ هُمَّنْ عِصَوْك.

¹¹ خَلَاصْ، كُلَّ الْيَلْجَأَوْا لَيْك يَفْرَحَوْا وَ دَايْماً يِزَغْرُطُوا وَ يِرَقْرُقُوا. إِنْتَ مَلْجَأْ لِلْيِحِبُّوا أُسْمَكْ وَ هُمَّنْ يِنَطُّطُوا مِنْ الْفَرَحْ.

¹² أَشَانْ إِنْتَ، يَا اللّٰهْ، تِبَارِكْ الصَّالِحْ وَ مِثِلْ دَرَقَةْ كَبِيرَةْ، تَحْمِيهْ بِنِعْمَتَكْ.