زَبُور 43 - الكتاب المقدس بالعربي الدارجي هنا تشاد

¹ يَا رَبّ! إِنْتَ بَسْ شَارِعْنِي وَ شِيلْ ضَلِيمْتِي وَ فِي الْمُنَافِقِينْ، أَنْصُرْنِي وَ مِنْ أَيِّ غَشَّاشْ وَ مُجْرِمْ، خَلِّصْنِي.

² يَا الرَّبّ، إِنْتَ مَلْجَئِي الْيَحْمِينِي. مَالَا أَبَيْتنِي؟ مَالَا خَلَّيْتنِي نَمْشِي حَزْنَانْ مِنْ مُطَارَدَةْ الْعُدْوَانْ؟

³ رَسِّلْ نُورَكْ وَ حَقَّكْ، يُقُودُونِي وَ لِجَبَلَكْ الْمُقَدَّسْ وَ مَسْكَنَكْ، يِوَدُّونِي.

⁴ وَ أَنَا نَمْشِي مَدْبَحْ إِلٰـهِي الْإِنْتَ سَبَبْ كُلَّ فَرْحِتِي وَ بِالْجِقِنْدِيَّةْ نَشْكُرَكْ، يَا رَبّ، يَا إِلٰـهِي.

⁵ مَالَا تِأَيِّسِي، يَا نَفْسِي؟ وَ مَالَا تَقِنْتِي مِنْ التَّعَبْ الْفَوْقِي؟ خُطِّي عَشَمْكِ فِي اللّٰهْ إِلٰـهِي. أَيْوَى، أَنَا نَشْكُرَهْ بَتَّانْ، هُو إِلٰـهِي الْيِنَجِّينِي.