زَبُور 41 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ

¹ مَبْرُوكْ لِلْيِفَكِّرْ فِي الضَّعِيفِينْ! فِي يَوْم الْفَسَالَةْ، اللّٰهْ يِنَجِّيهْ.

² اللّٰهْ يَحْفَضَهْ وَ يَنْطِيهْ الْحَيَاةْ وَ يِسَوِّي حَالْتَهْ عَدِيلَةْ فِي الْأَرْض وَ مَا يِسَلِّمَهْ فِي إِيدْ عُدْوَانَهْ.

³ اللّٰهْ يِسَاعِدَهْ فِي سَرِيرَهْ هَنَا التَّعَبْ وَ يِهْتَمَّا بَيَّهْ فِي فُرَاشَهْ وَكِتْ مَرْضَانْ.

⁴ وَ أَنَا قُلْت: «يَا اللّٰهْ! بِرَحْمَتَكْ أَشْفِينِي، أَشَانْ أَنَا أَعْتَرَفْت بِذَنْبِي.»

⁵ عُدْوَانِي يِحَجُّوا فَوْقِي بِالْفَسَالَةْ وَ يُقُولُوا: «مَتَى يُمُوتْ وَ أُسْمَهْ يِوَدِّرْ؟»

⁶ وَكِتْ وَاحِدْ يُزُورْنِي، هُو يِحَجِّي مَعَايِ بِكِدِبْ وَ يِفَتِّشْ يِلِمّ الْفَسَالَةْ الْفِي كَلَامِي وَ يَمْشِي يِحَجِّي بَيْهَا بَرَّا فِي الشَّوَارِعْ.

⁷ كُلَّ عُدْوَانِي يِوَسْوُسُوا سَوَا فَوْقِي وَ يِلآمَرَوْا ضِدِّي وَ يِجَهُّزُوا الْفَسَالَةْ لَيِّ وَ يُقُولُوا:

⁸ «هُو كَرَبَهْ مَرَضْ خَطِيرْ السِّيدَهْ كَنْ رَقَدْ، أَبَداً مَا يُقُمّ!»

⁹ حَتَّى رَفِيقِي الْمُنْتَكِلْ عَلَيَّهْ وَ يَاكُلْ مَعَايِ خُبْزِتِي، هُو أَنْقَلَبْ ضِدِّي.

¹⁰ لَاكِنْ إِنْتَ، يَا اللّٰهْ، بِرَحْمَتَكْ أَشْفِينِي وَ نِلْكَفَّى فَوْقهُمْ!

¹¹ كَنْ عُدْوَانِي مَا يِشَّمَّتَوْا فَوْقِي خَلَاصْ، أَنَا عِرِفْت كَدَرْ إِنْتَ فِرِحْت بَيِّ.

¹² إِنْتَ سَاعَدْتِنِي وَ شَفَيْتنِي وَ خَطَّيْتنِي قِدَّامَكْ إِلَى الْأَبَدْ.

¹³ بَارَكْ اللّٰهْ إِلٰـهْ بَنِي إِسْرَائِيلْ دَايْماً وَ إِلَى الْأَبَدْ! آمِينْ وَ آمِينْ!