زَبُور 4 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ، مَزْمُورْ لِدَاوُدْ

¹ وَكِتْ نِنَادِي، رُدّ لَيِّ، يَا إِلٰـهْ الْعَادِلْ! وَ فِي الضِّيقَةْ، سَهِّلْ لَيِّ وَ بِرَحْمَتَكْ، أَسْمَعْ صَلَاتِي.

² يَا النَّاسْ! لِمَتَى تِبَدُّلُوا شَرَفِي بِعَيْب وَ تِحِبُّوا الْمَا عِنْدَهْ فَايْدَةْ وَ تَجْرُوا وَرَاءْ الْكِدِبْ؟ وَقْفَةْ.

³ أَعَرْفُوا كَدَرْ اللّٰهْ عَزَلْ رَاجِلْ أَمِينْ لَيَّهْ، أَيْوَى، اللّٰهْ يَسْمَعْنِي وَكِتْ نِنَادِيهْ.

⁴ أَزْعَلَوْا لَاكِنْ مَا تَذْنُبُوا وَ وَكِتْ تَرُقْدُوا فِي سَرَايِرْكُو، فَكُّرُوا عَدِيلْ وَ خَلَاصْ، أَسْكُتُوا. وَقْفَةْ.

⁵ قَدُّمُوا ضَحَايَا الْمُوَافْقِينْ وَ أَتْوَكَّلَوْا عَلَيْ اللّٰهْ.

⁶ كَتِيرِينْ يُقُولُوا: «مَا فِي الْيِشَوِّفْنَا الْخَيْر.» يَا اللّٰهْ، وَجِّهْ نُورْ وِجْهَكْ عَلَيْنَا!

⁷ إِنْتَ مَلَيْت قَلْبِي بِالْفَرَحْ زِيَادَةْ مِنْ فَرَحْهُمْ وَكِتْ عِنْدُهُمْ قَمَحْ وَ خَمَرْ بِكَتَرَةْ.

⁸ وَكِتْ نَرْقُدْ، نُنُومْ بِسَلَامْ أَشَانْ إِنْتَ وِحَيْدَكْ بَسْ، يَا اللّٰهْ، تِسَكِّنِّي بِأَمَانْ.