زَبُور 21 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ

¹ يَا اللّٰهْ! الْمَلِكْ يَفْرَحْ بِقُدُرْتَكْ وَ بِنَجَاتَكْ، يِنْبَسِطْ زِيَادَةْ!

² إِنْتَ تَمَّيْت لَيَّهْ مُنَى قَلْبَهْ وَ وَكِتْ هُو طَلَبْ مِنَّكْ كُلَ، إِنْتَ مَا أَبَيْت لَيَّهْ. وَقْفَةْ.

³ أَشَانْ إِنْتَ قَرَّبْت لَيَّهْ وَ أَنْطَيْتَهْ بَرَكَةْ وَ خَيْر وَ خَطَّيْت فِي رَاسَهْ تَاجْ هَنَا دَهَبْ صَافِي.

⁴ هُو دَوَّرْ مِنَّكْ الْحَيَاةْ وَ إِنْتَ أَنْطَيْتهَا لَيَّهْ وَ سَوَّيْت أَيَّامَهْ طُوَالْ إِلَى الْأَبَدْ.

⁵ شَرَفَهْ بِقِي كَبِيرْ بِسَبَبْ نَجَاتَكْ وَ لَبَّسْتَهْ مَجْد وَ عَظَمَةْ.

⁶ أَشَانْ سَوَّيْتَهْ بَرَكَةْ إِلَى الْأَبَدْ وَ فِي حَضَرَتَكْ، يَفْرَحْ فَرَحْ كَبِيرْ.

⁷ الْمَلِكْ يِتْوَكَّلْ عَلَيْ اللّٰهْ. أَيْوَى، بِرَحْمَةْ الْعَالِي، أَبَداً مَا يِتَّرْتَعْ.

⁸ يَا رَبّ! إِيدَكْ تَلْحَقْ كُلَّ عُدْوَانَكْ وَ إِيدَكْ الزَّيْنَةْ تَلْحَقْ الْيَكْرَهَوْك.

⁹ تِسَوِّيهُمْ يَبْقَوْا مِثِلْ نَارْ مُحْرِقَةْ يَوْم تِبَيِّنْ وِجْهَكْ لَيْهُمْ. وَ بِغَضَبَكْ، يَا اللّٰهْ، تِدَمِّرْهُمْ وَ النَّارْ تَاكُلْهُمْ.

¹⁰ تُقُشّ عِيَالْهُمْ مِنْ الْأَرْض وَ ذُرِّيِّتْهُمْ مِنْ بَيْن النَّاسْ.

¹¹ وَ كَنْ يِدَوْرُوا يِسَوُّوا لَيْك شَيّءْ فَسِلْ وَلَّا يِلآمَرَوْا ضِدَّكْ كُلَ، مَا يَقْدَرَوْا.

¹² أَشَانْ إِنْتَ تَطْرُدْهُمْ وَ بِنَشَاشِيبَكْ، تَضْرُبْهُمْ.

¹³ يَا اللّٰهْ! قُمّ بِكُلَّ قُدُرْتَكْ! أَنِحْنَ نِغَنُّوا قُوَّتَكْ بِشِعِرْ!