زَبُور 16 - الكتاب المقدس بالعربي الدارجي هنا تشاد

شِعِرْ لِدَاوُدْ

¹ يَا إِلٰـهِي! أَحْفَضْنِي أَشَانْ أَنَا لَجَأْت لَيْك.

² أَنَا قُلْت لِلّٰهْ: «إِنْتَ بَسْ رَبِّي! مَا عِنْدِي خَيْر بَلَاكْ إِنْتَ!»

³ الصَّالِحِينْ الْقَاعِدِينْ فِي الْبَلَدْ، هُمَّنْ دَوْل قَوِيِّينْ وَ أَنَا نَفْرَحْ بَيْهُمْ زِيَادَةْ.

⁴ وَ لَاكِنْ الْيِفَتُّشُوا رِضَى الْإِلٰـهَاتْ الْآخَرِينْ يِجِيبُوا لِنُفُوسْهُمْ تَعَبْ. أَنَا مَا نِشَارِكْ فِي قَدِّمِينْ هَدَايَاهُمْ هَنَا الدَّمّ وَ فِي خَشْمِي، مَا نِجِيبْ أُسُمْ إِلٰـهَاتْهُمْ.

⁵ يَا اللّٰهْ! إِنْتَ قِسْمِي وَ نَصِيبِي وَ كَاسْ شَرَابِي وَ إِنْتَ بَسْ تِقَرِّرْ كِكَّيْف أَنَا نِعِيشْ فِي دَرْبَكْ.

⁶ فِي أَحْسَنْ بَكَانْ، وَقَعْ قِسْمِي وَ وَرَثَتِي اللِّقِيتْهَا سَمْحَةْ زِيَادَةْ.

⁷ بَارَكْ اللّٰهْ الْيِوَصِّينِي وَ حَتَّى بِاللَّيْل، نَفْسِي تِذَكِّرْنِي.

⁸ أَنَا دَايْماً نِقَدِّمْ اللّٰهْ وَ مَا نِتَّرْتَعْ أَشَانْ هُو قَاعِدْ بِزَيْنَايْتِي.

⁹ وَ فِي شَانْ دَا، قَلْبِي يَفْرَحْ وَ نَفْسِي تِنْبَسِطْ وَ جِسْمِي قَاعِدْ بِأَمَانْ.

¹⁰ أَشَانْ إِنْتَ مَا تِخَلِّينِي لِلْمَوْت وَ مَا تِوَدِّينِي الْقَبُرْ، أَنَا الْمُؤمِنْ بَيْك.

¹¹ إِنْتَ عَرَّفْتِنِي دَرِبْ الْحَيَاةْ وَ قِدَّامَكْ، الْفَرَحْ قَاعِدْ بِكَتَرَةْ وَ النِّعْمَةْ قَاعِدَةْ دَايْمَةْ فِي زَيْنَايْتَكْ.