زَبُور 142 - الكتاب المقدس بالعربي الدارجي هنا تشاد

تَعْلِيمْ مِنْ دَاوُدْ، وَكِتْ هُو قَاعِدْ فِي لُبّ الْكَرْكُورْ، صَلَاةْ

¹ أَنَا رَفَعْت حِسِّي وَ صَرَخْت لِلّٰهْ أَيْوَى، أَنَا رَفَعْت حِسِّي وَ شَحَدْتَهْ.

² قِدَّامَهْ هُو، أَنَا جِبْت شَكْوِتِي وَ قِدَّامَهْ هُو، أَنَا حَجَّيْت بِضِيقْتِي.

³ يَا اللّٰهْ! وَكِتْ تَغْمَرْ رُوحِي، إِنْتَ تَعَرِفْ دَرْبِي. فِي دَرْبِي النَّمْشِي فَوْقَهْ، كَجَّوْا لَيِّ شَرَكْ.

⁴ أَنْظُرْ بِالزَّيْنَةْ وَ شِيفْ! مَا فِي نَادُمْ الْيَعَرِفْنِي وَ مَا فِي مَلْجَأْ لَيِّ وَ مَا فِي الْيِهِمّ بِحَيَاتِي.

⁵ يَا اللّٰهْ! أَنَا كَوْرَكْت لَيْك وَ قُلْت: «إِنْتَ بَسْ مَلْجَئِي! وَ فِي أَرْض الْحَيِّينْ، إِنْتَ بَسْ قِسْمِي!»

⁶ أَسْمَعْ سُؤَالِي أَشَانْ أَنَا ضِعِفْت مَرَّةْ وَاحِدْ. نَجِّينِي مِنْ الْيِطَارُدُونِي أَشَانْ هُمَّنْ شُدَادْ مِنِّي!

⁷ أَمْرُقْنِي مِنْ السِّجِنْ أَشَانْ نَشْكُرْ أُسْمَكْ. وَ الصَّالِحِينْ يِحَوُّقُونِي وَكِتْ إِنْتَ تِسَوِّي لَيِّ الْخَيْر.