زَبُور 141 - الكتاب المقدس بالعربي الدارجي هنا تشاد

مَزْمُورْ لِدَاوُدْ

¹ يَا اللّٰهْ، أَنَا نَادَيْتَكْ. رُدّ لَيِّ بِسُرْعَةْ! خُطّ أَدَانَكْ لَيِّ وَكِتْ نِنَادِيكْ.

² خَلِّي صَلَاتِي تَبْقَى مِثِلْ بَخُورْ الْيِقَدُّمُوهْ لَيْك وَ إِيدَيْنِي الْمَرْفُوعِينْ لَيْك يَبْقَوْا مِثِلْ هَدِيَّةْ الْعَشِيَّةْ.

³ يَا اللّٰهْ! خُطّ حَرَسْ لِخَشْمِي وَ أَحْفَضْ لِسَانِي.

⁴ أَحْفَضْ قَلْبِي مَا يَكْرُبْ كَلَامْ فَسِلْ وَ نِسَوِّي أَعْمَالْ الْفَسَالَةْ مَعَ الظَّالِمِينْ وَ مَا تِخَلِّينِي نَاكُلْ أَكِلْهُمْ الْحَرَامْ.

⁵ خَلِّي الصَّالِحْ يَضْرُبْنِي وَ يُلُومْنِي! دَا خَيْر لَيِّ مِثِلْ دِهِنْ مُعَطَّرْ فِي رَاسِي وَ رَاسِي أَبَداً مَا يَابَاهْ. وَ دَايْماً نِصَلِّي ضِدّ ظَالِمِينْ.

⁶ وَكِتْ يَرْمُوا حُكَّامْهُمْ فِي قَعَرْ الْحَجَرْ، الظَّالِمِينْ يَسْمَعَوْا كَلَامِي الصَّحِيحْ:

⁷ «مِثِلْ مُرْحَاكَةْ مُكَسَّرَةْ فِي التُّرَابْ، عُضَامْنَا مُشَتَّتِينْ فِي مَدَخَلْ بَكَانْ الْمَيْتِينْ.»

⁸ يَا اللّٰهْ رَبِّي، عُيُونِي مُوَجِّهِينْ عَلَيْك. أَنَا لَجَأْت لَيْك، مَا تِخَلِّينِي نُمُوتْ!

⁹ أَحْفَضْنِي مِنْ الشَّرَكْ الْكَجَّوْه لَيِّ وَ مِنْ أَمْ كَجَّامَةْ الظَّالِمِينْ.

¹⁰ خَلِّي الْعَاصِيِينْ يَقَعَوْا فِي شَرَكْهُمْ وَ أَنَا كَمَانْ نَنْجَى.