زَبُور 13 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ

¹ لِمَتَى، يَا اللّٰهْ، تَنْسَانِي دَايْماً؟ لِمَتَى تَابَى مَا تِوَجِّهْ وِجْهَكْ عَلَيِّ؟

² لِمَتَى نَقْعُدْ بِهَمّ وَ بِحِزِنْ فِي قَلْبِي كُلَّ يَوْم؟ لِمَتَى عَدُويِ يِنَّصِرْ فَوْقِي؟

³ شِيفْ وَ رُدّ لَيِّ، يَا اللّٰهْ إِلٰـهِي! خَلِّي عُيُونِي وَاعِيِّينْ فِي الْحَيَاةْ أَشَانْ مَا نُنُومْ نَوْم الْمَوْت،

⁴ وَ عَدُويِ مَا يُقُولْ هُو أَنَّصَرْ فَوْقِي وَ خُصْمَانِي مَا يَفْرَحَوْا بِوَقَعَانِي.

⁵ لَاكِنْ أَنَا مُؤآمِنْ بِرَحْمَتَكْ وَ أَنَا فَرْحَانْ بِنَجَاتَكْ.

⁶ نِغَنِّي لِلّٰهْ أَشَانْ سَوَّى لَيِّ الْخَيْر.