زَبُور 12 - الكتاب المقدس بالعربي الدارجي هنا تشاد

وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ الْعِنْدَهَا تَمَانَةْ حَبِلْ، مَزْمُورْ لِدَاوُدْ

¹ نَجِّينِي، يَا اللّٰهْ! أَشَانْ مَا فِي صَالِحْ وَ مَا فِي إِنْسَانْ أَمِينْ فِي أُسْط النَّاسْ.

² أَيِّ وَاحِدْ يَكْدِبْ لِأَخُوهْ وَ شَلَالِيفَهْ يِحَجُّوا كَلَامْ غَشّ وَ قَلْبَهْ مَا وَاحِدْ.

³ وَ خَلِّي اللّٰهْ يِكَسِّرْ كُلِّ خَشُمْ الْيِحَجِّي بِغَشّ وَ اللِّسْنَيْ الْيِكَلُّمُوا بِإِسْتِكْبَارْ.

⁴ هُمَّنْ يُقُولُوا: «بِلِسْنَيْنَا نِنَّصُرُوا وَ خُشُومْنَا هِنَيْنَا، يَاتُو يَحْكِمْ فَوْقنَا؟»

⁵ لَاكِنْ اللّٰهْ قَالْ: «هَسَّعْ نُقُمّ وَ نِجِيبْ النَّجَاةْ لِلنَّاسْ الْمَحْقُورِينْ. أَشَانْ الْمَسَاكِينْ، ظَلَمَوْهُمْ وَ الضَّعِيفِينْ يَقُنْتُوا.»

⁶ وَ كَلَامْ اللّٰهْ صَافِي مِثِلْ الْفُضَّةْ الْقَطَعَوْهَا وَ صَفَّوْهَا سَبْعَةْ مَرَّاتْ.

⁷ يَا اللّٰهْ، إِنْتَ تَحْفَضْ الْمَظْلُومِينْ وَ تَحْمِينَا إِلَى الْأَبَدْ.

⁸ الْعَاصِيِينْ يِلِفُّوا فِي كُلَّ بَكَانْ وَكِتْ الْفَسَالَةْ تِزِيدْ أَمْبَيْن النَّاسْ.