زَبُور 11 - الكتاب المقدس بالعربي الدارجي هنا تشادوَصِيَّةْ لِكَبِيرْ الْغَنَّايِينْ: لِدَاوُدْ 1 لِلّٰهْ مَلْجَئِي. وَ بَيْدَا، مَالَا تُقُولُوا لَيِّ: «عَرِّدْ فِي جَبَلْ مِثِلْ طَيْر! 2 شِيفْ! الْعَاصِيِينْ جَبَدَوْا نُبَّالْهُمْ وَ ثَبَّتَوْا النُّشَّابْ فِي الْحَبِلْ فِي الضَّلَامْ لِيَزُرْقُوهْ فِي النَّاسْ الْقَلِبْهُمْ عَدِيلْ. 3 وَ الصَّالِحْ يَقْدَرْ يِسَوِّي شُنُو كَنْ الْأَسَاسْ أَلْهَدَّمْ؟» 4 وَ لَاكِنْ اللّٰهْ فِي بَيْتَهْ الْمُقَدَّسْ. اللّٰهْ فِي عَرْشَهْ فِي السَّمَاوَاتْ وَ يِشِيفْ وَ يِجَرِّبْ بَنِي آدَم. 5 اللّٰهْ يِجَرِّبْ الصَّالِحْ وَ الْعَاصِي وَ يَكْرَهْ الْيِحِبّ الْعُنُفْ. 6 خَلِّي اللّٰهْ يِنَزِّلْ فِي الْعَاصِيِينْ مَطَرَةْ هَنَا جَمُرْ وَ نَارْ وَ كِبْرِيتْ وَ رِيحْ مُحْرِقَةْ! أَيْوَى، دَا قِسِمْهُمْ الْقَاعِدْ يَرْجَاهُمْ. 7 أَشَانْ اللّٰهْ صَادِقْ وَ يِحِبّ عَمَلْ الْعَدِيلْ وَ النَّاسْ الصَّالِحِينْ بَسْ يِشِيفُوا وِجْهَهْ. |
La Bible en arabe tchadien © Alliance biblique du Tchad, 2019
Bible Society of Chad