زَبُور 108 - الكتاب المقدس بالعربي الدارجي هنا تشاد

غِنَيْ، مَزْمُورْ لِدَاوُدْ

¹ يَا رَبّ، قَلْبِي ثَابِتْ. أَنَا نِغَنِّي لَيْك وَ نَمْدَحَكْ بِكُلَّ قَلْبِي، يَا اللّٰهْ!

² أَقْعُدُوا وَاعِيِّينْ، يَا أَمْ سِبَيْبَةْ وَ الْجِقِنْدِيَّةْ! أَنَا نِوَعِّي الشَّقَاقْ.

³ يَا اللّٰهْ! أَنَا نَشْكُرَكْ فِي أُسْط الشُّعُوبْ وَ نَمْدَحَكْ فِي أُسْط الْأُمَمْ.

⁴ أَشَانْ رَحْمَتَكْ كَبِيرَةْ مِنْ السَّمَاءْ وَ أَمَانَكْ لِحِقْ لَحَدِّي السَّحَابْ.

⁵ يَا رَبّ، وَصِّفْ عَظَمَتَكْ فِي السَّمَاءْ وَ وَصِّفْ مَجْدَكْ فِي كُلَّ الْأَرْض.

⁶ رُدّ لَيْنَا! وَ بِإِيدَكْ الزَّيْنَةْ، نَجِّينَا أَشَانْ مَحْبُوبِينَكْ يَلْقَوْا النَّجَاةْ.

⁷ الرَّبّ كَلَّمْ فِي بَكَانَهْ الْمُقَدَّسْ: «أَنَا نِنْبَسِطْ! وَ نِقَسِّمْ حِلَّةْ شَكِيمْ وَ نِقَاوِسْ وَادِي سُكُّوتْ.

⁸ تُرَابْ قِلْعَادْ لَيِّ وَ أَرْض مَنَسَّى كُلَ لَيِّ. وَ أَرْض أَفْرَايِمْ مِثِلْ طَاقِيَّةْ التَّحْمِي رَاسِي وَ بَلَدْ يَهُوذَا مِثِلْ عَصَاةْ مُلْكِي.

⁹ بَلَدْ مُوَابْ مِثِلْ مَاعُونْ بَرُودِي وَ بَلَدْ أَدَوْم مِثِلْ بَكَانْ النَّزْقُلْ فَوْقَهْ نَعَالِي. وَ ضِدّ بَلَدْ الْفِلِسْطِيِّينْ، نِكَوْرِكْ كُرَوْرَاكْ الْحَرِبْ!»

¹⁰ يَاتُو الْيِوَدِّينِي لِلْمَدِينَةْ الْقَوِيَّةْ؟ يَاتُو الْيُقُودْنِي لَحَدِّي بَلَدْ أَدَوْم؟

¹¹ مَا إِنْتَ، الْإِلٰـهْ الطَّرَدْتِنَا وَلَّا؟ مَا إِنْتَ، الرَّبّ الْأَبَى مَا يَمْرُقْ مَعَ عَسْكَرْنَا وَلَّا؟

¹² تَعَالْ! سَاعِدْنَا ضِدّ عَدُونَا أَشَانْ فَزَعْ الْإِنْسَانْ مَا مَضْمُونْ.

¹³ وَ لَاكِنْ مَعَ الرَّبّ، نَلْقَوْا الْقُدْرَةْ وَ هُو بَسْ يِفَجِّقْ عُدْوَانَّا.