زَبُور 10 - الكتاب المقدس بالعربي الدارجي هنا تشاد

¹ مَالَا تِبَعِّدْ، يَا اللّٰهْ؟ وَ مَالَا مَا تِبِينْ فِي وَكْت الضِّيقَةْ؟

² بِإِسْتِكْبَارَهْ، الْعَاصِي يِدَمِّرْ الْمِسْكِينْ. الْمِسْكِينْ يَقَعْ فِي خِطِّتَهْ الْفَسْلَةْ.

³ أَشَانْ الْعَاصِي فَرْحَانْ بِطَمَعَهْ وَ وَكِتْ يِوَصِّلْ هَدَفَهْ، هُو يِعَيِّرْ اللّٰهْ.

⁴ الْعَاصِي الْمُسْتَكْبِرْ مَا يِفَتِّشَهْ وَ يُقُولْ: «مَا فِي إِلٰـهْ!» وَ دَا بَسْ كُلَّ فِكْرَهْ.

⁵ دُرُوبْ الْعَاصِي يَنْجَحَوْا فِي كُلَّ وَكِتْ، شَرِيعْتَكْ بَعِيدْ مِنْ فِكْرَهْ وَ هُو يَبْزُقْ فِي كُلَّ عُدْوَانَهْ.

⁶ وَ يُقُولْ فِي نَفْسَهْ: «أَنَا مَا نِلْبَرْجَلْ وَ أَنَا مَحْفُوضْ دَايْماً مِنْ الْفَسَالَةْ.»

⁷ وَ كَلَامَهْ إِلَّا لَعَنَةْ وَ غَشّ وَ عُنُفْ وَ فِي لِسَانَهْ، تَعَبْ وَ فَسَالَةْ.

⁸ هُو كَارِسْ جَنْب الْحِلَّةْ وَ بِعَشِيرْ، يَكْتُلْ الْبَرِي وَ يُخُطّ عُيُونَهْ فِي الضَّعِيفْ.

⁹ هُو كَارِسْ فِي بَكَانْ طَرَفْ مِثِلْ دُودْ فِي نُقُرْتَهْ. هُو كَارِسْ لِيِغَفِّلْ الْمِسْكِينْ وَ يَكْرُبْ الْمِسْكِينْ وَ يَرْمِيهْ فِي شَرَكَهْ.

¹⁰ هُو مِثِلْ دُودْ، يَبْرُكْ وَ يَحْبِي. وَ الْمِسْكِينْ يَقَعْ تِحِتْ خَنَافْرَهْ الْقَوِيِّينْ.

¹¹ وَ الْعَاصِي يُقُولْ فِي نَفْسَهْ: «الرَّبّ يَنْسَى وَ مَا يِدَوْر يَعَرِفْ شَيّءْ وَ بَتَّانْ مَا يِشِيفْ شَيّءْ!»

¹² قُمّ، يَا اللّٰهْ! يَا رَبّ، أَرْفَعْ إِيدَكْ! مَا تَنْسَى الْمَسَاكِينْ!

¹³ مَالَا الْعَاصِي يِعَيِّرْ الرَّبّ؟ وَ مَالَا يُقُولْ فِي نَفْسَهْ: «إِنْتَ مَا تِعَاقِبْ!»

¹⁴ وَ لَاكِنْ، يَا رَبّ، إِنْتَ شِفْت وَ قَاعِدْ تِشِيفْ التَّعْبَانِينْ وَ الْحَزْنَانِينْ لِتِدَافِعْ لَيْهُمْ. الضَّعِيفْ يِتْوَكَّلْ عَلَيْك وَ إِنْتَ بَسْ التَّفْزَعْ الْأَتِيمْ.

¹⁵ أَكْسِرْ دُرَاعْ الْعَاصِي! وَ عَاقِبَهْ فِي فَسَالْتَهْ لَحَدِّي فَسَالْتَهْ دِي تَبْقَى مَا فِيهَا!

¹⁶ اللّٰهْ مَلِكْ إِلَى الْأَبَدْ وَ الْأُمَمْ يِنْقَشَّوْا مِنْ بَلَدَهْ.

¹⁷ يَا اللّٰهْ، إِنْتَ سِمِعْت مُنَى الْمَسَاكِينْ وَ رَقَّدْت قُلُوبْهُمْ. إِنْتَ قَاعِدْ تَسْمَعْهُمْ

¹⁸ لِتَنْطِي الْحَقّ لِلْأَتِيمْ وَ الْمَظْلُومْ. أَشَانْ الْإِنْسَانْ الْمَخْلُوقْ مِنْ التُّرَابْ مَا يِرَجِّفْ بَتَّانْ الْآخَرِينْ.