فِلِبِّي 3 - الكتاب المقدس بالعربي الدارجي هنا تشاد

الطهورة الصحيحة

¹ وَ خَلَاصْ، يَا أَخْوَانِي، أَفْرَحَوْا بِرَبِّنَا عِيسَى. مَا قَاسِي لَيِّ نَكْتِبْ لَيْكُو نَفْس الشَّيّءْ الْأَوَّلْ أَوْرَيْتكُو بَيَّهْ وَ نِكَرِّرَهْ بَتَّانْ أَشَانْ دَا يَبْقَى لَيْكُو أَكِيدْ.

² أَوْعُوا بَالْكُو مِنْ الْكُلابْ! هُمَّنْ الْيِسَوُّوا الشَّرّ. يَفْرَحَوْا بِقَطِعِينْ مِنْ الْجِسِمْ وَ نُقُولْ لَيْكُو بَتَّانْ أَوْعُوا بَالْكُو مِنْهُمْ!

³ يُقُولُوا هُمَّنْ الْمُطَهَّرِينْ. لَاكِنْ أَنِحْنَ بَسْ النَّاسْ الْمُطَهَّرِينْ بِالصَّحِيحْ، أَنِحْنَ النَّعَبُدُوا اللّٰهْ بِقُدْرَةْ الرُّوحْ الْقُدُّوسْ. وَ نِفَاشُرُوا بِالْمَسِيحْ عِيسَى وَ أَبَداً مَا نِنْتَكْلُوا عَلَيْ جِلِدْنَا.

⁴ وَ حَسَبْ كَلَامْهُمْ، أَنَا عِنْدِي حَقّ نِنْتَكِلْ عَلَيْ جِلْدِي. أَيِّ نَادُمْ الْيُقُولْ هُو عِنْدَهْ حَقّ يِنْتَكِلْ عَلَيْ جِلْدَهْ، أَنَا عِنْدِي حَقّ زِيَادَةْ مِنَّهْ.

⁵ أَنَا طَهَّرَوْنِي فِي الْيَوْم التَّامِنْ مِنْ يَوْم وِلْدَوْنِي. وَ أَنَا مِنْ ذُرِّيَّةْ بَنِي إِسْرَائِيلْ وَ مِنْ قَبِيلَةْ بَنْيَامِينْ. أَنَا عِبْرَانِي مِيَةْ فِي الْمِيَةْ. وَ فِي الشَّيّءْ الْبُخُصّ طَبِّقِينْ شُرُوطْ التَّوْرَاةْ، أَنَا مِنْ طَرِيقَةْ الْفَرِيزِيَّةْ.

⁶ وَ أَنَا بِقِيتْ مُنْكَرِبْ بِلْحَيْن فِي دِينِي الْيَهُودِي لَحَدِّي حَاوَلْت نِدَمِّرْ أُمَّةْ الْمَسِيحْ. وَ حَسَبْ كَلَامْهُمْ فِي شُرُوطْ التَّوْرَاةْ، أَنَا بِقِيتْ نَادُمْ صَالِحْ وَ مَا عِنْدِي عَيْب.

المسيح أخَيْر من كل شيّء

⁷ لَاكِنْ كُلَّ شَيّءْ الْأَوَّلْ جَعَلْتَهْ هُو عِنْدَهْ فَايْدَةْ دَا، أَنَا خَلَّيْتَهْ مِنِّي وَ جَعَلْتَهْ مِثِلْ شَيّءْ سَاكِتْ فِي شَانْ الْمَسِيحْ.

⁸ أَيْوَى وَ زِيَادَةْ مِنْ دَا، عِرْفَةْ الْمَسِيحْ عِيسَى رَبِّي بِقَتْ لَيِّ أَخَيْر مِنْ كُلَّ شَيّءْ وَ نَجْعَلْ كُلَّ شَيّءْ آخَرْ سَاكِتْ. فِي شَانْ الْمَسِيحْ، أَنَا خَلَّيْت كُلَّ شَيّءْ الْعِنْدِي. وَ كُلَّ شَيّءْ الْأَوَّلْ عِنْدَهْ لَيِّ فَايْدَةْ، جَعَلْتَهْ مِثِلْ وَسَخْ أَشَانْ نَلْقَى الْفَايْدَةْ الْكَبِيرَةْ وَ هِي الْعَلَاقَةْ مَعَ الْمَسِيحْ.

⁹ وَ نِدَوْر عَلَاقْتِي مَعَايَهْ تَبْقَى كَامِلَةْ. وَ بِمِثِلْ دَا، مَا نَجْعَلْ نَفْسِي صَالِحْ بِطَبِّقِينْ شُرُوطْ التَّوْرَاةْ لَاكِنْ نَبْقَى صَالِحْ بِإِيمَانِي بِالْمَسِيحْ أَشَانْ الدَّرِبْ الْاللّٰهْ يِسَوِّي بَيَّهْ النَّاسْ صَالِحِينْ، هُو دَرِبْ الْإِيمَانْ.

¹⁰ وَ نِجَاهِدْ أَشَانْ نَعَرِفْ الْمَسِيحْ تَمَامْ وَ نِعِيشْ بِقُدْرَةْ بُعَاثَهْ وَ نِشَارِكْ مَعَايَهْ فِي تَعَبَهْ. وَ نِدَوْر نَبْقَى مِثِلْ هُو بِقِي فِي مَوْتَهْ

¹¹ وَ خَلَاصْ بِأَيِّ دَلِيلْ، نَلْحَقْ فِي الأَخِيرْ بُعَاثْ الْمَيْتِينْ.

¹² وَ مَا نُقُولْ تَمَّيْت مَقْصُودِي خَلَاصْ وَ بِقِيتْ نَادُمْ تَمَامْ. لَاكِنْ أَنَا نِجَاهِدْ لِنَمُلْكَهْ أَشَانْ الْمَسِيحْ عِيسَى مَلَّكَانِي لِنَمْلُكْ الْمَقْصُودْ دَا.

مَثَل بُولُس

¹³ يَا أَخْوَانِي، أَبَداً مَا نُخُطّ فِي فِكْرِي كَدَرْ أَنَا مَلَكْت الْمَقْصُودْ خَلَاصْ. لَاكِنْ نِسَوِّي شَيّءْ وَاحِدْ بَسْ، نَنْسَى الْوَرَاءْ وَ نِفَكِّرْ فِي الْقِدَّامْ.

¹⁴ وَ نِجَاهِدْ أَشَانْ نِتَمِّمْ الْمَقْصُودْ وَ نَلْقَى الْجَائِزَةْ وَ هِي الْبَرَكَةْ الْاللّٰهْ يِدَوْر يَنْطِيهَا لِلنَّاسْ النَّادَاهُمْ فِي مَجْدَهْ بِالْمَسِيحْ عِيسَى.

¹⁵ وَ خَلَاصْ، خَلِّي كُلِّنَا الْبِقِينَا قَوِيِّينْ فِي الْإِيمَانْ نِتَابُعُوا نَفْس الْفِكِرْ. وَ كَنْ فِكِرْكُو شِقْ مِنْ الْفِكِرْ دَا، خَلِّي دَا كُلَ اللّٰهْ يِوَصِّفَهْ لَيْكُو.

¹⁶ خَلِّي أَيِّ وَاحِدْ يِعِيشْ حَسَبْ مَعْرَفَةْ الْمَسِيحْ اللِّقِيهَا وَ يَمْشِي قِدَّامْ.

¹⁷ يَا أَخْوَانِي، خَلِّي كُلُّكُو تِتَابُعُوا مَثَلِي وَ شِيفُوا عَدِيلْ النَّاسْ الْعَايْشِينْ مِثِلْنَا وَ فَكُّرُوا فِي حَالْهُمْ.

¹⁸ وَ قُلْت الْكَلَامْ دَا أَشَانْ فِي نَاسْ كَتِيرِينْ يِسَوُّوا نُفُوسْهُمْ عَدُو لِصَلِيبْ الْمَسِيحْ مِثِلْ أَوْرَيْتكُو بَيَّهْ عِدَّةْ مَرَّاتْ. وَ بَتَّانْ نِأَوْرِيكُو بَيَّهْ بِحِزِنْ شَدِيدْ وَ دُمُوعْ.

¹⁹ وَ فِي الأَخِيرْ، هُمَّنْ يَمْشُوا فِي الْهَلَاكْ. بُطُونْهُمْ بِقَوْا لَيْهُمْ رَبُّهُمْ وَ أَشَانْ دَا، يِتَابُعُوا شَهْوَاتْهُمْ بَسْ. الشَّيّءْ الْيِعَيِّبْهُمْ، دَا بَسْ الْيِفَاشُرُوا بَيَّهْ. وَ عُقُولْهُمْ ثَابْتِينْ فِي خُمَامْ الدُّنْيَا بَسْ.

²⁰ لَاكِنْ جِنْسِيِّتْنَا أَنِحْنَ، هِي الْجِنْسِيَّةْ السَّمَاوِيَّةْ. وَ أَنِحْنَ نَرْجَوْا مُنَجِّينَا الْيَجِي مِنْ السَّمَاءْ وَ خَاطِّينْ بَالْنَا فِي جَيْتَهْ وَ هُو رَبِّنَا عِيسَى الْمَسِيحْ.

²¹ وَ بِقُدُرْتَهْ الْعَظِيمَةْ الْيُخُطّ بَيْهَا كُلَّ شَيّءْ تِحِتْ حُكْمَهْ، هُو يَجِي يِغَيِّرْ جِسِمْنَا الضَّعِيفْ وَ يَجْعَلَهْ مِثِلْ جِسْمَهْ هُو الْمَجِيدْ.