فِلِبِّي 1 - الكتاب المقدس بالعربي الدارجي هنا تشاد

¹ جَوَابْ مِنِّي أَنَا بُولُسْ وَ تِمُوتَاوُسْ عَبِيدْ عِيسَى الْمَسِيحْ، لَيْكُو إِنْتُو كُلُّكُو الْبِقِيتُوا صَالِحِينْ بِعِيسَى الْمَسِيحْ الْفِي حِلَّةْ فِلِبِّي مَعَ مَسَائِيلْكُو وَ مُعَاوِنِينْهُمْ.

² عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.

دُعا الرسول و شُكْره

³ فِي أَيِّ وَكِتْ كَنْ فَكَّرْت لَيْكُو، نَشْكُرْ اللّٰهْ رَبِّي.

⁴ وَ أَيِّ وَكِتْ نِصَلِّي لِلّٰهْ، نَسْأَلَهْ لَيْكُو كُلُّكُو بِفَرَحْ.

⁵ أَنَا فَرْحَانْ مِنْكُو أَشَانْ إِنْتُو شَارَكْتُوا مَعَايِ فِي بَلِّغِينْ بِشَارَةْ الْمَسِيحْ مِنْ أَوَّلْ وَكِتْ أَنَا جِيتْ لَيْكُو لَحَدِّي الْيَوْم.

⁶ وَ أَنَا مُؤَكِّدْ كَدَرْ اللّٰهْ، الْبَدَا خِدِمْتَهْ الْعَدِيلَةْ فَوْقكُو، هُو يِسَوِّيهَا دَايْماً لَحَدِّي يِتَمِّمْهَا فِي يَوْم جَيَّةْ الْمَسِيحْ عِيسَى.

⁷ وَ وَاجِبْ لَيِّ نِحِسّ بَيْكُو كُلُّكُو مِثِلْ دَا أَشَانْ قَلْبِي دَايْماً مَعَاكُو. وَ نِحِبُّكُو أَشَانْ إِنْتُو كُلُّكُو مُشَارِكِينْ مَعَايِ فِي نِعْمَةْ اللّٰهْ. وَ إِنْتُو دَايْماً مُشَارِكِينْ مَعَايِ وَكِتْ أَنَا قَاعِدْ مُجَنْزَرْ فِي السِّجِنْ وَ وَكِتْ أَنَا قَاعِدْ نِدَافِعْ لِبِشَارَةْ الْمَسِيحْ وَ نِثَبِّتْهَا لِلنَّاسْ.

⁸ وَ اللّٰهْ يَشْهَدْ لَيِّ، أَنَا قَرْمَانْ بِلْحَيْن لَيْكُو كُلُّكُو بِمَحَبَّةْ الْمَسِيحْ عِيسَى.

⁹ وَ أَنَا قَاعِدْ نَسْأَلْ اللّٰهْ أَشَانْ هُو يِزِيدْ مَحَبِّتْكُو وَ يِكَتِّرْهَا لَيْكُو بِزِيَادَةْ. وَ خَلِّي يَنْطِيكُو مَعَاهَا عِلِمْ وَ فِهِمْ تَمَامْ

¹⁰ أَشَانْ تَعَرْفُوا كِكَّيْف تِمَيُّزُوا دَايْماً الشَّيّءْ الْأَفْضَلْ. وَ خَلَاصْ تِعِيشُوا بِنِيَّةْ مُخْلِصَةْ وَ بَلَا عَيْب وَ تَبْقَوْا جَاهِزِينْ لِلْيَوْم الْيَجِي فَوْقَهْ الْمَسِيحْ.

¹¹ وَ تَبْقَوْا صَالِحِينْ وَ مَلَانِينْ بِالْخَيْر الْجَايِ مِنْ عِيسَى الْمَسِيحْ. وَ خَلَاصْ، الْمَجْد وَ الشُّكُرْ لِلّٰهْ.

بلِّغين البِشارة للناس

¹² يَا أَخْوَانِي، نِدَوْر إِنْتُو تَعَرْفُوا كَدَرْ التَّعَبْ اللِّحِقَانِي هِنِي سَاعَدْ بِشَارَةْ الْمَسِيحْ وَ هِي أَلْوَسَّعَتْ زِيَادَةْ.

¹³ أَشَانْ بِقِي وَاضِحْ لِكُلَّ عَسْكَرْ هَنَا قَصِرْ الْوَالِي وَ لِكُلَّ النَّاسْ الْآخَرِينْ كَدَرْ أَنَا مَسْجُونْ فِي شَانْ أَنَا عَبْد الْمَسِيحْ.

¹⁴ وَ فِي السِّجِنْ، أَنَا بِقِيتْ مَثَلْ لِلْأَخْوَانْ الْفِي الْحِلَّةْ دِي. وَ كَتِيرِينْ مِنْهُمْ عَشَمْهُمْ فِي رَبِّنَا بِقِي قَوِي زِيَادَةْ. وَ لِقَوْا شَجَاعَةْ لَحَدِّي قَمَّوْا يِحَجُّوا بِكَلَامْ اللّٰهْ بَلَا خَوْف.

¹⁵ صَحِيحْ، وَاحِدِينْ مِنْهُمْ قَاعِدِينْ يِبَشُّرُوا بِالْمَسِيحْ وَ دَا، أَشَانْ يَحْسُدُونِي وَ يِخَاصُمُونِي لَاكِنْ آخَرِينْ يِبَشُّرُوا بِنِيَّةْ عَدِيلَةْ.

¹⁶ الْأَخْوَانْ دَوْل يِبَشُّرُوا أَشَانْ يِحِبُّونِي وَ يَعَرْفُوا اللّٰهْ جَابَانِي هِنِي أَشَانْ نِدَافِعْ لِلْبِشَارَةْ.

¹⁷ وَ لَاكِنْ الْحَسُودِينْ دَوْل يِبَلُّغُوا بِالْمَسِيحْ بِنِيَّةْ مَا مُخْلِصَةْ. يِدَوْرُوا يُخُطُّوا نُفُوسْهُمْ قِدَّامْ. وَ فِي فِكِرْهُمْ، بَلِّغِينْهُمْ يَبْقَى لَيِّ قَاسِي وَكِتْ أَنَا مُجَنْزَرْ فِي السِّجِنْ.

¹⁸ وَ كَنْ لَيِّ أَنَا، دَا مَا يِسَوِّي لَيِّ شَيّءْ. كَنْ نِيِّتْهُمْ فَسْلَةْ وَلَّا نِيِّتْهُمْ عَدِيلَةْ كُلَ، بِأَيِّ طَرِيقَةْ هُمَّنْ قَاعِدِينْ يِبَلُّغُوا كَلَامْ الْمَسِيحْ وَ بَيْدَا، أَنَا فَرْحَانْ. أَيْوَى، بَتَّانْ كُلَ نَفْرَحْ

¹⁹ أَشَانْ نَعَرِفْ كَدَرْ اللّٰهْ يِنَجِّينِي وَ دَا بِسَبَبْ إِنْتُو قَاعِدِينْ تَسْأَلَوْه لَيِّ وَ رُوحْ عِيسَى الْمَسِيحْ يِعَاوِنِّي.

حالة الرسول القاسية

²⁰ وَ نِتْمَنَّى بِنِيَّةْ وَاحِدَةْ وَ بِعَشَمْ قَوِي كَدَرْ مَا نَفْشُلْ فِي أَيِّ شَيّءْ. وَ نِدَوْر نِكَلِّمْ مِثِلْ دَايْماً كَلَّمْت بِشَجَاعَةْ وَ بَلَا خَوْف وَ نِعَظِّمْ الْمَسِيحْ قِدَّامْ النَّاسْ فِي كُلَّ حَيَاتِي، كَنْ نِعِيشْ وَلَّا نُمُوتْ كُلَ.

²¹ أَشَانْ لَيِّ أَنَا، الْحَيَاةْ إِلَّا مَعَ الْمَسِيحْ. وَ الْمَوْت عِنْدَهْ لَيِّ فَايْدَةْ بِزِيَادَةْ.

²² وَ كَنْ اللّٰهْ يِدَوْر مَا نِفَارِقْ الدُّنْيَا دِي، خَلَاصْ أَنَا نَخْدِمْ خِدْمَةْ سَمْحَةْ لِلْمَسِيحْ. لَاكِنْ بَيْن الْحَيَاةْ وَ الْمَوْت، مَا نَعَرِفْ نِشِيلْ وَيْنُو.

²³ عِنْدِي شَهْوَاتْ إِتْنَيْن الْقَاعِدِينْ يِدَّاوَسَوْا فَوْقِي. نِدَوْر نِفَارِقْ الدُّنْيَا وَ نَقْعُدْ مَعَ الْمَسِيحْ أَشَانْ دَا بَسْ الْأَفْضَلْ.

²⁴ وَ لَاكِنْ وَاجِبْ بِزِيَادَةْ نَقْعُدْ حَيّ فِي الدُّنْيَا دِي أَشَانْ حَيَاتِي عِنْدَهَا فَايْدَةْ لَيْكُو.

²⁵ وَ دَا، بِقِي لَيِّ وَاضِحْ. كَنْ مَا نُمُوتْ يَبْقَى لَيْكُو أَخَيْر. وَ خَلَاصْ، نَعَرِفْ كَدَرْ نَقْعُدْ حَيّ مَعَاكُو سَوَا أَشَانْ إِنْتُو تَبْقَوْا قَوِيِّينْ وَ فَرْحَانِينْ فِي الْإِيمَانْ بِزِيَادَةْ.

²⁶ وَ بِمِثِلْ دَا وَكِتْ نِقَبِّلْ لَيْكُو، إِنْتُو تِفَاشُرُوا زِيَادَةْ بِعِيسَى الْمَسِيحْ بِسَبَبِي أَنَا.

الحال الواجْبة في التعب

²⁷ لَاكِنْ خَلِّي تِعِيشُوا بِالْحَالْ الْمُوَافْقَةْ لِبِشَارَةْ الْمَسِيحْ. وَ مِثِلْ دَا، كَنْ نَجِي نِشِيفْكُو وَلَّا كَنْ أَنَا بَعِيدْ مِنْكُو كُلَ، خَلَاصْ نَسْمَعْ كَلَامْ فِيكُو الْيُقُولْ إِنْتُو ثَابْتِينْ بِفِكِرْ وَاحِدْ وَ هَدَفْ وَاحِدْ وَ إِنْتُو قَاعِدِينْ تِحَارُبُوا سَوَا فِي شَانْ الْإِيمَانْ اللِّقِيتُوهْ مِنْ بِشَارَةْ الْمَسِيحْ.

²⁸ مَا تِخَلُّوا الْخَوْف يِسَوِّيكُو بِسَبَبْ أَيِّ خِدْمَةْ الْيِسَوُّوهَا النَّاسْ الْيِخَالُفُوكُو. وَ دَا يَبْقَى لَيْهُمْ عَلَامَةْ التِّوَصِّفْ كَدَرْ هُمَّنْ فِي دَرِبْ الْهَلَاكْ وَ إِنْتُو فِي دَرِبْ النَّجَاةْ. وَ الْيِنَجِّيكُو، هُو اللّٰهْ.

²⁹ أَشَانْ اللّٰهْ أَنْطَاكُو رَحْمَةْ وَ بِالرَّحْمَةْ دِي، إِنْتُو مَا تِآمُنُوا بِالْمَسِيحْ بَسْ لَاكِنْ تَتْعَبَوْا فِي شَانَهْ كُلَ.

³⁰ وَ خَلَاصْ، إِنْتُو قَاعِدِينْ تِشَارُكُوا فِي نَفْس الْحَرِبْ الْأَنَا قَاعِدْ نِحَارِبْ فَوْقَهْ. وَ الْحَرِبْ دَا، إِنْتُو شِفْتُوهْ أَوَّلْ وَكِتْ أَنَا لِسَّاعْ قَاعِدْ مَعَاكُو. وَ هَسَّعْ كُلَ، سِمِعْتُوا كَدَرْ أَنَا قَاعِدْ نِحَارِبْ مِثِلْ دَا بَتَّانْ.