عَدد 9 - الكتاب المقدس بالعربي الدارجي هنا تشاد

قوانين و شُروط عيد الْفِصْح

¹ وَ فِي الشَّهَرْ الْأَوَّلْ هَنَا السَّنَةْ التَّانِيَةْ بَعَدْ بَنِي إِسْرَائِيلْ مَرَقَوْا مِنْ بَلَدْ مَصِرْ، اللّٰهْ حَجَّى لِمُوسَى فِي صَحَرَاء سِينَاء وَ قَالْ:

² «قُولْ لِبَنِي إِسْرَائِيلْ يِعَيُّدُوا عِيدْ الْفِصْحَ فِي الْوَكِتْ الْمُحَدَّدْ لَيَّهْ.

³ وَ فِي يَوْم 14 هَنَا الشَّهَرْ دَا، فِي الْمَغْرِبْ، إِنْتُو تِعَيُّدُوا الْعِيدْ دَا فِي الْوَكِتْ الْمُحَدَّدْ لَيَّهْ حَسَبْ كُلَّ قَوَانِينَهْ وَ شُرُوطَهْ.»

⁴ وَ مُوسَى قَالْ لِبَنِي إِسْرَائِيلْ يِعَيُّدُوا عِيدْ الْفِصْحَ.

⁵ وَ فِي صَحَرَاء سِينَاء، بَنِي إِسْرَائِيلْ عَيَّدَوْا الْعِيدْ دَا فِي يَوْم 14 هَنَا الشَّهَرْ الْأَوَّلْ فِي الْمَغْرِبْ. وَ هُمَّنْ سَوَّوْا كُلَّ شَيّءْ مِثِلْ اللّٰهْ أَمَرْ بَيَّهْ مُوسَى.

⁶ وَ لَاكِنْ فِي الْيَوْم دَا، فِي نَاسْ وَاحِدِينْ لِمْسَوْا جَنَازَةْ وَ نَجَّسَوْا نُفُوسْهُمْ. وَ فِي شَانْ دَا، هُمَّنْ مَا يَقْدَرَوْا يِعَيُّدُوا الْعِيدْ فِي الْيَوْم دَا. وَ خَلَاصْ النَّاسْ دَوْل جَوْا قِدَّامْ مُوسَى وَ هَارُونْ فِي نَفْس الْيَوْم

⁷ وَ قَالَوْا: «صَحِيحْ أَنِحْنَ مَا طَاهِرِينْ بِسَبَبْ لِمِسْنَا جَنَازَةْ. لَاكِنْ مَالَا مَا نَقْدَرَوْا نِقَدُّمُوا هَدِيَّةْ لِلّٰهْ فِي الْوَكِتْ الْمُحَدَّدْ مِثِلْ بَنِي إِسْرَائِيلْ الْآخَرِينْ؟»

⁸ وَ مُوسَى قَالْ لَيْهُمْ: «أَرْجَوْنِي لَحَدِّي اللّٰهْ يَنْطِينِي أَمُرْ فِي شَانْكُو.»

⁹ وَ اللّٰهْ حَجَّى لِمُوسَى وَ قَالْ:

¹⁰ «قُولْ لِبَنِي إِسْرَائِيلْ، هُمَّنْ وَ كُلَّ ذُرِّيَّاتْهُمْ كَنْ نَاسْ مِنْهُمْ مَا طَاهِرِينْ بِسَبَبْ لِمْسَوْا جَنَازَةْ أَوْ مُسَافِرِينْ بَعِيدْ كُلَ، خَلِّي يِعَيُّدُوا عِيدْ الْفِصْحَ لِلّٰهْ.

¹¹ وَ لَاكِنْ هُمَّنْ دَوْل وَاجِبْ يِعَيُّدُوا الْعِيدْ دَا بِتَأخِيرْ يَعْنِي فِي يَوْم 14 هَنَا الشَّهَرْ التَّانِي فِي الْمَغْرِبْ. وَ يَاكُلُوا الْحَمَلْ وَ الْخُبْزَةْ بَلَا تَوَّارَةْ وَ الْخَضَارْ الْمُرّ.

¹² وَ مَا يِفَضُّلُوا شَيّءْ مِنْ الْأَكِلْ دَا يَقْعُدْ لَحَدِّي فَجُرْ. وَ مَا يَكْسُرُوا عَضُمْ مِنْ لَحَمْ الْحَمَلْ. وَ يِعَيُّدُوا عِيدْ الْفِصْحَ حَسَبْ قَانُونَهْ سَوَا سَوَا.

¹³ «وَ لَاكِنْ كَنْ نَادُمْ طَاهِرْ وَ مَا مُسَافِرْ وَ أَبَى مَا يِعَيِّدْ عِيدْ الْفِصْحَ، النَّادُمْ دَا وَاجِبْ يَفْصُلُوهْ مِنْ أَهَلَهْ بِسَبَبْ هُو مَا قَدَّمْ هَدِيَّةْ لِلّٰهْ فِي الْيَوْم الْمُحَدَّدْ. وَ النَّادُمْ دَا وَاجِبْ يِلْحَمَّلْ مَسْؤُولِيَّةْ الذَّنِبْ الْهُو سَوَّاهْ.

¹⁴ «وَ كَنْ نَادُمْ أَجْنَبِي قَاعِدْ مَعَاكُو كُلَ، خَلِّي يِعَيِّدْ عِيدْ الْفِصْحَ لِلّٰهْ حَسَبْ كُلَّ الْقَوَانِينْ وَ الشُّرُوطْ هَنَا عِيدْ الْفِصْحَ. لَيْكُو إِنْتُو الْمُوَاطِنِينْ وَ لِلْأَجْنَبِي الْمَعَاكُو كُلَ، الْقَانُونْ وَاحِدْ بَسْ.»

السحاباي و الخَيْمة

¹⁵ وَ وَكِتْ بَنَوْا خَيْمَةْ الْعِبَادَةْ، السَّحَابَايْ نَزَلَتْ وَ غَطَّتْ الْخَيْمَةْ وَ دِي الْخَيْمَةْ الْفَوْقهَا الصَّنْدُوقْ الْعِنْدَهْ لِيحَانْ الْمُعَاهَدَةْ. وَ بِاللَّيْل، السَّحَابَايْ تِضَوِّي مِثِلْ النَّارْ فِي رَاسْ الْخَيْمَةْ لَحَدِّي فَجُرْ.

¹⁶ وَ السَّحَابَايْ قَاعِدَةْ دَايْماً مُغَطِّيَةْ الْخَيْمَةْ وَ بِاللَّيْل تِضَوِّي مِثِلْ النَّارْ.

¹⁷ وَ وَكِتْ السَّحَابَايْ تُقُمّ مِنْ الْخَيْمَةْ، بَنِي إِسْرَائِيلْ يِسِيرُوا. وَ وَكِتْ تَنْزِلْ فِي أَيِّ بَكَانْ، بَنِي إِسْرَائِيلْ يَنْزُلُوا فِي الْبَكَانْ دَا.

¹⁸ بَنِي إِسْرَائِيلْ يِسِيرُوا بِأَمُرْ اللّٰهْ وَ يَنْزُلُوا بِأَمُرْ اللّٰهْ. وَ وَكِتْ السَّحَابَايْ قَاعِدَةْ مُغَطِّيَةْ الْخَيْمَةْ، هُمَّنْ يَقْعُدُوا فِي بَكَانْهُمْ.

¹⁹ وَ كَنْ السَّحَابَايْ تَقْعُدْ تِطَوِّلْ مُغَطِّيَةْ خَيْمَةْ الْعِبَادَةْ كُلَ، بَنِي إِسْرَائِيلْ يِطِيعُوا اللّٰهْ وَ مَا يِسِيرُوا.

²⁰ حَتَّى كَانْ السَّحَابَايْ تَقْعُدْ فِي خَيْمَةْ الْعِبَادَةْ لِمُدَّةْ أَيَّامْ شِيَّةْ كُلَ، بَنِي إِسْرَائِيلْ يَقْعُدُوا بِأَمُرْ اللّٰهْ وَ يِسِيرُوا بِأَمُرْ اللّٰهْ.

²¹ وَ كَنْ السَّحَابَايْ تَقْعُدْ مِنْ عَشِيَّةْ لَحَدِّي فَجُرْ وَ تُقُمّ تَمْشِي كُلَ، هُمَّنْ يِسِيرُوا. وَ كَنْ تَقْعُدْ يَوْم وَ لَيْلَةْ وَ تُقُمّ تَمْشِي كُلَ، هُمَّنْ يِسِيرُوا.

²² وَ كَنْ السَّحَابَايْ تَقْعُدْ تِأَخِّرْ مُغَطِّيَةْ الْخَيْمَةْ مِثِلْ يَوْمَيْن أَوْ شَهَرْ أَوْ زِيَادَةْ كُلَ، بَنِي إِسْرَائِيلْ يَقْعُدُوا مَا يِسِيرُوا أَبَداً. وَ لَاكِنْ وَكِتْ السَّحَابَايْ تُقُمّ تَمْشِي، خَلَاصْ بَنِي إِسْرَائِيلْ كُلَ يِسِيرُوا.

²³ بَنِي إِسْرَائِيلْ يَنْزُلُوا بِأَمُرْ اللّٰهْ وَ يِسِيرُوا بِأَمُرْ اللّٰهْ. وَ هُمَّنْ يِطِيعُوا أَمُرْ اللّٰهْ الْهُو أَنْطَاهْ بِوَاسِطَةْ مُوسَى.