عَدد 36 - الكتاب المقدس بالعربي الدارجي هنا تشاد

زواج البنات العِنْدِهن ورثة

¹ وَ كُبَارَاتْ الْعَايِلَاتْ هَنَا خَشُمْ بَيْت قِلْعَادْ وِلَيْد مَكِيرْ وِلَيْد مَنَسَّى مِنْ خُشُومْ بُيُوتْ ذُرِّيَّةْ يُوسُفْ جَوْا قِدَّامْ مُوسَى وَ كُبَارَاتْ الْعَايِلَاتْ هَنَا بَنِي إِسْرَائِيلْ.

² وَ قَالَوْا: «اللّٰهْ أَمَرَكْ إِنْتَ سَيِّدْنَا مُوسَى تِقَسِّمْ الْبَلَدْ لِبَنِي إِسْرَائِيلْ بِأَمْ عِيَيْدَاتْ. وَ هُو أَمَرَكْ إِنْتَ تَنْطِي وَرَثَةْ أَخُونَا صَلُوفْحَدْ لِبَنَاتَهْ.

³ وَ لَاكِنْ كَنْ الْبَنَاتْ دَيْل يَاخُدَنْ رُجَالْ مِنْ قَبِيلَةْ آخَرَةْ مِنْ قَبَايِلْ بَنِي إِسْرَائِيلْ، وَرَثَتْنَا تَنْقُصْ وَ وَرَثَةْ الْقَبِيلَةْ الْآخَرَةْ تِزِيدْ. وَ بَيْدَا، وَرَثَتْنَا النَّلْقَوْهَا بِأَمْ عِيَيْدَاتْ تَنْقُصْ.

⁴ وَ فِي سَنِةْ الْحُرِّيَّةْ هَنَا بَنِي إِسْرَائِيلْ، وَرَثَتْهِنْ تِزِيدْ فِي وَرَثَةْ الْقَبِيلَةْ الْهِنَّ مُتَزَوِّجَاتْ فَوْقهَا. وَ بَيْدَا، وَرَثَةْ قَبِيلِتْنَا تَنْقُصْ.»

⁵ وَ بِأَمُرْ مِنْ اللّٰهْ، مُوسَى قَالْ لِبَنِي إِسْرَائِيلْ: «نَاسْ ذُرِّيَّةْ يُوسُفْ عِنْدُهُمْ حَقّ.

⁶ وَ دَاهُو كَلَامْ اللّٰهْ فِي سَبَبْ بَنَاتْ صَلُوفْحَدْ. هُو قَالْ: ‹هِنَّ يَاخُدَنْ أَيِّ رَاجِلْ الْيِدَوْرَنَّهْ وَ لَاكِنْ مَا يُكُونْ بَرَّا مِنْ خُشُومْ بُيُوتْ قَبِيلَةْ أَبُوهِنْ.

⁷ وَ بِمِثِلْ دَا، أَيِّ قَبِيلَةْ مِنْ بَنِي إِسْرَائِيلْ مَا تِشِيلْ وَرَثَةْ هَنَا قَبِيلَةْ آخَرَةْ. وَ أَيِّ نَادُمْ يَكْرُبْ قَوِي وَرَثَةْ قَبِيلَةْ أَبَّهَاتَهْ.

⁸ أَيِّ بِنَيَّةْ التَّلْقَى وَرَثَةْ فِي وَاحِدَةْ مِنْ قَبَايِلْ بَنِي إِسْرَائِيلْ، مَا تَاخُدْ إِلَّا فِي دَاخَلْ خُشُومْ بُيُوتْ قَبِيلَةْ أَبُوهَا. وَ بَيْدَا، بَنِي إِسْرَائِيلْ يَقْدَرَوْا يَحْفَضَوْا وَرَثَةْ أَبَّهَاتْهُمْ. أَيِّ وَاحِدْ يَحْفَضْ حَقَّهْ.

⁹ وَ بَيْدَا، الْوَرَثَةْ هَنَا قَبِيلَةْ وَاحِدَةْ مَا يَنْطُوهَا لِقَبِيلَةْ آخَرَةْ وَ لَاكِنْ قَبَايِلْ بَنِي إِسْرَائِيلْ، أَيِّ وَاحِدَةْ تِتْمَسَّكْ بِوَرَثَتْهَا.›»

¹⁰ وَ بَنَاتْ صَلُوفْحَدْ سَوَّنْ مِثِلْ اللّٰهْ أَمَرْ بَيَّهْ مُوسَى.

¹¹ وَ بَنَاتْ صَلُوفْحَدْ هِنَّ مَحْلَةْ وَ تِرْصَةْ وَ حُقْلَةْ وَ مِلْكَةْ وَ نُوعَةْ، أَخَدَنْ عِيَالْ عَمَامَيْهِنْ.

¹² هِنَّ أَخَدَنْ رُجَالْ مِنْ عَايِلَاتْ مَنَسَّى مِنْ ذُرِّيَّةْ يُوسُفْ. وَ وَرَثَتْهِنْ قَعَدَتْ فِي خَشُمْ بَيْت قَبِيلَةْ أَبُوهِنْ.

¹³ وَ دَوْل الْوَصَايَا وَ الشُّرُوطْ الْاللّٰهْ أَمَرْ بَيْهُمْ بَنِي إِسْرَائِيلْ بِوَاسِطَةْ مُوسَى فِي كَدَادَةْ مُوَابْ فِي خَشُمْ بَحَرْ الْأُرْدُنْ مُقَابِلْ أَرِيحَا.