عَدد 34 - الكتاب المقدس بالعربي الدارجي هنا تشادحُدود البلد 1 وَ اللّٰهْ حَجَّى لِمُوسَى وَ قَالْ: 2 «أَنْطِي أَمُرْ لِبَنِي إِسْرَائِيلْ وَ قُولْ لَيْهُمْ: ‹وَكِتْ تَدْخُلُوا فِي بَلَدْ كَنْعَانْ، دِي هِي الْبَلَدْ التَّبْقَى لَيْكُو وَرَثَةْ وَ دَاهُو حُدُودْهَا. 3 «‹مِنْ الْجُنُوبْ، حُدُودْكُو يَبْدَوْا مِنْ صَحَرَاء سِينْ قَرِيبْ لِبَلَدْ أَدَوْم. وَ الْحُدُودْ دَوْل يَبْدَوْا مِنْ صَبَاحْ لِلنُّصّ الْجُنُوبِي هَنَا الْبَحَرْ الْمَيِّتْ. 4 وَ بَتَّانْ حُدُودْكُو يِحَوُّقُوا بِجُنُوبْ لِقِيزَانْ الْعَقَارِبْ وَ يِعَدُّوا بِصَحَرَاء سِينْ لَحَدِّي جُنُوبْ قَادِشْ بَرْنِيعَ. وَ مِنْ قَادِشْ بَرْنِيعَ، حُدُودْكُو يَمُرْقُوا عَلَيْ حَصَرْ أَدَّارْ لَحَدِّي عَصْمُونْ. 5 وَ مِنْ عَصْمُونْ، حُدُودْكُو يِحَوُّقُوا بِوَادِي مَصِرْ لَحَدِّي الْبَحَرْ الْأَبْيَضْ الْمُتَوَسِّطْ. 6 «‹وَ مِنْ الْغَرِبْ، الْبَحَرْ الْأَبْيَضْ يَبْقَى لَيْكُو حُدُودْ وَ دَوْل بَسْ حُدُودْكُو مِنْ الْغَرِبْ. 7 «‹وَ مِنْ الْمُنْشَاقْ، دَاهُو حُدُودْكُو. سَوُّوا حُدُودْكُو مِنْ الْبَحَرْ الْأَبْيَضْ لَحَدِّي جَبَلْ هَوْر. 8 وَ بَتَّانْ حُدُودْكُو سَوُّوهُمْ مِنْ جَبَلْ هَوْر لَحَدِّي لَبُو حَمَاتْ. وَ مِنْ الْبَكَانْ دَا، الْحُدُودْ يَمْشُوا لَحَدِّي صَدَادْ 9 وَ زِفْرُونْ وَ يَقِيفُوا فِي حَصَرْ عَيْنَانْ. وَ دَوْل يَبْقَوْا حُدُودْكُو مِنْ الْمُنْشَاقْ. 10 «‹وَ مِنْ الصَّبَاحْ، سَوُّوا حُدُودْكُو مِنْ حَصَرْ عَيْنَانْ لَحَدِّي شَفَامْ. 11 وَ مِنْ شَفَامْ، الْحُدُودْ يَمْشُوا لَحَدِّي رِبْلَةْ صَبَاحْ لِلْعَيْن وَ مِنْهَا، الْحُدُودْ يَمْشُوا عَلَيْ الْقِيزَانْ الْقَاعِدِينْ صَبَاحْ لِبَحَرْ الْجَلِيلْ. 12 وَ فِي الأَخِيرْ، الْحُدُودْ يَدْخُلُوا بَحَرْ الْأُرْدُنْ وَ مِنَّهْ لَحَدِّي الْبَحَرْ الْمَيِّتْ. وَ دِي بَلَدْكُو بِكُلَّ حُدُودْهَا.›» 13 وَ مُوسَى أَمَرْ بَنِي إِسْرَائِيلْ وَ قَالْ: «دِي الْبَلَدْ التِّقَسُّمُوهَا بِأَمْ عِيَيْدَاتْ وَ اللّٰهْ أَمَرْ يِقَسُّمُوهَا أَمْبَيْنَاتْ التِّسْعَةْ قَبَايِلْ وَ نُصّ قَبِيلَةْ. 14 أَشَانْ الْقَبَايِلْ الْآخَرِينْ، يَعْنِي عَايِلَةْ رَأُوبِينْ وَ عَايِلَةْ قَادْ وَ عَايِلَةْ نُصّ قَبِيلَةْ مَنَسَّى، لِقَوْا وَرَثَتْهُمْ خَلَاصْ. 15 الْقَبَايِلْ الْإِتْنَيْن وَ نُصّ الْقَبِيلَةْ دَوْل لِقَوْا وَرَثَتْهُمْ غَادِي صَبَاحْ لِبَحَرْ الْأُرْدُنْ مُقَابِلْ أَرِيحَا.» أَلِعَازَر و يَشُوع قسّموا البلد 16 وَ اللّٰهْ حَجَّى لِمُوسَى وَ قَالْ: 17 «دَاهُو أَسَامَيْ الرُّجَالْ الْيِقَسُّمُوا لَيْكُو وَرَثَتْكُو هَنَا الْبَلَدْ. وَ هُمَّنْ رَاجِلْ الدِّينْ أَلِعَازَرْ وَ يَشُوعْ وِلَيْد نُونْ. 18 وَ تِشِيلُوا مَعَاهُمْ شَيْخ وَاحِدْ مِنْ أَيِّ قَبِيلَةْ لِيِقَسُّمُوا الْبَلَدْ. 19 وَ دَاهُو أَسَامَيْ النَّاسْ دَوْل. مِنْ قَبِيلَةْ يَهُوذَا، كَالِبْ وِلَيْد يَفُونَى. 20 وَ مِنْ قَبِيلَةْ شِمْعُونْ، شَمُوِيلْ وِلَيْد عَمِهُودْ. 21 وَ مِنْ قَبِيلَةْ بَنْيَامِينْ، أَلِدَادْ وِلَيْد كِسْلُونْ. 22 وَ مِنْ قَبِيلَةْ دَانْ، الشَّيْخ بُقِي وِلَيْد يُقْلِي. 23 وَ مِنْ ذُرِّيَّةْ يُوسُفْ كَمَانْ، مِنْ قَبِيلَةْ مَنَسَّى، الشَّيْخ حَنِّيِيلْ وِلَيْد إِيفُودْ 24 وَ مِنْ قَبِيلَةْ أَفْرَايِمْ، الشَّيْخ قَمُوِيلْ وِلَيْد شِفْطَانْ. 25 وَ مِنْ قَبِيلَةْ زَبُلُونْ، الشَّيْخ أَلِصَافَنْ وِلَيْد فَرْنَاكْ. 26 وَ مِنْ قَبِيلَةْ يَسَّاكَرْ، الشَّيْخ فَلْطِيِيلْ وِلَيْد عَزَّانْ. 27 وَ مِنْ قَبِيلَةْ أَشِيرْ، الشَّيْخ أَخِحُودْ وِلَيْد شَلُومِي. 28 وَ مِنْ قَبِيلَةْ نَفْتَالِي، الشَّيْخ فَدَهِيلْ وِلَيْد عَمِهُودْ.» 29 دَوْل بَسْ النَّاسْ الْأَمَرَاهُمْ اللّٰهْ يِقَسُّمُوا بَلَدْ كَنْعَانْ وَرَثَةْ لِبَنِي إِسْرَائِيلْ. |
La Bible en arabe tchadien © Alliance biblique du Tchad, 2019
Bible Society of Chad