عَدد 26 - الكتاب المقدس بالعربي الدارجي هنا تشاد

الحسابة في كدادة مُوَاب

¹ وَ بَعَدْ الْوَبَاءْ دَا، اللّٰهْ قَالْ لِمُوسَى وَ لِأَلِعَازَرْ وِلَيْد هَارُونْ رَاجِلْ الدِّينْ:

² «مِنْ كُلَّ مُجْتَمَعْ بَنِي إِسْرَائِيلْ، أَحْسُبُوا كُلَّ الرُّجَالْ الْعُمُرْهُمْ مِنْ 20 سَنَةْ وَ فَوْق الْيَقْدَرَوْا لِخِدْمَةْ الْعَسْكَرِيَّةْ حَسَبْ عَايِلَاتْهُمْ.»

³ وَ فِي كَدَادَةْ مُوَابْ فِي خَشُمْ بَحَرْ الْأُرْدُنْ الْمُقَابِلْ حِلَّةْ أَرِيحَا، مُوسَى وَ رَاجِلْ الدِّينْ أَلِعَازَرْ قَالَوْا لِلشَّعَبْ:

⁴ «أَنِحْنَ نَحْسُبُوكُو إِنْتُو الرُّجَالْ الْعُمُرْكُو مِنْ 20 سَنَةْ وَ فَوْق مِثِلْ اللّٰهْ أَمَرْ بَيَّهْ مُوسَى.» وَ دَاهُو قَبَايِلْ بَنِي إِسْرَائِيلْ الْمَرَقَوْا مِنْ بَلَدْ مَصِرْ.

قبيلة رَأُوبِين

⁵ وَ رَأُوبِينْ هُو بِكِرْ إِسْرَائِيلْ وَ دَوْل ذُرِّيّتَهْ حَسَبْ خُشُومْ بُيُوتْهُمْ. حَنُوكْ جَابْ الْحَنُوكِيِّينْ وَ فَلُّو جَابْ الْفَلُّوِيِّينْ

⁶ وَ حَصْرُونْ جَابْ الْحَصْرُونِيِّينْ وَ كَرْمِي جَابْ الْكَرْمِيِّينْ.

⁷ وَ خُشُومْ بُيُوتْ قَبِيلَةْ رَأُوبِينْ عَدَدْهُمْ 43 730 نَاسْ.

⁸ وَ فَلُّو جَابْ أَلِيَابْ

⁹ وَ أَلِيَابْ جَابْ نَمُوِيلْ وَ دَتَانْ وَ أَبِرَامْ. وَ دَتَانْ وَ أَبِرَامْ دَوْل كُبَارَاتْ مُجْتَمَعْ بَنِي إِسْرَائِيلْ الْقَمَّوْا ضِدّ مُوسَى وَ هَارُونْ. هُمَّنْ مَعَ نَاسْ قُورَحْ وَكِتْ قَمَّوْا ضِدّ اللّٰهْ.

¹⁰ وَ الْأَرْض أَنْفَتَحَتْ وَ زَرَطَتْهُمْ هُمَّنْ وَ قُورَحْ وَ النَّاسْ الْمَعَاهُمْ وَ النَّارْ حَرَقَتْ 250 نَادُمْ وَ بِقَوْا مَثَلْ لِلْآخَرِينْ.

¹¹ وَ لَاكِنْ عِيَالْ قُورَحْ مَا مَاتَوْا فِي الْيَوْم دَاكْ.

قبيلة شِمْعُون

¹² وَ دَوْل ذُرِّيَّةْ شِمْعُونْ حَسَبْ خُشُومْ بُيُوتْهُمْ. نَمُوِيلْ جَابْ النَّمُوِيلِيِّينْ وَ يَامِينْ جَابْ الْيَامِينِيِّينْ وَ يَاكِينْ جَابْ الْيَاكِينِيِّينْ

¹³ وَ زَارَحْ جَابْ الزَّارَحِيِّينْ وَ شَاوُولْ جَابْ الشَّاوُولِيِّينْ.

¹⁴ وَ خُشُومْ بُيُوتْ قَبِيلَةْ شِمْعُونْ عَدَدْهُمْ 22 200 نَاسْ.

قبيلة قَاد

¹⁵ وَ دَوْل ذُرِّيَّةْ قَادْ حَسَبْ خُشُومْ بُيُوتْهُمْ. صَفُونْ جَابْ الصَّفُونِيِّينْ وَ حَقِّي جَابْ الْحَقِّيِّينْ وَ شُونِي جَابْ الشُّونِيِّينْ

¹⁶ وَ أُزْنِي جَابْ الْأُزْنِيِّينْ وَ عِيرِي جَابْ الْعِيرِيِّينْ

¹⁷ وَ أَرُودِي جَابْ الْأَرُودِيِّينْ وَ أَرِيلِي جَابْ الْأَرِيلِيِّينْ.

¹⁸ وَ خُشُومْ بُيُوتْ قَبِيلَةْ قَادْ عَدَدْهُمْ 40 500 نَاسْ.

قبيلة يَهُوذَا

¹⁹ وَ عِيَالْ يَهُوذَا هُمَّنْ عِيرْ وَ أُنَانْ وَ هُمَّنْ دَوْل مَاتَوْا فِي بَلَدْ كَنْعَانْ.

²⁰ وَ دَوْل ذُرِّيَّةْ يَهُوذَا حَسَبْ خُشُومْ بُيُوتْهُمْ. شِيلَى جَابْ الشِّيلَيِّينْ وَ فَارِصْ جَابْ الْفَارِصِيِّينْ وَ زَارَحْ جَابْ الزَّارَحِيِّينْ.

²¹ وَ مِنْ الْفَارِصِيِّينْ مَرَقَوْا حَصْرُونْ وَ حَامُلْ. وَ حَصْرُونْ جَابْ الْحَصْرُونِيِّينْ وَ حَامُلْ جَابْ الْحَامُلِيِّينْ.

²² وَ خُشُومْ بُيُوتْ قَبِيلَةْ يَهُوذَا عَدَدْهُمْ 76 500 نَاسْ.

قبيلة يَسَّاكَر

²³ وَ دَوْل ذُرِّيَّةْ يَسَّاكَرْ حَسَبْ خُشُومْ بُيُوتْهُمْ. تُولَعْ جَابْ التُّولَعِيِّينْ وَ فُوَّى جَابْ الْفُوِّيِّينْ.

²⁴ وَ يَشُوبْ جَابْ الْيَشُوبِيِّينْ وَ شِمْرُونْ جَابْ الشِّمْرُونِيِّينْ.

²⁵ وَ خُشُومْ بُيُوتْ قَبِيلَةْ يَسَّاكَرْ عَدَدْهُمْ 64 300 نَاسْ.

قبيلة زَبُلُون

²⁶ وَ دَوْل ذُرِّيَّةْ قَبِيلَةْ زَبُلُونْ حَسَبْ خُشُومْ بُيُوتْهُمْ. سَارَدْ جَابْ السَّارَدِيِّينْ وَ إِيلُونْ جَابْ الْإِيلُونِيِّينْ وَ يَحَلِيلْ جَابْ الْيَحَلِيلِيِّينْ.

²⁷ وَ خُشُومْ بُيُوتْ قَبِيلَةْ زَبُلُونْ عَدَدْهُمْ 60 500 نَاسْ.

قبايِل مَنَسَّى و أَفْرَايِم

²⁸ وَ دَوْل ذُرِّيَّةْ يُوسُفْ، قَبَايِلْ مَنَسَّى وَ أَفْرَايِمْ حَسَبْ خُشُومْ بُيُوتْهُمْ.

²⁹ مَنَسَّى جَابْ مَكِيرْ وَ مَكِيرْ جَابْ الْمَكِيرِيِّينْ وَ مِنْ الْمَكِيرِيِّينْ مَرَقْ قِلْعَادْ وَ قِلْعَادْ جَابْ الْقِلْعَادِيِّينْ.

³⁰ وَ مِنْ الْقِلْعَادِيِّينْ مَرَقَوْا إِيَعْزَرْ الْجَابْ الْإِيَعْزَرِيِّينْ وَ حِلَقْ الْجَابْ الْحِلَقِيِّينْ.

³¹ وَ أَسْرِيِيلْ الْجَابْ الْأَسْرِيِيلِيِّينْ وَ شَكِيمْ الْجَابْ الشَّكِيمِيِّينْ.

³² وَ شَمِيدَعْ الْجَابْ الشَّمِيدَعِيِّينْ وَ حِيفَرْ الْجَابْ الْحِيفَرِيِّينْ.

³³ وَ صَلُوفْحَدْ وِلَيْد حِيفَرْ مَا جَابْ أَوْلَادْ وَ لَاكِنْ جَابْ بَنَاتْ بَسْ. وَ بَنَاتَهْ أَسَامَيْهُمْ مَحْلَةْ وَ نُوعَةْ وَ حُقْلَةْ وَ مِلْكَةْ وَ تِرْصَةْ.

³⁴ وَ خُشُومْ بُيُوتْ قَبِيلَةْ مَنَسَّى عَدَدْهُمْ 52 700 نَاسْ.

³⁵ وَ دَوْل ذُرِّيَّةْ أَفْرَايِمْ حَسَبْ خُشُومْ بُيُوتْهُمْ. شُتَالَحْ جَابْ الشُّتَالَحِيِّينْ وَ بَاكَرْ جَابْ الْبَاكَرِيِّينْ وَ تَاحَنْ جَابْ التَّاحَنِيِّينْ.

³⁶ وَ مِنْ الشُّتَالَحِيِّينْ مَرَقْ أَرَانْ. وَ أَرَانْ جَابْ الْأَرَانِيِّينْ.

³⁷ وَ خُشُومْ بُيُوتْ قَبِيلَةْ أَفْرَايِمْ عَدَدْهُمْ 32 500 نَاسْ. وَ دَوْل قَبَايِلْ مَنَسَّى وَ أَفْرَايِمْ عِيَالْ يُوسُفْ حَسَبْ خُشُومْ بُيُوتْهُمْ.

قبيلة بَنْيَامِين

³⁸ وَ دَوْل ذُرِّيَّةْ بَنْيَامِينْ حَسَبْ خُشُومْ بُيُوتْهُمْ. بَالَعْ جَابْ الْبَالَعِيِّينْ وَ أَشْبِيلْ جَابْ الْأَشْبِيلِيِّينْ وَ أَحِرَامْ جَابْ الْأَحِرَامِيِّينْ

³⁹ وَ شَفُوفَمْ جَابْ الشَّفُوفَمِيِّينْ وَ حُوفَمْ جَابْ الْحُوفَمِيِّينْ.

⁴⁰ وَ مِنْ الْبَالَعِيِّينْ مَرَقَوْا أَرَدْ وَ نَعَمَانْ. وَ أَرَدْ جَابْ الْأَرَدِيِّينْ وَ نَعَمَانْ جَابْ النَّعَمَانِيِّينْ.

⁴¹ وَ خُشُومْ بُيُوتْ قَبِيلَةْ بَنْيَامِينْ عَدَدْهُمْ 45 600 نَاسْ.

قبيلة دَان

⁴² وَ دَوْل ذُرِّيَّةْ دَانْ حَسَبْ خُشُومْ بُيُوتْهُمْ. شُحَامْ جَابْ الشُّحَامِيِّينْ. وَ دَوْل ذُرِّيَّةْ قَبِيلَةْ دَانْ حَسَبْ خَشُمْ بَيْتهُمْ.

⁴³ وَ خَشُمْ بَيْت الشُّحَامِيِّينْ عَدَدَهْ 64 400 نَاسْ.

قبيلة أَشِير

⁴⁴ وَ دَوْل ذُرِّيَّةْ أَشِيرْ حَسَبْ خُشُومْ بُيُوتْهُمْ. يِمْنَى جَابْ الْيِمْنِيِّينْ وَ يِشْوِي جَابْ الْيِشْوِيِّينْ وَ بَرِيعَا جَابْ الْبَرِيعِيِّينْ.

⁴⁵ وَ مِنْ الْبَرِيعِيِّينْ مَرَقَوْا حَابَرْ وَ مَلْكِيِيلْ. وَ حَابَرْ جَابْ الْحَابَرِيِّينْ وَ مَلْكِيِيلْ جَابْ الْمَلْكِيِيلِيِّينْ.

⁴⁶ وَ أَشِيرْ جَابْ بِنَيَّةْ أُسُمْهَا سَارَحْ.

⁴⁷ وَ خُشُومْ بُيُوتْ قَبِيلَةْ أَشِيرْ عَدَدْهُمْ 53 400 نَاسْ.

قبيلة نَفْتَالِي

⁴⁸ وَ دَوْل ذُرِّيَّةْ نَفْتَالِي حَسَبْ خُشُومْ بُيُوتْهُمْ. يَحْصِيلْ جَابْ الْيَحْصِيلِيِّينْ وَ قُونِي جَابْ الْقُونِيِّينْ

⁴⁹ وَ يِصَرْ جَابْ الْيِصْرِيِّينْ وَ شِلِّيمْ جَابْ الشِّلِّيمِيِّينْ.

⁵⁰ وَ خُشُومْ بُيُوتْ قَبِيلَةْ نَفْتَالِي عَدَدْهُمْ 45 400 نَاسْ.

⁵¹ وَ بَنِي إِسْرَائِيلْ عَدَدْهُمْ بِقِي 601 730 نَاسْ.

قسِّمين البلد

⁵² وَ اللّٰهْ حَجَّى لِمُوسَى وَ قَالْ:

⁵³ «قَسِّمْ الْبَلَدْ دِي وَرَثَةْ أَمْبَيْنَاتْ الْقَبَايِلْ دَوْل وَ قَسِّمْهَا لَيْهُمْ حَسَبْ عَدَدْ النَّاسْ.

⁵⁴ الْقَبِيلَةْ الْكَبِيرَةْ أَنْطِيهَا أَرْض وَرَثَةْ كَبِيرَةْ وَ الْقَبِيلَةْ الصَّغَيْرَةْ أَنْطِيهَا أَرْض وَرَثَةْ صَغَيْرَةْ. أَيِّ قَبِيلَةْ، أَنْطِيهَا وَرَثَةْ حَسَبْ عَدَدْ نَاسْهَا.

⁵⁵ وَ قَسِّمِينْ الْبَلَدْ دِي يَبْقَى بِأَمْ عِيَيْدَاتْ. وَ أَيِّ قَبِيلَةْ تَلْقَى وَرَثَتْهَا حَسَبْ عَدَدْ نَاسْهَا.

⁵⁶ وَ بِأَمْ عِيَيْدَاتْ أَمْبَيْنَاتْ الْقَبَايِلْ الْكُبَارْ وَ الدُّقَاقْ، أَيِّ قَبِيلَةْ تَلْقَى وَرَثَتْهَا.»

الحسابة التانية هنا اللاوِيِّين

⁵⁷ وَ دَوْل ذُرِّيَّةْ لَاوِي حَسَبْ خُشُومْ بُيُوتْهُمْ. قِرْشُونْ جَابْ الْقِرْشُونِيِّينْ وَ قَهَاتْ جَابْ الْقَهَاتِيِّينْ وَ مَرَارِي جَابْ الْمَرَارِيِّينْ.

⁵⁸ وَ مِنْ خُشُومْ الْبُيُوتْ التَّلَاتَةْ دَوْل مَرَقَوْا خُشُومْ بُيُوتْ لِبْنِي وَ حَبْرُونْ وَ مَحْلِي وَ مُوشِي وَ قُورَحْ. وَ مِنْ خَشُمْ بَيْت قَهَاتْ مَرَقْ الرَّاجِلْ الْبِسَمُّوهْ عَمْرَامْ.

⁵⁹ وَ مَرِةْ عَمْرَامْ أُسُمْهَا يُوكَابَدْ بِنَيَّةْ لَاوِي الْوِلْدَوْهَا فِي مَصِرْ. وَ يُوكَابَدْ جَابَتْ لِعَمْرَامْ، هَارُونْ وَ مُوسَى وَ أَخُتْهُمْ مَرْيَمْ.

⁶⁰ وَ هَارُونْ جَابْ نَدَابْ وَ أَبِيهُو وَ أَلِعَازَرْ وَ إِتَمَارْ.

⁶¹ وَ نَدَابْ وَ أَبِيهُو مَاتَوْا أَشَانْ هُمَّنْ قَدَّمَوْا لِلّٰهْ فِي لُبّ خَيْمَةْ الْإِجْتِمَاعْ بَخُورْ فِي نَارْ الْهُو مَا أَذَنْ بَيْهَا.

⁶² وَ اللَّاوِيِّينْ الدُّكُورْ مِنْ وِلَيْد شَهَرْ وَ فَوْق، عَدَدْهُمْ 23 000 نَاسْ. وَ مَا حَسَبَوْهُمْ مَعَ بَنِي إِسْرَائِيلْ الْآخَرِينْ أَشَانْ مَا عِنْدُهُمْ وَرَثَةْ مِنْ الْبَلَدْ مَعَ بَنِي إِسْرَائِيلْ.

⁶³ وَ دَوْل النَّاسْ الْحَسَبَوْهُمْ مُوسَى وَ رَاجِلْ الدِّينْ أَلِعَازَرْ وَكِتْ حَسَبَوْا بَنِي إِسْرَائِيلْ فِي كَدَادَةْ مُوَابْ فِي خَشُمْ بَحَرْ الْأُرْدُنْ الْمُقَابِلْ حِلَّةْ أَرِيحَا.

⁶⁴ وَ لَاكِنْ بَنِي إِسْرَائِيلْ الزَّمَانْ حَسَبَوْهُمْ مُوسَى وَ رَاجِلْ الدِّينْ هَارُونْ فِي صَحَرَاء سِينَاء، وَاحِدْ كُلَ مِنْهُمْ مَا فَضَّلْ.

⁶⁵ أَشَانْ اللّٰهْ قَالْ: «هُمَّنْ كُلُّهُمْ يُمُوتُوا فِي الصَّحَرَاء.» وَ خَلَاصْ، وَاحِدْ كُلَ مِنْهُمْ مَا فَضَّلْ إِلَّا كَالِبْ وِلَيْد يَفُونَى وَ يَشُوعْ وِلَيْد نُونْ.