عَدد 25 - الكتاب المقدس بالعربي الدارجي هنا تشاد

بني إسرائيل عبدوا إلٰـه آخر

¹ وَكِتْ بَنِي إِسْرَائِيلْ قَعَدَوْا فِي شِطِّيمْ، قَمَّوْا يَفْسُدُوا مَعَ بَنَاتْ الْمُوَابِيِّينْ.

² بَنَاتْ الْمُوَابِيِّينْ يَعَزِمَنْ بَنِي إِسْرَائِيلْ فِي قَدِّمِينْ الضَّحَايَا لِإِلٰـهَاتْهِنْ. وَ هُمَّنْ يَاكُلُوا مَعَاهِنْ لَحَمْ ضَحَايَاهِنْ وَ يَسْجُدُوا لِإِلٰـهَاتْهِنْ.

³ وَ بِمِثِلْ دَا، بَنِي إِسْرَائِيلْ شَارَكَوْا فِي عِبَادَةْ إِلٰـهْ بَعَلْ هَنَا جَبَلْ فَعُورْ وَ اللّٰهْ غِضِبْ غَضَبْ شَدِيدْ ضِدُّهُمْ.

⁴ وَ اللّٰهْ قَالْ لِمُوسَى: «أَكْرُبْ كُلَّ كُبَارَاتْ الشَّعَبْ الْفَسَدَوْا وَ جِيبْهُمْ قِدَّامِي أَنَا اللّٰهْ وَ قَابِلْهُمْ لِلْحَرَّايْ وَ أَشْنِقْهُمْ. وَ بَيْدَا، غَضَبِي الْمُحْرِقْ بَتَّانْ مَا يَلْحَقْهُمْ لِبَنِي إِسْرَائِيلْ.»

⁵ وَ مُوسَى قَالْ لِلْقُضْيَاءْ هَنَا بَنِي إِسْرَائِيلْ: «أَيِّ وَاحِدْ مِنْكُو يَكْتُلْ رُجَالَهْ الشَّارَكَوْا فِي عِبَادَةْ إِلٰـهْ بَعَلْ هَنَا جَبَلْ فَعُورْ.»

⁶ وَ وَكِتْ بَنِي إِسْرَائِيلْ قَاعِدِينْ يَبْكُوا فِي مَدَخَلْ خَيْمَةْ الْإِجْتِمَاعْ، فِي رَاجِلْ مِنْ بَنِي إِسْرَائِيلْ جَايِ لِأَخْوَانَهْ مَعَ مَرَةْ مِدْيَانِيَّةْ. وَ مُوسَى وَ كُلَّ مُجْتَمَعْ بَنِي إِسْرَائِيلْ شَافَوْه.

⁷ وَ خَلَاصْ فِي الْبَكَانْ دَا، فِينْحَاسْ وِلَيْد أَلِعَازَرْ وِلَيْد هَارُونْ رَاجِلْ الدِّينْ، قَمَّ مِنْ أُسُطْ مُجْتَمَعْ بَنِي إِسْرَائِيلْ وَ شَالْ حَرْبَةْ فِي إِيدَهْ.

⁸ وَ تَابَعْ الرَّاجِلْ لَحَدِّي فِي لُبّ الْخَيْمَةْ وَ طَعَنَاهُمْ هُمَّنْ الْإِتْنَيْن طَعْنَةْ وَاحِدَةْ بَسْ. الرَّاجِلْ وَ الْمَرَةْ طَعَنَاهُمْ فِي بُطُونْهُمْ. وَ خَلَاصْ الْوَبَاءْ وَقَفْ مِنْ بَنِي إِسْرَائِيلْ.

⁹ وَ الْمَاتَوْا مِنْ الْوَبَاءْ دَا، عَدَدْهُمْ 24 000 نَاسْ.

المُعاهدة مع فِينْحَاس

¹⁰ وَ اللّٰهْ حَجَّى لِمُوسَى وَ قَالْ:

¹¹ «فِينْحَاسْ وِلَيْد أَلِعَازَرْ وِلَيْد هَارُونْ رَاجِلْ الدِّينْ وَقَّفْ غَضَبِي مِنْ بَنِي إِسْرَائِيلْ وَكِتْ وَصَّفْ غِيرْتِي أَنَا اللّٰهْ فِي أُسُطْهُمْ. وَ بِسَبَبْ الشَّيّءْ السَّوَّاهْ فِينْحَاسْ، أَنَا بَتَّانْ مَا نِوَصِّفْ غِيرْتِي وَ نِكَمِّلْ بَنِي إِسْرَائِيلْ.

¹² أَشَانْ دَا، قُولْ لَيَّهْ أَنَا نَنْطِيهْ مُعَاهَدَتِي هَنَا السَّلَامْ.

¹³ وَ الْمُعَاهَدَةْ دِي تَبْقَى مَعَايَهْ هُو وَ ذُرِّيّتَهْ الْيَجُوا مِنْ بَعَدَهْ. وَ هِي تَضْمَنْ لَيْهُمْ خِدْمَةْ رُجَالْ الدِّينْ لِلْأَبَدْ أَشَانْ هُو وَصَّفْ غِيرْتَهْ فِي شَانِي أَنَا إِلٰـهَهْ وَ سَوَّى كَفَّارَةْ لِذُنُوبْ بَنِي إِسْرَائِيلْ.»

¹⁴ وَ الرَّاجِلْ الْمِنْ بَنِي إِسْرَائِيلْ الْكَتَلَوْه مَعَ الْمِدْيَانِيَّةْ أُسْمَهْ زِمْرِي وِلَيْد سَالُو شَيْخ هَنَا عَايِلَةْ مِنْ قَبِيلَةْ شِمْعُونْ.

¹⁵ وَ الْمَرَةْ الْمِدْيَانِيَّةْ الْكَتَلَوْهَا أُسُمْهَا كُزْبِي بِنَيَّةْ صُورْ كَبِيرْ هَنَا خَشُمْ بَيْت مِنْ خُشُومْ بُيُوتْ مِدْيَانْ.

¹⁶ وَ خَلَاصْ، اللّٰهْ حَجَّى لِمُوسَى وَ قَالْ:

¹⁷ «أَهْجُمُوا الْمِدْيَانِيِّينْ وَ أَكْتُلُوهُمْ.

¹⁸ أَشَانْ هُمَّنْ غَشَّوْكُو فِي مُشْكِلَةْ فَعُورْ وَ فِي مُشْكِلَةْ أَخُتْهُمْ كُزْبِي بِنْت كَبِيرْ مِدْيَانْ الْكَتَلَوْهَا فِي يَوْم الْوَبَاءْ النَّزَلْ فِي مُشْكِلَةْ فَعُورْ.»