نَحَمْيا 4 - الكتاب المقدس بالعربي الدارجي هنا تشادالعُدْوان يدَوْروا يدْحروا البُنى 1 وَكِتْ سَنْبَلَطْ سِمِعْ كَدَرْ أَنِحْنَ الْيَهُودْ قَاعِدِينْ نَبْنُوا الدُّرْدُرْ، هُو زِعِلْ زَعَلْ شَدِيدْ وَ قَاعِدْ بِشَمِّتْ لَيْنَا. 2 وَ قَالْ قِدَّامْ أَخْوَانَهْ وَ قِدَّامْ عَسْكَرَهْ فِي بَلَدْ السَّامِرَةْ: «الْيَهُودْ الضَّعِيفِينْ دَوْل قَاعِدِينْ بِسَوُّوا شُنُو؟ صَحِيحْ كَيْ يَقْدَرَوْا يِحَقِّقُوا هَدَفْهُمْ وَ يِقَدُّمُوا ضَحَايَا وَلَّا؟ صَحِيحْ كَيْ الْيَوْم بَسْ يَقْدَرَوْا يِكَمُّلُوا الْخِدْمَةْ وَلَّا؟ وَ مِنْ الْكِيمَانْ هَنَا الْحَجَرْ الْمُكَسَّرْ وَ مُحَرَّقْ هَنَا الْبُنَى الْقَدِيمْ دَا، يَقْدَرَوْا يِشِيلُوا وَ يَبْنُوا بَيَّهْ بَتَّانْ وَلَّا؟» 3 وَ طُوبِـيَّا الْمِنْ بَنِي عَمُّونْ قَاعِدْ جَنْب سَنْبَلَطْ وَ قَالْ: «الدُّرْدُرْ الْقَاعِدِينْ يَبْنُوهْ بِحَجَرْ دَا، بَعَشَوْم كَنْ رِكِبْ فَوْقَهْ كُلَ بَقَعْ.» 4 وَكِتْ أَنَا سِمِعْت كَلَامْهُمْ دَا، صَلَّيْت وَ قُلْت لِلرَّبّ: «يَا إِلٰـهْنَا، شِيفْ كِكَّيْف قَاعِدِينْ يَحْقُرُونَا. الْمُعْيَارْ الْقَاعِدِينْ يِعَيُّرُونَا دَا، قَبِّلَهْ لَيْهُمْ فِي رَاسْهُمْ. وَ خَلِّي خُصْمَانْهُمْ يَكْسُبُوهُمْ وَ يِوَدُّوهُمْ عَبِيدْ. 5 مَا تِسَامِحْ الْخَطَا السَّوَّوْه دَا وَ مَا تُقُشّ ذُنُوبْهُمْ أَشَانْ هُمَّنْ أَشَّمَّتَوْا لَيْنَا، أَنِحْنَ الْقَاعِدِينْ نَبْنُوا.» 6 وَ بِمِثِلْ دَا، تَابَعْنَا فِي بُنَى الدُّرْدُرْ دَا وَ طُولَهْ فَوْق أَنْبَنَى لَحَدِّي نُصّ أَشَانْ أَيِّ وَاحِدْ مِنْ الشَّعَبْ خَدَمْ بِنِيَّةْ. 7 وَ وَكِتْ سَنْبَلَطْ وَ طُوبِـيَّا وَ نَاسْ مِنْ الْعَرَبْ وَ مِنْ بَنِي عَمُّونْ وَ مِنْ سُكَّانْ أَشْدُودْ سِمْعَوْا كَدَرْ بُنَى دُرْدُرْ مَدِينَةْ الْقُدُسْ مَاشِي قِدَّامْ وَ خُرَمَهْ كُلَ قَاعِدِينْ يِنْسَدَّوْا خَلَاصْ، هُمَّنْ زِعِلَوْا زَعَلْ شَدِيدْ مَرَّةْ وَاحِدْ. 8 وَ هُمَّنْ كُلُّهُمْ كَيْ وَافَقَوْا بِخَشُمْ وَاحِدْ أَشَانْ يَهْجُمُوا مَدِينَةْ الْقُدُسْ وَ يِبَرْجُلُوهَا. 9 وَ خَلَاصْ، أَنِحْنَ صَلَّيْنَا لِإِلٰـهْنَا وَ خَطَّيْنَا حُرَّاسْ أَشَانْ يَحْفَضَوْنَا مِنْهُمْ لَيْل وَ نَهَارْ. 10 وَ لَاكِنْ نَاسْ يَهُوذَا قَالَوْا: «قُدْرَةْ الْخَدَّامِينْ بِقَتْ شِيَّةْ وَ بَيْدَا، مَا نَقْدَرَوْا نَبْنُوا الدُّرْدُرْ أَشَانْ الْحَجَرْ الْمُكَسَّرْ كَتِيرْ.» 11 وَ خُصْمَانَّا قَالَوْا: «خَلِّي نَمْشُوا نَهْجُمُوهُمْ! وَكِتْ هُمَّنْ مَا يِشِيفُونَا، نِنْدَسَّوْا فِي أُسُطْهُمْ وَ خَلَاصْ نَكْتُلُوهُمْ وَ نِوَقُّفُوا الْخِدْمَةْ.» 12 وَ الْيَهُودْ الْقَاعِدِينْ جَنْب خُصْمَانَّا جَوْا لَيْنَا عَشَرَةْ مَرَّاتْ وَ قَالَوْا لَيْنَا: «النَّاسْ دَوْل يَجُوا يَهْجُمُوكُو مِنْ أَيِّ جِيهَةْ!» 13 وَ فِي شَانْ دَا، أَنَا نَظَّمْت الشَّعَبْ حَسَبْ خُشُومْ بُيُوتْهُمْ وَ خَطَّيْتهُمْ بِسُيُوفْهُمْ وَ نَشَاشِيبْهُمْ وَ حُرَابْهُمْ وَرَاءْ الدُّرْدُرْ فِي بَكَانَاتْ الشِّيَّةْ تِحِتْ. 14 وَ شِفْت كُلَّ بَكَانَاتْ مُقْعَدْهُمْ وَ قُلْت لِلْكُبَارَاتْ وَ الْمَسَائِيلْ وَ الشَّعَبْ: «مَا تَخَافَوْا مِنْهُمْ! فَكُّرُوا فِي رَبِّنَا الْكَبِيرْ وَ الْعَظِيمْ وَ دَاوُسُوهُمْ أَشَانْ تَحْمُوا أَخْوَانْكُو وَ أَوْلَادْكُو وَ بَنَاتْكُو وَ عَوِينْكُو وَ بُيُوتْكُو.» 15 وَ وَكِتْ عُدْوَانَّا سِمْعَوْا كَدَرْ أَنِحْنَ لِقِينَا خَبَرْ هَنَا الشَّيّءْ الْهُمَّنْ يِدَوْرُوا يِسَوُّوهْ وَ الرَّبّ كُلَ وَقَّفْ نِيِّتْهُمْ الشَّالَوْهَا، خَلَاصْ أَنِحْنَ كُلِّنَا كَيْ قَبَّلْنَا فِي خِدْمَةْ الدُّرْدُرْ، أَيِّ وَاحِدْ فِي بَكَانَهْ. 16 وَ لَاكِنْ مِنْ الْيَوْم دَاكْ، نُصّ النَّاسْ قَاعِدِينْ يَخْدُمُوا وَ نُصُّهُمْ كَمَانْ قَاعِدِينْ بِحُرَابْ وَ دَرَقْ وَ نَشَاشِيبْ وَ دُرُوعْ. وَ الْكُبَارَاتْ قَاعِدِينْ وَرَاءْ نَاسْ بَلَدْ يَهُوذَا وَ يِرَاقُبُوهُمْ. 17 وَ النَّاسْ الْقَاعِدِينْ يَبْنُوا الدُّرْدُرْ وَ النَّاسْ الْقَاعِدِينْ يِجِيبُوا خُمَامْ الْبُنَى، كُلُّهُمْ كَيْ قَاعِدِينْ يَخْدُمُوا بِإِيدْ وَاحِدَةْ وَ فِي إِيدْهُمْ الْآخَرَةْ كَمَانْ كَارْبِينْ السِّلَاحْ. 18 وَ النَّاسْ الْقَاعِدِينْ يَبْنُوا الدُّرْدُرْ، أَيِّ وَاحِدْ سَيْفَهْ فِي نَايْطَهْ. وَ النَّادُمْ الْيَضْرُبْ الْبُوقْ كَمَانْ قَاعِدْ جَنْبِي. 19 وَ أَنَا قُلْت لِلْكُبَارَاتْ وَ الْمَسْؤُولِينْ وَ الشَّعَبْ: «الْخِدْمَةْ دِي، هِي كَبِيرَةْ وَ وَسِيعَةْ وَ أَنِحْنَ مُشَتَّتِينْ فِي الدُّرْدُرْ، أَيِّ وَاحِدْ بَعِيدْ مِنْ الْآخَرْ. 20 وَ وَكِتْ تَسْمَعَوْا حِسّ الْبُوقْ دَا، تَعَالُوا لِمُّوا لَيْنَا فِي الْبَكَانْ دَا وَ إِلٰـهْنَا كَمَانْ يِدَاوِسْ لَيْنَا.» 21 وَ بِمِثِلْ دَا، أَنِحْنَ قَاعِدِينْ نِتَابُعُوا فِي الْخِدْمَةْ، نُصِّنَا الْوَاحِدْ قَاعِدِينْ نَخْدُمُوا وَ نُصِّنَا الْآخَرْ كَمَانْ كَارْبِينْ الْحُرَابْ، مِنْ وَرَدَّيْ لَحَدِّي النُّجُومْ يِنْشَافَوْا. 22 وَ فِي نَفْس الْوَكِتْ دَا، أَنَا قُلْت لِلشَّعَبْ خَلِّي أَيِّ وَاحِدْ مَعَ النَّادُمْ الْيِسَاعِدَهْ فِي الْبُنَى يُنُومُوا دَاخَلْ فِي مَدِينَةْ الْقُدُسْ. وَ نُخُطُّوا حُرَّاسْ يَحْفَضَوْنَا بِاللَّيْل وَ فِي النَّهَارْ كَمَانْ، نَخْدُمُوا. 23 وَ لَا أَنَا وَ لَا أَخْوَانِي وَ لَا الْجَمَاعَةْ الْمَعَايِ وَ لَا الْحُرَّاسْ الْقَاعِدِينْ يِتَابُعُونِي، أَبَداً مَا نِسِلُّوا خُلْقَانَّا وَ أَيِّ وَاحِدْ بِسِلَاحَهْ فِي إِيدَهْ. |
La Bible en arabe tchadien © Alliance biblique du Tchad, 2019
Bible Society of Chad