نَحَمْيا 12 - الكتاب المقدس بالعربي الدارجي هنا تشاد

رجال الدين و اللاوِيِّين القبّلوا

¹ وَ دَاهُو أَسَامَيْ رُجَالْ الدِّينْ وَ اللَّاوِيِّينْ الْقَبَّلَوْا مَعَ زَرُبَابِلْ وِلَيْد شَلْتِيِيلْ وَ يَشُوعْ. وَ رُجَالْ الدِّينْ الْجَوْا مِنْ الْغُرْبَةْ، هُمَّنْ سَرَايَا وَ إِرْمِيَا وَ عَزْرَا

² وَ أَمَرْيَا وَ مَلُّوك وَ حَطُّوشْ

³ وَ شَكَنْيَا وَ رَحُومْ وَ مَرِمُوتْ

⁴ وَ عِدُّو وَ قِنْتُويْ وَ أَبِيَّا

⁵ وَ مِيَامِينْ وَ مَعَدْيَا وَ بِلْقَا

⁶ وَ شَمَعْيَا وَ يُيَارِبْ وَ يَدَعْيَا

⁷ وَ سَلُّو وَ عَمُوقْ وَ حِلْقِيَّا وَ يَدَعْيَا. وَ هُمَّنْ دَوْل كُبَارَاتْ رُجَالْ الدِّينْ وَ أَخْوَانْهُمْ فِي وَكِتْ يَشُوعْ كَبِيرْ رُجَالْ الدِّينْ.

⁸ وَ اللَّاوِيِّينْ الْقَبَّلَوْا مِنْ الْغُرْبَةْ، هُمَّنْ يَشُوعْ وَ بِنُوِّي وَ قَدْمِيِيلْ وَ شَرَبْيَا وَ يَهُوذَا وَ مَتَّنْيَا. وَ مَتَّنْيَا مَعَ أَخْوَانَهْ، هُمَّنْ مَسَائِيلْ فِي غِنَيْ الشُّكُرْ فِي بَيْت اللّٰهْ.

⁹ وَ بَقْبُقْيَا وَ عُنِّي كَمَانْ أَخْوَانْهُمْ قَاعِدِينْ مُلْقَابِلِينْ مَعَ مَسَائِيلْ غِنَيْ الشُّكُرْ أَشَانْ يِسَاعُدُوهُمْ.

¹⁰ وَ يَشُوعْ كَبِيرْ رُجَالْ الدِّينْ وِلِدْ يُيَقِيمْ وَ يُيَقِيمْ وِلِدْ أَلْيَاشِبْ وَ أَلْيَاشِبْ وِلِدْ يُيَادَاعْ

¹¹ وَ يُيَادَاعْ وِلِدْ يُونَتَانْ وَ يُونَتَانْ وِلِدْ يَدُوعْ.

رجال الدين الهمن شُيوخ

¹² وَ وَكِتْ يُيَقِيمْ قَاعِدْ كَبِيرْ رُجَالْ الدِّينْ، الشُّيُوخْ هَنَا خُشُومْ بُيُوتْ رُجَالْ الدِّينْ، هُمَّنْ مَرَايَا شَيْخ خَشُمْ بَيْت سَرَايَا وَ حَنَنْيَا شَيْخ خَشُمْ بَيْت إِرْمِيَا

¹³ وَ مَشُلَّامْ شَيْخ خَشُمْ بَيْت عَزْرَا وَ يُوحَنَانْ شَيْخ خَشُمْ بَيْت أَمَرْيَا

¹⁴ وَ يُونَتَانْ شَيْخ خَشُمْ بَيْت مَلِيكُو وَ يُوسُفْ شَيْخ خَشُمْ بَيْت شَبَنْيَا

¹⁵ وَ عَدْنَا شَيْخ خَشُمْ بَيْت حَرِيمْ وَ حَلْقَايْ شَيْخ خَشُمْ بَيْت مَرَيُوتْ

¹⁶ وَ زَكَرِيَّا شَيْخ خَشُمْ بَيْت عِدُّو وَ مَشُلَّامْ شَيْخ خَشُمْ بَيْت قِنَّتُونْ

¹⁷ وَ زِكْرِي شَيْخ خَشُمْ بَيْت أَبِيَّا وَ فِي نَادُمْ آخَرْ شَيْخ خَشُمْ بَيْت مِنْيَامِينْ وَ فِلْطَايْ شَيْخ خَشُمْ بَيْت مُعَدْيَا

¹⁸ وَ شَمُّوعْ شَيْخ خَشُمْ بَيْت بِلْقَا وَ يُونَتَانْ شَيْخ خَشُمْ بَيْت شَمَعْيَا

¹⁹ وَ مَتِّنَايْ شَيْخ خَشُمْ بَيْت يُيَارِبْ وَ عُزِّي شَيْخ خَشُمْ بَيْت يَدَعْيَا

²⁰ وَ قَلَايْ شَيْخ خَشُمْ بَيْت سَلَايْ وَ عِبَارْ شَيْخ خَشُمْ بَيْت عَمُوقْ

²¹ وَ حَشَبْيَا شَيْخ خَشُمْ بَيْت حِلْقِيَّا وَ نَتَنِيلْ شَيْخ خَشُمْ بَيْت يَدَعْيَا.

²² وَ مِنْ الْوَكِتْ الْأَتَّابَعَوْا فَوْقَهْ كُبَارَاتْ رُجَالْ الدِّينْ أَلْيَاشِبْ وَ يُيَادَاعْ وَ يُوحَنَانْ وَ يَدُوعْ، سَجَّلَوْا أَسَامَيْ شُيُوخْ هَنَا خُشُومْ بُيُوتْ اللَّاوِيِّينْ وَ رُجَالْ الدِّينْ. وَ دَا لَحَدِّي وَكِتْ حُكُمْ الْمَلِكْ دَارِيُوسْ فِي بَلَدْ فَارِسْ.

²³ وَ أَسَامَيْ شُيُوخْ هَنَا خُشُومْ بُيُوتْ اللَّاوِيِّينْ مِنْ وَكِتْ أَلْيَاشِبْ قَاعِدْ كَبِيرْ رُجَالْ الدِّينْ، سَجَّلَوْهُمْ فِي كِتَابْ تَارِيخْ مُلُوكْ بَنِي إِسْرَائِيلْ لَحَدِّي فِي وَكِتْ وِلَيْد وِلَيْدَهْ لِأَلْيَاشِبْ الْأُسْمَهْ يُوحَنَانْ.

²⁴ وَ كُبَارَاتْ اللَّاوِيِّينْ، هُمَّنْ حَشَبْيَا وَ شَرَبْيَا وَ يَشُوعْ وَ بِنُوِّي وَ قَدْمِيِيلْ. وَ مِثِلْ الْمَلِكْ دَاوُدْ نَبِي اللّٰهْ أَمَرَاهُمْ، هُمَّنْ وَ أَخْوَانْهُمْ يِسَوُّوا فِرْقَتِيْن مُلْقَابِلِينْ. كُلُّهُمْ بَحْمُدُوا وَ بَشْكُرُوا اللّٰهْ، الْفِرْقَةْ الْوَاحِدَةْ تَشْكُرْ وَ الْفِرْقَةْ الْآخَرَةْ كَمَانْ تَرْفَعْ لَيْهَا.

²⁵ وَ مَتَّنْيَا وَ بَقْبُقْيَا وَ عُبَدْيَا كُلَ مَعَاهُمْ. وَ مَشُلَّامْ وَ طَلْمُونْ وَ عَقُوبْ، هُمَّنْ حُرَّاسْ الْمَخَازِنْ الْقَاعِدِينْ جَنْب خَشُمْ بِيبَانْ بَيْت اللّٰهْ.

²⁶ وَ النَّاسْ دَوْل قَاعِدِينْ يَخْدُمُوا فِي وَكِتْ يُيَقِيمْ قَاعِدْ كَبِيرْ رُجَالْ الدِّينْ وَ نَحَمْيَا قَاعِدْ حَاكِمْ. وَ فِي الْوَكِتْ دَا، عَزْرَا كُلَ قَاعِدْ كَاتِبْ وَ رَاجِلْ دِينْ. وَ يُيَقِيمْ دَا، هُو وِلَيْد يَشُوعْ وَ يَشُوعْ وِلَيْد يُوصَادِقْ.

عيد كمِّلين بُنى دُرْدُر المدينة

²⁷ وَ وَكِتْ كَمَّلَوْا بُنَى دُرْدُرْ مَدِينَةْ الْقُدُسْ، نَادَوْا اللَّاوِيِّينْ مِنْ حِلَّالْهُمْ أَشَانْ يَجُوا فِي الْمَدِينَةْ وَ يِعَيُّدُوا. وَ وَكِتْ اللَّاوِيِّينْ جَايِينْ، جَابَوْا مَعَاهُمْ نَقَاقِيرْ وَ جِقِنْدِيَّةْ وَ أَمْ سِبَيْبَةْ أَشَانْ يَشْكُرُوا وَ يِغَنُّوا بِفَرْحَةْ كَبِيرَةْ هَنَا كَمِّلِينْ الدُّرْدُرْ.

²⁸ وَ مِثِلْ دَا، الْغَنَّايِينْ جَوْا مِنْ الْحِلَّالْ الْجَنْب مَدِينَةْ الْقُدُسْ وَ مِنْ حِلَّةْ نَطُوفَا وَ الْحِلَّالْ التَّابْعِينْهَا

²⁹ وَ مِنْ حِلَّةْ بَيْت قِلْقَالْ وَ حِلَّالْ قَبَعْ وَ عَزْمَاوَتْ وَ الزِّرَاعَةْ الْمُجَاوِرِينْهُمْ. هُمَّنْ جَوْا مِنْ حِلَّالْهُمْ الْبَنَوْهُمْ وَ لَمَّوْا فِي مَدِينَةْ الْقُدُسْ.

³⁰ رُجَالْ الدِّينْ وَ اللَّاوِيِّينْ طَهَّرَوْا نُفُوسْهُمْ وَ سَوَّوْا الشَّعَبْ كُلَ طَاهِرِينْ. وَ طَهَّرَوْا الدُّرْدُرْ بِبِيبَانَهْ كُلَ.

³¹ وَ أَنَا نَحَمْيَا قَسَّمْت كُبَارَاتْ الدِّينْ وَ كُبَارَاتْ شَعَبْ يَهُوذَا فِرْقَتِيْن وَ رَكَّبْتُهُمْ فِي الدُّرْدُرْ. فِرْقَةْ وَاحِدَةْ هَنَا الْغَنَّايِينْ مَاشَةْ فِي الدُّرْدُرْ بِنُصّ الزَّيْنَةْ عَلَيْ خَشُمْ الْبَابْ الْبِنَادُوهْ بَابْ الزِّبَالَةْ.

³² وَ وَرَاهُمْ مَاشِينْ هُشَاعْيَا وَ نُصّ كُبَارَاتْ شَعَبْ يَهُوذَا

³³ وَ عَزَرْيَا وَ عَزْرَا وَ مَشُلَّامْ

³⁴ وَ يَهُوذَا وَ بَنْيَامِينْ وَ شَمَعْيَا وَ إِرْمِيَا.

^35-36 وَ بَتَّانْ وَرَاهُمْ رُجَالْ الدِّينْ الْيَضُرْبُوا الْبُرُنْجِي وَ هُمَّنْ زَكَرِيَّا وَ أَخْوَانَهْ شَمَعْيَا وَ عَزَرِيلْ وَ مِلَلَايْ وَ قِلَلَايْ وَ مَاعَايْ وَ نَتَنِيلْ وَ يَهُوذَا وَ حَنَانِي. وَ جُدُودْ زَكَرِيَّا، هُمَّنْ أَسَافْ وَ زَكُّورْ وَ مِكَايَا وَ مَتَّنْيَا وَ شَمَعْيَا وَ يُونَتَانْ. زَكَرِيَّا مَعَ أَخْوَانَهْ شَايْلِينْ آلَاتْ الْغِنَيْ مِثِلْ آلَاتْ الْأَمَرْ بَيْهُمْ الْمَلِكْ دَاوُدْ نَبِي اللّٰهْ. وَ الْقَاعِدْ فِي رَاسْ النَّاسْ دَوْل كُلَّ كَيْ، هُو عَزْرَا الْكَاتِبْ.

³⁷ وَكِتْ وَصَّلَوْا فِي بَابْ عَيْن أَلْمِي، الدَّرِبْ مَاشِي فَوْق قِدَّامْهُمْ فِي الْجَبَلْ هَنَا مَدِينَةْ دَاوُدْ بِعَتَبَاتْ. وَ هُمَّنْ طَلَعَوْا فَوْق فِي رَاسْ الدُّرْدُرْ وَ قَاعِدِينْ يِشِيفُوا مَدِينَةْ دَاوُدْ مِنْ فَوْق وَ مَاشِينْ لَحَدِّي بَابْ الْأَلْمِي الْقَاعِدْ بِالنُّصّ الصَّبْحَانِي.

³⁸ وَ الْفِرْقَةْ الْآخَرَةْ هَنَا الْغَنَّايِينْ كَمَانْ مَاشَةْ بِنُصّ الدُّرْدُرْ الْآخَرْ وَ أَنَا وَرَاهُمْ وَ نُصّ الشَّعَبْ كُلَ مَعَايِ. أَنِحْنَ مَاشِينْ وَ فُتْنَا بِبَيْت الْمُرَاقَبَةْ الْبِنَادُوهْ الْفُرُنْ وَ مَاشِينْ لَحَدِّي فِي الْبَكَانْ الْبِنَادُوهْ الدُّرْدُرْ الْوَسِيعْ.

³⁹ وَ مَشَيْنَا فُتْنَا بَابْ أَفْرَايِمْ وَ الْبَابْ الْقَدِيمْ وَ بَابْ الْحُوتْ وَ فُتْنَا بَيْت الْمُرَاقَبَةْ هَنَا حَنَنِيلْ وَ بَيْت الْمُرَاقَبَةْ الْبِنَادُوهْ مِيَةْ وَ فُتْنَا بَابْ الْغَنَمْ وَ وَقَفْنَا فِي الْبَابْ الْبِنَادُوهْ بَابْ السِّجِنْ.

⁴⁰ وَ بَعَدْ دَا، الْفِرْقَتِيْن هَنَا الْغَنَّايِينْ وَ أَنَا مَعَ نُصّ الْكُبَارَاتْ وَقَفْنَا فِي بَيْت اللّٰهْ.

⁴¹ وَ بَتَّانْ رُجَالْ الدِّينْ الْأَسَامَيْهُمْ أَلِيَاقِيمْ وَ مَعَسِيَّا وَ مِنْيَامِينْ وَ مِكَايَا وَ أَلِيُعْنَايْ وَ زَكَرِيَّا وَ حَنَنْيَا، هُمَّنْ دَوْل قَاعِدِينْ يَضُرْبُوا الْبُرُنْجِي.

⁴² وَ مَعَسِيَّا وَ شَمَعْيَا وَ أَلِعَازَرْ وَ عُزِّي وَ يُوحَنَانْ وَ مَلْكِيَّا وَ عِلَامْ وَ عِزَارْ كُلَ قَاعِدِينْ مَعَاهُمْ. وَ هُمَّنْ غَنَّايِينْ تِحِتْ مُرَاقَبَةْ يِزْرَحْيَا.

⁴³ فِي الْيَوْم دَا، دَبَحَوْا ضَحَايَا كَتِيرِينْ وَ فِرْحَوْا أَشَانْ الرَّبّ فَرَّحَاهُمْ زِيَادَةْ. وَ الْعَوِينْ وَ الْعِيَالْ كُلَ فِرْحَوْا وَ النَّاسْ قَاعِدِينْ يَسْمَعَوْا فَرْحَةْ مَدِينَةْ الْقُدُسْ مِنْ بَعِيدْ.

هدايا رجال الدين و اللاوِيِّين

⁴⁴ وَ فِي نَفْس الْيَوْم دَا، خَطَّوْا نَاسْ مَسْؤُولِينْ فِي الْمَخَازِنْ الْبُخُطُّوا فَوْقهُمْ الزَّكَاةْ وَ الْعُشُورْ وَ أَوَّلْ إِنْتَاجْ الْقَطَعَوْه مِنْ الزِّرَاعَةْ الْمُحَوِّقِينْ كُلَّ الْحِلَّالْ. وَ الْخُمَامْ الْبُخُطُّوهْ فِي الْمَخَازِنْ دَا، حَسَبْ كَلَامْ التَّوْرَاةْ وَاجِبْ يَنْطُوهْ لِرُجَالْ الدِّينْ وَ لِلَّاوِيِّينْ. وَ شَعَبْ يَهُوذَا مَبْسُوطِينْ مِنْ خِدْمَةْ رُجَالْ الدِّينْ وَ اللَّاوِيِّينْ

⁴⁵ الْقَاعِدِينْ يَخْدُمُوا لِإِلٰـهُّمْ وَ يِسَوُّوا خِدْمَةْ الطِّهَارَةْ. الْغَنَّايِينْ وَ حُرَّاسْ الْبِيبَانْ كُلَ قَاعِدِينْ يِسَوُّوا خِدْمِتْهُمْ مِثِلْ الْمَلِكْ دَاوُدْ مَعَ وِلَيْدَهْ سُلَيْمَانْ أَمَرَوْهُمْ بَيَّهْ.

⁴⁶ مِنْ زَمَانْ، فِي وَكِتْ هَنَا الْمَلِكْ دَاوُدْ وَ أَسَافْ، خَطَّوْا مَسْؤُولِينْ فِي الْغَنَّايِينْ الْيَشْكُرُوا الرَّبّ.

⁴⁷ وَ فِي وَكِتْ زَرُبَابِلْ وَ نَحَمْيَا، بَنِي إِسْرَائِيلْ يَنْطُوا كُلَّ يَوْم الْقِسِمْ الْوَاجِبْ يَنْطُوهْ لِلْغَنَّايِينْ وَ لِحُرَّاسْ الْبِيبَانْ. وَ لِلَّاوِيِّينْ كُلَ، قَاعِدِينْ يَنْطُوهُمْ الْقِسِمْ الْوَاجِبْ وَ كُلَّ اللَّاوِيِّينْ كَمَانْ قَاعِدِينْ يَنْطُوا مِنَّهْ الْقِسِمْ الْمُخَصَّصْ لِرُجَالْ الدِّينْ الْهُمَّنْ مِنْ ذُرِّيَّةْ هَارُونْ.