نَاحُوم 3 - الكتاب المقدس بالعربي الدارجي هنا تشاد

نِينَوَى أنْملت بالجنازات

¹ الْعَذَابْ لِمَدِينَةْ الدَّمّ. هِي كُلَّهَا كَيْ مَلَانَةْ بِكِدِبْ وَ نَهِبْ وَ دَايْماً الدِّمَّةْ وَاقْعَةْ فَوْقهَا.

² وَ فِي الْمَدِينَةْ، يِنْسَمِعْ حِسّ السَّوْط وَ حَرَكَةْ دَوَرَانْ الْعَجَلَاتْ وَ الْخَيْل يِقَلُّبُوا وَ عَرَبَاتْ الْحَرِبْ يِنَطُّطُوا.

³ وَ سِيَادْ الْخَيْل يَهْجُمُوا وَ السُّيُوفْ يَبُرْقُوا وَ الْحُرَابْ يِرَارُوا. وَ الْمَجْرُوحِينْ كَتِيرِينْ وَ الْجِثَثْ مَا عِنْدُهُمْ حِسَابْ وَ الْمَيْتِينْ بَلَا عَدَدْ لَحَدِّي النَّاسْ يِتَّرْتَعَوْا فِي الْجَنَازَاتْ.

اللّه يعاقِب نِينَوَى الشرْموطة

⁴ مَدِينَةْ نِينَوَى أَشَّرْمَطَتْ مِثِلْ شَرْمُوطَةْ وَ هِي سِتّ الْجَمَالْ وَ سِتّ السِّحِرْ. هِي عَبَّدَتْ الْأُمَمْ بِشَرْمَطَتْهَا وَ عَبَّدَتْ الْقَبَايِلْ بِسِحِرْهَا.

⁵ دَاهُو كَلَامْ اللّٰهْ الْقَادِرْ: «أَكِيدْ أَنَا نُقُمّ ضِدِّكِ وَ نَرْفَعْ خَلَقْكِ وَ نُخُطَّهْ لَيْكِ فِي وِجِهْكِ. وَ نِوَصِّفْ عِرَيْكِ لِلْأُمَمْ وَ عَيْبكِ لِلْمَمَالِكْ.

⁶ وَ نُخُطّ لَيْكِ فِي رَاسْكِ كُلَّ مُحَرَّمَاتْكِ وَ نِعَيِّبْكِ وَ نِسَوِّيكِ مَثَلْ لِلْآخَرِينْ.

⁷ وَ أَيِّ نَادُمْ الْيِشِيفْكِ يَجْرِي مِنْكِ بَعِيدْ وَ يُقُولْ: ‹نِينَوَى خِرْبَتْ. يَاتُو الْيِحِنّ فَوْقهَا؟ وَ مِنْ وَيْن نَلْقَى نَاسْ الْيِصَبُّرُوهَا؟›»

نِينَوَى تقع مِثِل مدينة طِيبَة

⁸ يَا نِينَوَى، تَحْسِبِي نَفِسْكِ أَخَيْر مِنْ مَدِينَةْ طِيبَةْ الْفِي بَلَدْ مَصِرْ وَلَّا؟ هِي قَاعِدَةْ أَمْبَيْنَاتْ رُجُولْ النِّيلْ وَ أَلْمِي حَايِقْهَا. وَ بَحَرْ حَامِيهَا وَ بَحَرْ دُرْدُرْهَا. وَ بَيْدَا كُلَ، هِي مَا نِجَتْ.

⁹ بَلَدْ الْحَبَشَةْ وَ بَلَدْ مَصِرْ، دَوْل قُوِّتْهَا الْأَبَداً مَا تِكَمِّلْ. وَ بَلَدْ فُوطْ وَ بَلَدْ لِيبِيَا كُلَ فَزَعْهَا.

¹⁰ وَ لَاكِنْ مَدِينَةْ طِيبَةْ كُلَ شَالَوْهَا وَ وَدَّوْا سُكَّانْهَا فِي الْغُرْبَةْ. وَ أَطْفَالْهَا كَتَلَوْهُمْ فِي كُلَّ شَوَارِعْهَا. وَ لِسِيَادْ الشَّرَفْ هَنَا الْمَدِينَةْ، الْعُدْوَانْ قَسَّمَوْهُمْ بِأَمْ عِيَيْدَاتْ لِيِسَوُّوهُمْ عَبِيدْ. وَ كُبَارَاتْ طِيبَةْ كُلَ جَنْزَرَوْهُمْ.

¹¹ أَيْوَى، يَا نِينَوَى، إِنْتِ تَسْكَرَيْ مِنْ التَّعَبْ وَ تِلَّبَّدَيْ وَ تِفَتِّشِي بَكَانْ التَّلْجَأَيْ فَوْقَهْ مِنْ عُدْوَانْكِ.

عسْكر نِينَوَى بِقوا ضعيفين

¹² يَا مَدِينَةْ نِينَوَى، كُلَّ بَكَانَاتْكِ الْقَوِيِّينْ مِثِلْ التِّينْ النَّجِيضْ. كَنْ الرِّيحْ تِهِزَّهْ، يَقَعْ فِي خَشُمْ الْجِيعَانْ.

¹³ شِيفِي عَسْكَرْكِ! بِقَوْا فِي أُسُطْكِ ضَعِيفِينْ مِثِلْ الْعَوِينْ. وَ بِيبَانْكِ أَنْفَتَحَوْا مَرَّةْ وَاحِدْ لِعُدْوَانْكِ وَ النَّارْ أَكَلَتْ حَوَادِرْهُمْ.

¹⁴ أَمْلَيْ خَزَّانَاتْكِ أَلْمِي قُبَّالْ مَا يِحَاصُرُوكُو وَ شَدِّدِي بَكَانَاتْكِ الْقَوِيِّينْ. وَ شِيلِي طِينَةْ وَ عَجِّنِيهَا وَ سَلِّلِي لَيْكِ دِرِنْقَيْل.

¹⁵ وَ بَيْدَا كُلَ، النَّارْ تَاكُلْكِ وَ السَّيْف يِوَدِّرْكِ. وَ الْعُدْوَانْ يَاكُلُوكِ مِثِلْ الْجَرَادْ يَاكُلْ الزَّرَعْ. يَا نِينَوَى، سُكَّانْكِ بِقَوْا كَتِيرِينْ مِثِلْ جَرَادْ أَيْوَى، كَتِيرِينْ مِثِلْ سَارْ اللَّيْل.

¹⁶ وَ كَتَّرْتِ عَدَدْ تُجَّارْكِ زِيَادَةْ مِنْ نُجُومْ السَّمَاءْ. وَ لَاكِنْ هَسَّعْ، هُمَّنْ مِثِلْ جَرَادْ يِفَتُّحُوا جَنَاحَيْهُمْ وَ يِطِيرُوا خَلَاصْ.

¹⁷ وَ حُرَّاسْكِ مِثِلْ جَرَادْ وَ قُيَّادْكِ مِثِلْ سَحَابَايِةْ سَارْ اللَّيْل الْيَنْزِلْ فِي الزَّرَايِبْ فِي وَكْت الْبَرِدْ. وَ لَاكِنْ وَكِتْ الْحَرَّايْ تَطْلَعْ، يِعَرِّدْ وَ مَا يَعَرْفُوا وَيْن هُو مَشَى.

¹⁸ يَا مَلِكْ بَلَدْ أَشُورْ، فُرَّاسَكْ سَكَتَوْا وَ مَسَائِيلَكْ الْمِثِلْ رُعْيَانْ مَاتَوْا. وَ شَعَبَكْ شَتَّوْا فِي الْجِبَالْ مِثِلْ الْغَنَمْ وَ مَا فِي رَاعِي الْيِلِمُّهُمْ.

¹⁹ وَ جِرَاحَكْ مَا يِلْعَالَجْ وَ دَا جِرَاحْ الْيَكْتُلْ. وَ كُلَّ النَّاسْ السِّمْعَوْا خَبَرَكْ، يِصَفُّقُوا وَ يَفْرَحَوْا. أَشَانْ كُلَّ النَّاسْ دَاقَوْا فَسَالْتَكْ الْمَا عِنْدَهَا حَدّ.