نَاحُوم 2 - الكتاب المقدس بالعربي الدارجي هنا تشاد

مدينة نِينَوَى تقع

¹ يَا سُكَّانْ نِينَوَى، فِي مُهَاجِمِينْ جَايِينْ لَيْكُو! أَحَرْسُوا بَكَانْكُو الْقَوِي وَ رَاقُبُوا فِي الدُّرُوبْ. أَرْبُطُوا صُلُبْكُو وَ أَبْقَوْا قَوِيِّينْ لِلْحَرِبْ.

² حَتَّى كَانْ الْمُخَرِّبِينْ خَرَّبَوْا ذُرِّيَّةْ يَعْقُوبْ وَ دَمَّرَوْا شَدَرْهُمْ كُلَ، اللّٰهْ يِقَبِّلْ لَيْهُمْ شَرَفْهُمْ مِثِلْ يِقَبِّلْ شَرَفْ بَنِي إِسْرَائِيلْ.

³ وَ دَرَقْ فُرَّاسَهْ الْعَدُو مَمْسُوحْ بِبُهْيَةْ حَمْرَةْ وَ عَسْكَرَهْ لَابْسِينْ خُلْقَانْ حُمُرْ. وَ وَكِتْ جَاهِزِينْ لِلْحَرِبْ، عَرَبَاتَهْ يَمُرْقُوا شَرَارْ وَ الْحُرَابْ يِنْهَزَّوْا.

⁴ وَ عَرَبَاتْ الْحَرِبْ يَجْرُوا فِي الشَّوَارِعْ بِشِدَّةْ وَ جَارِيِينْ فِي أُسْط الْمَدِينَةْ مِثِلْ ضَيّ الْبَرَّاقَةْ التَّشْلَعْ.

⁵ وَ مَلِكْ نِينَوَى نَادَى قُيَّادَهْ وَ لَاكِنْ هُمَّنْ يِتَّرْتَعَوْا فِي مَشِيهُمْ. يَجْرُوا لِلدُّرْدُرْ وَ يِجَهُّزُوا نُفُوسْهُمْ لِيَحْمُوهْ.

سُكّان نِينَوَى يعرُّدوا

⁶ طَوَّالِي، السَّدّ اللَّازْمِينْ بَيَّهْ أَلْمِي الْبَحَرْ أَنْكَسَرْ وَ قَصِرْ الْمَلِكْ وَقَعْ.

⁷ وَ الْمَلِكَةْ سَلَّبَوْهَا وَ شَالَوْهَا وَ خَدَّامَاتْهَا كَارْبَاتْ دُيُودْهِنْ وَ يُنُوحَنْ حِسِّهِنْ مِثِلْ الْحَمَامْ.

⁸ وَ نِينَوَى بِقَتْ مِثِلْ خَزَّانْ أَلْمِي الْيِنَقِّطْ وَ سُكَّانْهَا عَرَّدَوْا مِثِلْ أَلْمِي الْجَارِي. وَكِتْ يُقُولُوا لَيْهُمْ: «أَقِيفُوا! أَقِيفُوا» كُلَ، مَا فِي نَادُمْ مِنْهُمْ يِنْلَفِتْ.

⁹ أَنْهَبَوْا الْفُضَّةْ وَ أَنْهَبَوْا الدَّهَبْ! غُنَى الْمَدِينَةْ أَبَداً مَا يِكَمِّلْ وَ خُمَامْهَا الْغَالِي كُلَ كَتِيرْ.

¹⁰ نِينَوَى بِقَتْ نَقَعَةْ فَاضِيَةْ وَ خَرَابْ. وَ نَاسْهَا قُلُوبْهُمْ أَنْقَطَعَوْا وَ رِجْلَيْهُمْ بَرَدَوْا. وَ بُطُونْهُمْ كُلَ يَرْجُفُوا وَ وُجُوهُّمْ بِقَوْا ضُلُمْ.

فُرّاس نِينَوَى طردوهم

¹¹ وَ وَيْن مَرْبَطْ الدِّيدَانْ وَ مَرْقَدْ عِيَالْهُمْ؟ كَنْ الدُّودْ وَ مَرْتَهْ مَرَقَوْا كُلَ، نَادُمْ مَا يِبَشْتِنْ عِيَالْهُمْ.

¹² الدُّودْ يَقْنُصْ لِعِيَالَهْ وَ يَخَنِقْ لِمَرْتَهْ. وَ يَمْلَا مَرْبَطَهْ بِالصَّيْد الْهُو كَتَلَهْ وَ بِالرِّمَمْ الْهُو شَرَّطَاهُمْ.

¹³ وَ دَاهُو كَلَامْ اللّٰهْ الْقَادِرْ: «أَكِيدْ نُقُمّ ضِدِّكِ، يَا مَدِينَةْ نِينَوَى. أَيْوَى، عَرَبَاتْكِ هَنَا الْحَرِبْ، نِسَوِّيهُمْ رُمَادْ. وَ فُرَّاسْكِ الْمِثِلْ الدِّيدَانْ، السَّيْف يَكْتُلْهُمْ. وَ أَنَا نِوَقِّفْ قَنِيصْكِ فِي الْبَلَدْ وَ حِسّ رُسُلْكِ بَتَّانْ مَا يِنْسَمِعْ.»