مِيخا 6 - الكتاب المقدس بالعربي الدارجي هنا تشاد

اللّه يجيب شعبه في المحْكمة

¹ أَسْمَعَوْا الْكَلَامْ الْيُقُولَهْ لَيِّ اللّٰهْ: «قُمّ سَوِّي شَرِيعَةْ قِدَّامْ الْحُجَارْ وَ خَلِّي الْجِبَالْ يَسْمَعَوْا حِسَّكْ.

² يَا الْجِبَالْ! أَسْمَعَوْا شَكْوَةْ اللّٰهْ! إِنْتُو يَا أَسَاسْ الْأَرْض الْقَوِي، خُطُّوا بَالْكُو! اللّٰهْ يِجِيبْ شَعَبَهْ فِي الشَّرِيعَةْ وَ يُلُومْ بَنِي إِسْرَائِيلْ.»

³ وَ اللّٰهْ قَالْ: «أَنَا سَوَّيْت لَيْكُو شُنُو، يَا شَعَبِي؟ وَ كِكَّيْف أَنَا عَيَّيْتكُو؟ رُدُّوا لَيِّ!

⁴ وَ دَا أَشَانْ أَنَا مَرَقْتُكُو مِنْ بَلَدْ مَصِرْ وَلَّا؟ أَشَانْ فَدَيْتكُو مِنْ الْعُبُودِيَّةْ وَلَّا؟ أَشَانْ رَسَّلْت مُوسَى وَ هَارُونْ وَ مَرْيَمْ لِيُقُودُوكُو وَلَّا؟

⁵ يَا شَعَبِي! أَذَّكَّرَوْا مُؤآمَرَةْ بَلَاقْ مَلِكْ مُوَابْ ضِدُّكُو وَ كِكَّيْف بَلْعَامْ وِلَيْد بَعُورْ رَدَّ لَيَّهْ وَ قَالْ نِسَوِّي لَيْكُو إِلَّا الْخَيْر. أَذَّكَّرَوْا كِكَّيْف قَمَّيْتُوا مِنْ شِطِّيمْ صَبَاحْ بَحَرْ الْأُرْدُنْ وَ وَصَّلْتُوا فِي أَرْضُكُو فِي قِلْقَالْ. وَ بَيْدَا، تَعَرْفُوا عَدَالَةْ اللّٰهْ.»

الشيّء اليقرِّب للّه

⁶ بِشُنُو نِقَرِّبْ لِلّٰهْ؟ بِشُنُو نِقَرِّبْ لِلْإِلٰـهْ الْعَالِي؟ هَلْ نِقَرِّبْ لَيَّهْ بِعَجَّالْ أَوْلَادْ سَنَةْ النِّقَدِّمْهُمْ ضَحَايَا مُحَرَّقِينْ وَلَّا؟

⁷ هَلْ اللّٰهْ يَقْبَلْ ضَحَايَا هَنَا آلَافْ الْكُبْشَانْ؟ وَلَّا يَقْبَلْ هَدَايَا هَنَا دِهِنْ كَتِيرْ مِثِلْ أَلْمِي الْوَادِي؟ هَلْ نِقَدِّمْ وِلَيْدِي الْبِكِرْ فِي شَانْ عِصْيَانِي؟ وَلَّا نِقَدِّمْ وِلَيْد صُلْبِي فِي شَانْ ذَنْبِي؟

⁸ يَا بَنِي آدَم، اللّٰهْ خَبَّرَكْ بِالشَّيّءْ الْعَدِيلْ وَ بِالشَّيّءْ الْهُو يِدَوْرَهْ مِنَّكْ. سَوِّي الْعَدَالَةْ وَ حِبّ الْخَيْر وَ مَسْكِنْ نَفْسَكْ وَ أَمْشِي عَدِيلْ قِدَّامْ إِلٰـهَكْ.

اللّه يعاقِب مدينة القدس

⁹ دَاهُو اللّٰهْ قَاعِدْ يِنَادِي سُكَّانْ الْمَدِينَةْ وَ يِنَجِّي الْيَخَافَوْا مِنَّهْ: «أَسْمَعَوْا، يَا نَاسْ قَبِيلَةْ يَهُوذَا اللَّمِّينْ فِي الْمَدِينَةْ.

¹⁰ فِي مَالْ هَوَانْ قَاعِدْ فِي بَيْت الْعَاصِي. نَاسْ يِسْتَعْمَلَوْا مِكْيَالْ مَغْشُوشْ الْيِغَضِّبْنِي. هَلْ نِقَصِّدْ بِالْحَرَامْ دَا وَلَّا؟

¹¹ هَلْ نِبَرِّي سِيدْ الْمِيزَانْ الْمَا عَدِيلْ؟ وَلَّا نِبَرِّي النَّادُمْ الْيِكِيل بِكَوْرَوْ هَنَا غَشّ؟

¹² فِي الْمَدِينَةْ، فِيَّهْ نَاسْ غَنِيِّينْ مَلَانِينْ بِالْعُنُفْ. وَ سُكَّانْهَا يِحَجُّوا بِالْكِدِبْ وَ لِسَانْهُمْ يِكَلِّمْ بِالْغَشّ.

¹³ وَ فِي شَانْ دَا، أَنَا ضَرَبْتُكُو بِمَرَضْ وَ خَرَّبْتُكُو بِسَبَبْ ذُنُوبْكُو.

¹⁴ إِنْتُو تَاكُلُوا وَ مَا تَشْبَعَوْا وَ الْجُوعْ يَسْكُنْ فِي بُطُونْكُو. إِنْتُو تَخْزُنُوا وَ مَا تَقْدَرَوْا تَحْفَضَوْه عَدِيلْ. وَ الْحَفَضْتُوهْ كُلَ، أَنَا نِسَلِّمَهْ لِلْحَرِبْ.

¹⁵ إِنْتُو تَزْرَعَوْا وَ مَا تَقْطَعَوْا. وَ تَرْحَكَوْا الزَّيْتُونْ وَ مَا تِلْمَسَّحَوْا بِدِهْنَهْ. وَ تَرْحَكَوْا الْعِنَبْ وَ مَا تَشَرْبَوْا مِنْ خَمَرَهْ.

¹⁶ وَ إِنْتُو تِتَابُعُوا الْعَادَةْ الْفَسْلَةْ هَنَا الْمَلِكْ عُمْرِي وَ الْعَمَلْ الْهَوَانْ هَنَا عَايِلَةْ مَلِكْ أَخَابْ وَ تُرُوغُوا حَسَبْ خِطِّتْهُمْ. وَ فِي شَانْ دَا، أَنَا نِسَلِّمْ مَدِينِتْكُو لِلْخَرَابْ وَ سُكَّانْهَا يَبْقَوْا شِمَّيْتَةْ وَ يِعَيُّبُوكُو مِثِلْ يِعَيُّبُوا كُلَّ شَعَبِي.»