مِيخا 5 - الكتاب المقدس بالعربي الدارجي هنا تشاد

يلْدوا حاكِم في بيت لحم

¹ وَ هَسَّعْ دَا، يَا سُكَّانْ مَدِينَةْ الْقُدُسْ، جَرُّحُوا نُفُوسْكُو مِنْ الْحِزِنْ. حَاصَرَوْا مَدِينِتْكُو وَ بِالْعِصَيْ ضَرَبَوْا وِجِهْ حَاكِمْ بَنِي إِسْرَائِيلْ.

² وَ اللّٰهْ قَالْ: «إِنْتِ، يَا بَيْت لَحَمْ أَفْرَاتَةْ، إِنْتِ صَغَيْرَةْ لِتِنْحَسْبِي أَمْبَيْن عَايِلَاتْ يَهُوذَا. وَ لَاكِنْ نَادُمْ وَاحِدْ يَمْرُقْ مِنْكِ الْيَحْكِمْ بِأُسْمِي فِي بَنِي إِسْرَائِيلْ. وَ قَعَرَهْ جَايِ مِنْ بَعِيدْ مِنْ الزَّمَنْ الْقَدِيمْ.»

³ وَ اللّٰهْ يِخَلِّي شَعَبَهْ لِوَكِتْ شِيَّةْ لَحَدِّي الْمَرَةْ الْغَلْبَانَةْ تَلْدَ وِلَيْدهَا. وَ أَخْوَانَّا الْفَضَّلَوْا فِي الْغُرْبَةْ يِقَبُّلُوا مِنْ هِنَاكْ وَ يِلِمُّوا مَعَ بَنِي إِسْرَائِيلْ.

⁴ وَ هُو يُقُمّ وَ يُقُودْهُمْ مِثِلْ رَاعِي بِقُدْرَةْ اللّٰهْ وَ بِعَظَمَةْ أُسُمْ اللّٰهْ إِلٰـهَهْ. وَ شَعَبَهْ يَسْكُنُوا بِأَمَانْ أَشَانْ قُدُرْتَهْ تِلْوَسَّعْ لَحَدِّي آخِرْ الْأَرْض.

⁵ وَ هُو ذَاتَهْ يِجِيبْ السَّلَامْ. وَكِتْ عَسْكَرْ بَلَدْ أَشُورْ يَهْجُمُوا بَلَدْنَا وَ يَدْخُلُوا فِي قُصُورْنَا، أَنِحْنَ نِقَوُّمُوا ضِدُّهُمْ سَبْعَةْ كُبَارَاتْ وَ تَمَانَةْ شُيُوخْ شَعَبْ.

⁶ وَ هُمَّنْ يَحْكُمُوا بَلَدْ أَشُورْ بِالْسَّيْف وَ بَلَدْ نِمْرُودْ بِالْحُرَابْ. وَ الْحَاكِمْ الْاللّٰهْ يِرَسِّلَهْ يِنَجِّينَا مِنْ إِيدْ الْأَشُورِيِّينْ وَكِتْ يَهْجُمُوا بَلَدْنَا وَ يَدْخُلُوا أَرْضِنَا.

ذُرّية يَعْقُوب يبْقوا مِثِل دود

⁷ وَ الْفَضَّلَوْا مِنْ ذُرِّيَّةْ يَعْقُوبْ يُكُونُوا فِي أُسُطْ شُعُوبْ كَتِيرِينْ. يَبْقَوْا مِثِلْ مَطَرَةْ الْجَايَةْ مِنْ اللّٰهْ وَ مِثِلْ كَرَنْج فِي الْقَشّ. مَا يَرْجَوْا شَيّءْ مِنْ نَادُمْ وَ لَا يُخُطُّوا عَشَمْهُمْ فِي إِنْسَانْ.

⁸ وَ الْفَضَّلَوْا مِنْ ذُرِّيَّةْ يَعْقُوبْ يُكُونُوا بَيْن الْأُمَمْ فِي أُسُطْ شُعُوبْ كَتِيرِينْ. يَبْقَوْا مِثِلْ دُودْ أَمْبَيْن حَيْوَانَاتْ الْغَابَةْ وَ مِثِلْ فَرْخ الدُّودْ أَمْبَيْن دَوْر الْغَنَمْ. وَ فِي أَيِّ بَكَانْ الْيَمْشِي، يَكْتُلْ وَ يِشَرِّطْ وَ مَا فِي نَادُمْ الْيِخَلِّصْ مِنَّهْ.

⁹ يَا الْفَضَّلَوْا مِنْ ذُرِّيَّةْ يَعْقُوبْ، أَرْفَعَوْا إِيدَيْكُو ضِدّ خُصْمَانْكُو وَ دَمُّرُوا كُلَّ عُدْوَانْكُو.

اللّه يدمِّر كل شيّء

¹⁰ دَاهُو كَلَامْ اللّٰهْ: «فِي الْيَوْم دَا، نِدَمِّرْ خَيْلكُو مِنْ أُسُطْكُو وَ نِكَسِّرْ عَرَبَاتْكُو هَنَا الْحَرِبْ.

¹¹ وَ نِدَمِّرْ مُدُنْ بَلَدْكُو وَ نِهَدِّمْ كُلَّ بَكَانَاتْكُو الْقَوِيِّينْ.

¹² وَ نِدَمِّرْ سِحِرْكُو الْفِي إِيدْكُو وَ مَا يُكُونْ فِي أُسُطْكُو الْيِحَجِّي بِعِلِمْ الْغَيْب.

¹³ وَ نِدَمِّرْ مِنْ أُسُطْكُو أَصْنَامْكُو وَ الْحُجَارْ الْغَزَّيْتُوهُمْ لِلْعِبَادَةْ وَ أَبَداً مَا تَسْجُدُوا لِشَيّءْ السَّوَّيْتُوهْ بِإِيدْكُو.

¹⁴ وَ نِمَلِّطْ مِنْ أُسُطْكُو الْعِيدَانْ الْغَزَّيْتُوهُمْ لِعِبَادَةْ أَشِيرَةْ وَ نِدَمِّرْ مُدُنْكُو.

¹⁵ وَ بِغَضَبْ وَ زَعَلْ، نِشِيلْ التَّارْ فِي الْأُمَمْ الْأَبَوْا مَا يَسْمَعَوْنِي.»