مِيخا 1 - الكتاب المقدس بالعربي الدارجي هنا تشاد

¹ وَ دَاهُو كَلَامْ اللّٰهْ الْقَالَهْ فِي رُؤْيَةْ لِمِيخَا الْمِنْ حِلَّةْ مُورَشَتْ الْبُخُصّ مُدُنْ السَّامِرَةْ وَ مَدِينَةْ الْقُدُسْ. وَ دَا فِي أَيَّامْ حُكُمْ يُوتَامْ وَ أَحَازْ وَ حِزْقِيَّا مُلُوكْ مَمْلَكَةْ يَهُوذَا.

اللّه يلوم شعبه

² أَسْمَعَوْا، يَا كُلَّ الشُّعُوبْ! أَسْمَعَيْ، يَا الْأَرْض وَ كُلَّ شَيّءْ الْفَوْقكِ. اللّٰهْ الرَّبّ يَشْهَدْ ضِدُّكُو. أَيْوَى، الرَّبّ يُلُومْكُو مِنْ بَيْتَهْ الْمُقَدَّسْ.

³ دَاهُو اللّٰهْ مَارِقْ مِنْ بَكَانَهْ وَ يَنْزِلْ وَ يَمْشِي فِي الْبَكَانَاتْ الْعَالِيِينْ هَنَا الْأَرْض.

⁴ وَ الْجِبَالْ يُمُوعُوا تِحْتَهْ وَ حُجَارْ خُشُومْ الْوُدْيَانْ يِنْقَطْعُوا مِثِلْ الشَّمْعَةْ فِي النَّارْ وَ مِثِلْ أَلْمِي الصَّبَّوْه فِي دِلَّيَّةْ.

⁵ وَ دَا كُلَّ فِي شَانْ عِصْيَانْ ذُرِّيَّةْ يَعْقُوبْ وَ فِي شَانْ ذُنُوبْ بَنِي إِسْرَائِيلْ. وَ يَاتُو اللَّزَّ ذُرِّيَّةْ يَعْقُوبْ فِي الْعِصْيَانْ؟ دِي مَا مَدِينَةْ السَّامِرَةْ وَلَّا؟ وَ يَاتُو الْحَرَّشْ بَنِي يَهُوذَا لِيَعَبُدُوا إِلٰـهَاتْ فِي الْبَكَانَاتْ الْعَالِيِينْ؟ دِي مَا مَدِينَةْ الْقُدُسْ وَلَّا؟

⁶ وَ اللّٰهْ قَالْ: «السَّامِرَةْ نِسَوِّيهَا كَوْم هَنَا تُرَابْ وَ كَدَادَةْ الْيَزْرَعَوْا فَوْقهَا جِنَيْنَاتْ الْعِنَبْ. وَ الْحُجَارْ الْبَنَوْهَا بَيْهُمْ، نِدَفِّقْهُمْ فِي الْوَادِي وَ أَسَاسْهَا، نِخَلِّيهْ يِبِينْ.

⁷ وَ كُلَّ أَصْنَامْهَا يِلْكَسَّرَوْا وَ كُلَّ مَالْ بَيْتهُمْ، نِحَرِّقَهْ بِنَارْ. وَ نِخَرِّبْ كُلَّ أَصْنَامْهَا أَشَانْ هِي صَنَعَتْهُمْ بِمَالْ أُجْرَةْ شَرْمَطَتْهَا. وَ هَسَّعْ بِحَدِيدْ الْأَصْنَامْ دَوْل يِأَجُّرُوا شَرَامِيطْ آخَرَاتْ.»

النواح لحِلّال بلد يَهُوذَا

⁸ وَ فِي شَانْ دَا، أَنَا مِيخَا نَحْزَنْ وَ نَبْكِي بِحِزِنْ وَ نَمْشِي بَلَا نِعْلَيْ وَ عَرْيَانْ. وَ نَبْكِي مِثِلْ الْبَعَشَوْم وَ نِكِرّ مِثِلْ النَّعَامْ.

⁹ مَرَضْ السَّامِرَةْ مَا عِنْدَهْ عِلَاجْ وَ هُو لِحِقْ لَحَدِّي بَلَدْ يَهُوذَا. وَ لِحِقْ بِيبَانْ مَدِينَةْ شَعَبِي أَيْوَى، لِحِقْ أُسُطْ مَدِينَةْ الْقُدُسْ.

¹⁰ مَا تِخَبُّرُوا عُدْوَانَّا فِي قَاتْ وَ مَا تَبْكُوا قِدَّامْهُمْ. وَ فِي بَيْت أَفْرَحْ، أَلْمَرْمَغَوْا فِي الْعَجَاجْ مِنْ الْحِزِنْ.

¹¹ وَ سُكَّانْ شَافِيرْ، يِوَدُّوهُمْ فِي الْغُرْبَةْ فِي الْعَيْب وَ الْعِرَيْ. وَ سُكَّانْ صَنَانْ يَخَافَوْا، مَا يَمُرْقُوا مِنْ حِلِّتْهُمْ. نَاسْ بَيْت إِصَالْ يَبْكُوا مِنْ الْحِزِنْ وَ مَا يَفْزَعَوْكُو.

¹² وَ سُكَّانْ مَرُوتْ يَخَافَوْا مِنْ خَيْرهُمْ يِوَدِّرْ أَشَانْ الشَّرّ نَزَلْ مِنْ اللّٰهْ وَ وَصَّلْ بِيبَانْ مَدِينَةْ الْقُدُسْ.

¹³ يَا سُكَّانْ لَكِيشْ، أَرْبُطُوا عَرَبَاتْ الْحَرِبْ فِي الْخَيْل أَشَانْ إِنْتُو لَزَّيْتُوا فِي الذَّنِبْ صَهْيُون الْمِثِلْ بِنَيَّةْ وَ فِيكُو أَنْلَقَى عِصْيَانْ بَنِي إِسْرَائِيلْ.

¹⁴ وَ فِي شَانْ دَا، وَاجِبْ إِنْتُو تِنْفَرْقُوا مِنْ مُورَشَتْ قَاتْ. وَ حِلَّةْ أَكْزِيبْ تَكْدِبْ، مَا تِجِيبْ فَزَعْ لِمُلُوكْ إِسْرَائِيلْ.

¹⁵ يَا سُكَّانْ مَرِيشَةْ، نِجِيبْ لَيْكُو بَتَّانْ نَادُمْ يِشِيلْ بَلَدْكُو. وَ كُبَارَاتْ بَنِي إِسْرَائِيلْ الْعِنْدُهُمْ شَرَفْ يِعَرُّدُوا وَ يِلَّبَّدَوْا فِي عَدُلَّامْ.

¹⁶ يَا مَدِينَةْ الْقُدُسْ الْمِثِلْ مَرَةْ، أَقْطَعَيْ شَعَرْكِ وَ زَيِّنِي رَاسْكِ أَشَانْ عِيَالْكِ التِّحِبِّيهُمْ. أَبْقَيْ مُوَلِّعَةْ مِثِلْ الصَّقُرْ أَشَانْ يِوَدُّوا عِيَالْكِ فِي الْغُرْبَةْ بَعِيدْ مِنْكِ.