مَلاخِـي 4 - الكتاب المقدس بالعربي الدارجي هنا تشاد

يوم اللّه جايِ

¹ وَ اللّٰهْ الْقَادِرْ قَالْ: «دَاهُو الْيَوْم دَا جَايِ حَامِي مِثِلْ الْفُرُنْ. وَ كُلَّ الْمُسْتَكْبِرِينْ وَ الْعَاصِيِينْ يَبْقَوْا مِثِلْ الْقَشّ. وَ الْيَوْم الْجَايِ دَا يَحْرِقْهُمْ وَ لَا يِخَلِّي لَيْهُمْ عِرِقْ وَ لَا فِرِعْ.

² وَ لَاكِنْ لَيْكُو إِنْتُو الْخَايْفِينْ مِنِّي، عَدَالْتِي تَطْلَعْ لَيْكُو مِثِلْ الْحَرَّايْ وَ ضَيَّهَا يِجِيبْ الشِّفَاءْ. وَ إِنْتُو تَمُرْقُوا وَ تِنَطُّطُوا مِثِلْ عَجَّالْ مَرَقَوْا مِنْ زَرِيبِتْهُمْ.

³ فِي الْيَوْم النُّقُمّ فَوْقَهْ، إِنْتُو تِفَجُّقُوا الْعَاصِيِينْ وَ يَبْقَوْا مِثِلْ رُمَادْ تِحِتْ رِجْلَيْكُو.» وَ دَا، اللّٰهْ الْقَادِرْ بَسْ قَالَهْ.

اللّه واعد بجيّة إِلِيَاس

⁴ «أَذَّكَّرَوْا كِتَابْ التَّوْرَاةْ الْأَنْطَيْتَهْ لِعَبْدِي مُوسَى فِي جَبَلْ حُورِيبْ. وَ لِكُلَّ بَنِي إِسْرَائِيلْ، أَنْطَيْتهُمْ قَوَانِينْ وَ شُرُوطْ.

⁵ «دَاهُو أَنَا نِرَسِّلْ لَيْكُو النَّبِي إِلِيَاسْ وَ دَا قُبَّالْ يَوْم اللّٰهْ مَا يَجِي وَ الْيَوْم دَا عَظِيمْ وَ مُخِيفْ.

⁶ وَ هُو يِجِيبْ السَّلَامْ بَيْن الْأَبَّهَاتْ وَ عِيَالْهُمْ وَ بَيْن الْعِيَالْ وَ أَبَّهَاتْهُمْ. وَ مِثِلْ دَا، مَا نَجِي نِدَمِّرْ الْبَلَدْ.»