لُوقا 9 - الكتاب المقدس بالعربي الدارجي هنا تشاد

خِدْمة الرُسُل الأتنا عشر

¹ وَ عِيسَى نَادَى تَلَامِيذَهْ الْأَتْنَا عَشَرْ وَ أَنْطَاهُمْ سُلْطَةْ وَ قُدْرَةْ أَشَانْ يَطُرْدُوا أَيِّ شَيْطَانْ وَ يَشْفُوا الْمَرْضَانِينْ.

² وَ رَسَّلَاهُمْ لِيِبَشُّرُوا النَّاسْ بِمَمْلَكَةْ اللّٰهْ وَ يَشْفُوا الْمَرْضَانِينْ.

³ وَ قَالْ لَيْهُمْ: «مَا تِشِيلُوا مَعَاكُو شَيّءْ لِلسَّفَرْ وَ لَا عَصَاةْ وَ لَا مُخْلَاةْ وَ لَا أَكِلْ وَ لَا قُرُسْ. وَ مَا تِشِيلُوا مَعَاكُو خُلْقَانْ هَنَا غِيَارْ.

⁴ وَ أَيِّ بَيْت التِّدَلُّوا فَوْقَهْ، أَقْعُدُوا فَوْقَهْ لَحَدِّي تَمُرْقُوا مِنْ الْحِلَّةْ.

⁵ وَ أَيِّ بَكَانْ الْمَا يَقْبَلَوْكُو فَوْقَهْ، أَمُرْقُوا مِنَّهْ وَ حِتُّوا الْعَجَاجْ مِنْ رِجْلَيْكُو وَ دَا يَبْقَى لَيْكُو شَهَادَةْ.»

⁶ وَ خَلَاصْ، هُمَّنْ قَمَّوْا يُرُوغُوا فِي كُلَّ الْحِلَّالْ وَ يِبَلُّغُوا الْبِشَارَةْ فِي أَيِّ بَكَانْ وَ يَشْفُوا الْمَرْضَانِينْ.

برْجال أفْكار هِرُودُس

⁷ وَ هِرُودُسْ مُحَافِظْ دَارْ الْجَلِيلْ سِمِعْ خَبَرْ هَنَا كُلَّ شَيّءْ الْعِيسَى قَاعِدْ يِسَوِّيهْ وَ هُو أَلْعَجَّبْ بِلْحَيْن. أَشَانْ نَاسْ وَاحِدِينْ قَاعِدِينْ يُقُولُوا يَحْيَى بَعَثْ مِنْ أُسْط الْمَيْتِينْ.

⁸ وَ آخَرِينْ قَاعِدِينْ يُقُولُوا النَّبِي إِلِيَاسْ بَانْ وَ آخَرِينْ بَتَّانْ يُقُولُوا نَادُمْ مِنْ أَنْبِيَاء الزَّمَانْ بَعَثْ.

⁹ وَ هِرُودُسْ قَالْ: «يَحْيَى دَا، أَنَا قَطَعْت رَاسَهْ. وَ لَاكِنْ دَا يَاتُو الْأَنَا نَسْمَعْ مِنَّهْ خَبَرْ مِثِلْ دَا؟» وَ هُو دَوَّرْ يِشِيفْ عِيسَى.

المسيح أنْطى أكِل لـ‍ 5 000 ناس

¹⁰ وَ الرُّسُلْ قَبَّلَوْا لِعِيسَى وَ خَبَّرَوْه بِكُلَّ شَيّءْ السَّوَّوْه. وَ هُو شَالَاهُمْ مَعَايَهْ. وَ عِيسَى وَ تَلَامِيذَهْ قَمَّوْا مَشَوْا وِحَيْدهُمْ فِي حِلَّةْ بَيْت صَيْدَا.

¹¹ وَ نَاسْ كَتِيرِينْ سِمْعَوْا الْخَبَرْ وَ مَشَوْا وَرَايَهْ. وَ هُو لَاقَاهُمْ عَدِيلْ وَ حَجَّى لَيْهُمْ بِمَمْلَكَةْ اللّٰهْ وَ شَفَى أَيِّ نَادُمْ الْيِدَوْر هُو يَشْفِيهْ.

¹² وَ الْمَغْرِبْ قَرَّبَتْ وَ الرُّسُلْ الْأَتْنَا عَشَرْ جَوْا لَيَّهْ وَ قَالَوْا: «خَلِّي النَّاسْ يَمْشُوا فِي الْحِلَّالْ وَ الْفُرْقَانْ الْمُجَاوِرِينْ لِيَلْقَوْا بَكَانْ يَرُقْدُوا فَوْقَهْ وَ يَلْقَوْا أَكِلْ. أَشَانْ الْبَكَانْ الْأَنِحْنَ قَاعِدِينْ فَوْقَهْ دَا خَلَاءْ.»

¹³ لَاكِنْ عِيسَى رَدَّ لَيْهُمْ وَ قَالْ: «لَا. إِنْتُو بَسْ أَنْطُوهُمْ أَكِلْ.» وَ هُمَّنْ قَالَوْا لَيَّهْ: «عِنْدِنَا خَمْسَةْ خُبْزَةْ وَ حُوتْ إِتْنَيْن بَسْ. بَتَّانْ إِنْتَ تِدَوْر أَنِحْنَ نَمْشُوا نَشْرُوا أَكِلْ لِكُلَّ النَّاسْ دَوْل وَلَّا؟»

¹⁴ وَ فِي مَعَاهُمْ قَرِيبْ 5 000 رُجَالْ. وَ عِيسَى قَالْ لِتَلَامِيذَهْ: «قَعُّدُوهُمْ خَمْسِينْ خَمْسِينْ.»

¹⁵ وَ هُمَّنْ قَعَّدَوْا النَّاسْ مِثِلْ هُو قَالَهْ لَيْهُمْ.

¹⁶ وَ عِيسَى شَالْ الْخُبْزَةْ الْخَمْسَةْ وَ الْحُوتْ الْإِتْنَيْن. وَ رَفَعْ رَاسَهْ عَلَيْ السَّمَاءْ وَ شَكَرْ اللّٰهْ. وَ كَسَّرْ الْخُبْزَةْ وَ الْحُوتْ وَ أَنْطَاهُمْ لِتَلَامِيذَهْ أَشَانْ يِقَسُّمُوهُمْ لِلنَّاسْ.

¹⁷ وَ كُلَّ النَّاسْ أَكَلَوْا لَحَدِّي شِبْعَوْا. وَ خَلَاصْ التَّلَامِيذ لَمَّوْا الْأَكِلْ الْفَضَّلْ وَ مَلَوْا بَيَّهْ 12 قُفَّةْ.

بُطْرُس شهد لعِيسَى

¹⁸ وَ يَوْم وَاحِدْ، عِيسَى قَاعِدْ يِصَلِّي وِحَيْدَهْ. وَ تَلَامِيذَهْ مَعَايَهْ. وَ عِيسَى سَأَلَاهُمْ وَ قَالْ: «النَّاسْ قَاعِدِينْ يُقُولُوا أَنَا يَاتُو؟»

¹⁹ وَ رَدَّوْا لَيَّهْ وَ قَالَوْا: «نَاسْ وَاحِدِينْ يُقُولُوا إِنْتَ يَحْيَى الْمُغَطِّسْ. وَ نَاسْ آخَرِينْ يُقُولُوا إِنْتَ النَّبِي إِلِيَاسْ وَ نَاسْ آخَرِينْ بَتَّانْ يُقُولُوا كَدَرْ إِنْتَ نَادُمْ وَاحِدْ مِنْ الْأَنْبِيَاء الْفَاتَوْا وَ بَعَثْت مِنْ أُسْط الْمَيْتِينْ.»

²⁰ وَ بَتَّانْ سَأَلَاهُمْ وَ قَالْ: «وَ لَاكِنْ إِنْتُو، تُقُولُوا شُنُو؟ تُقُولُوا أَنَا يَاتُو؟» وَ بُطْرُسْ رَدَّ لَيَّهْ وَ قَالْ: «إِنْتَ الْمَسِيحْ الْاللّٰهْ رَسَّلَهْ.»

²¹ لَاكِنْ عِيسَى أَمَرَاهُمْ وَ حَذَّرَاهُمْ بِتَحْذِيرْ شَدِيدْ أَشَانْ مَا يِأَوْرُوا بَيَّهْ أَيِّ نَادُمْ.

²² وَ قَالْ: «أَكِيدْ، إِبْن الْإِنْسَانْ يَتْعَبْ تَعَبْ شَدِيدْ. الشُّيُوخْ وَ كُبَارَاتْ رُجَالْ الدِّينْ وَ الْعُلَمَاءْ يَابَوْه. وَ إِبْن الْإِنْسَانْ يَكْتُلُوهْ وَ اللّٰهْ يَبْعَثَهْ مِنْ أُسْط الْمَيْتِينْ فِي الْيَوْم التَّالِتْ.»

²³ وَ عِيسَى قَالْ لَيْهُمْ كُلُّهُمْ: «كَنْ أَيِّ نَادُمْ يِدَوْر يِتَابِعْنِي، خَلِّي يِشِيفْ نَفْسَهْ رَخِيصَةْ لَيَّهْ وَ يِلْحَمَّلْ تَعَبْ الصَّلِيبْ كُلَّ يَوْم وَ يِتَابِعْنِي لِلْمَوْت.

²⁴ وَ أَيِّ نَادُمْ الْيِدَوْر يِنَجِّي نَفْسَهْ، يِوَدِّرْهَا. لَاكِنْ أَيِّ نَادُمْ الْيِوَدِّرْ نَفْسَهْ فِي شَانِي أَنَا، هُو دَا يَنْجَى.

²⁵ شُنُو الْفَايْدَةْ كَنْ نَادُمْ رِبِحْ كُلَّ الْمَالْ الْفِي الدُّنْيَا وَ لَاكِنْ وَدَّرْ نَفْسَهْ أَوْ هِلِكْ؟

²⁶ وَ أَيِّ نَادُمْ الْيَنْكُرْنِي بِسَبَبْ الْعَيْب الْيَلْقَى مِنْ النَّاسْ، أَنَا إِبْن الْإِنْسَانْ نَنْكُرَهْ وَكِتْ نِقَبِّلْ بِقُدُرْتِي الْمَجِيدَةْ وَ بِقُدْرَةْ الْمَجِيدَةْ هَنَا أَبُويِ اللّٰهْ وَ مَلَائِكَتَهْ الْمُقَدَّسِينْ.

²⁷ وَ نُقُولْ لَيْكُو الْحَقّ، فِي نَاسْ وَاحِدِينْ الْقَاعِدِينْ هِنِي مَا يُمُوتُوا قُبَّالْ مَا يِشِيفُوا مَمْلَكَةْ اللّٰهْ.»

المسيح في نور المجْد

²⁸ وَ بَعَدْ قَرِيبْ تَمَانَةْ يَوْم مِنْ عِيسَى قَالْ الْكَلَامْ دَا، هُو طَلَعْ فِي رَاسْ حَجَرْ أَشَانْ يِصَلِّي. وَ شَالْ مَعَايَهْ بُطْرُسْ وَ يُوحَنَّا وَ يَعْقُوبْ.

²⁹ وَ وَكِتْ هُو قَاعِدْ يِصَلِّي، وِجْهَهْ أَلْغَيَّرْ قِدَّامْهُمْ وَ خَلَقَهْ بِقِي أَبْيَضْ كَرّ مِثِلْ نُورْ شَدِيدْ.

³⁰ وَ دَاهُو! نَاسَيْن بَانَوْا وَ بَدَوْا يِحَجُّوا مَعَايَهْ وَ هُمَّنْ النَّبِي مُوسَى وَ النَّبِي إِلِيَاسْ.

³¹ وَ بَانَوْا فِي نُورْ مَجِيدْ وَ قَاعِدِينْ يِحَجُّوا لَيَّهْ بِمَرِقِينَهْ مِنْ الدُّنْيَا الْيِتِمّ فِي مَدِينَةْ الْقُدُسْ.

³² وَ أَوَّلْ بُطْرُسْ وَ رُفْقَانَهْ، النَّوْم شَالَاهُمْ لَاكِنْ قَمَّوْا مِنْ النَّوْم وَ شَافَوْا عِيسَى فِي نُورْ مَجِيدْ وَ الرُّجَالْ الْإِتْنَيْن الْوَاقْفِينْ مَعَايَهْ.

³³ وَ وَكِتْ الرُّجَالْ الْإِتْنَيْن دَوْل دَوَّرَوْا يِنْفَرْقُوا مِنْ عِيسَى، بُطْرُسْ حَجَّى لَيَّهْ وَ قَالْ: «سَيِّدْنَا، بِقِي لَيْنَا سَمَحْ كَدَرْ أَنِحْنَ قَاعِدِينْ هِنِي. خَلِّينَا نِسَوُّوا لَقَادِيبْ تَلَاتَةْ، وَاحِدَةْ لَيْك وَ وَاحِدَةْ لِمُوسَى وَ وَاحِدَةْ لِإِلِيَاسْ.» وَ حَجَّى وَ مَا فَكَّرْ فِي كَلَامَهْ.

³⁴ وَ وَكِتْ قَاعِدْ يِحَجِّي الْكَلَامْ دَا، سَحَابَايْ وَاحِدَةْ جَاتْ غَطَّتْهُمْ. وَ هُمَّنْ خَافَوْا بِلْحَيْن.

³⁵ وَ حِسّ مِنْ لُبّ السَّحَابَايْ أَنْسَمَعْ وَ قَالْ: «دَا بَسْ إِبْنِي وَ أَنَا عَزَلْتَهْ. أَسْمَعَوْا كَلَامَهْ.»

³⁶ وَ وَكِتْ الْحِسّ دَا كَمَّلْ خَلَاصْ، شَافَوْا عِيسَى قَاعِدْ وِحَيْدَهْ. وَ تَلَامِيذَهْ قَعَدَوْا سَاكِتْ. وَ فِي الْوَكِتْ دَاكْ، مَا أَوْرَوْا نَادُمْ بِالشَّيّءْ الشَّافَوْه.

الوِلَيْد العِنْده أم فِتْفِت

³⁷ وَ أَمْبَاكِرْ، دَلَّوْا مِنْ الْحَجَرْ وَ نَاسْ كَتِيرِينْ لَاقَوْهُمْ.

³⁸ وَ نَادُمْ وَاحِدْ فِي أُسْط النَّاسْ عَاطْ لِعِيسَى وَ قَالْ: «يَا سَيِّدْنَا! نَشْحَدَكْ أَشَانْ تَجِي تِشِيفْ وِلَيْدِي. هُو وِلَيْدِي الْوَحِيدْ. آخَرْ مَا عِنْدِي.

³⁹ وَ فِي شَيْطَانْ وَاحِدْ الدَّايْماً يَكُرْبَهْ. عَجَلَةْ كَيْ يَجِي فَوْقَهْ وَ الْوِلَيْد يَصْرَخْ وَ أَمْ فِتْفِتْ تَرْمِيهْ لَحَدِّي رِغْوَةْ تَمْرُقْ مِنْ خَشْمَهْ. الشَّيْطَانْ مَا يِخَلِّيهْ، إِلَّا يِتَعِّبَهْ شَدِيدْ وَ قَاعِدْ يِعَذِّبَهْ بِلْحَيْن.

⁴⁰ وَ أَنَا شَحَدْت تَلَامِيذَكْ أَشَانْ يَطُرْدُوا مِنَّهْ الشَّيْطَانْ وَ لَاكِنْ هُمَّنْ مَا قِدْرَوْا.»

⁴¹ وَ عِيسَى قَالْ: «يَا النَّاسْ الْعُوُجْ وَ مَا عِنْدُكُو إِيمَانْ! لَحَدِّي مَتَى نَقْعُدْ مَعَاكُو وَ نِلْحَمَّلْكُو؟ جِيبْ وِلَيْدَكْ هِنِي!»

⁴² وَ وَكِتْ الْوِلَيْد قَاعِدْ يِقَرِّبْ لِعِيسَى، الشَّيْطَانْ رَمَاهْ تِحِتْ وَ سَوَّى لَيَّهْ أَمْ فِتْفِتْ. لَاكِنْ عِيسَى كَشَّ لِلشَّيْطَانْ وَ شَفَى الْوِلَيْد وَ قَبَّلَهْ لِأَبُوهْ.

⁴³ وَ كُلَّ النَّاسْ أَلْعَجَّبَوْا بِلْحَيْن لِقُدْرَةْ اللّٰهْ الْمَجِيدَةْ. وَ لَاكِنْ وَكِتْ كُلَّ النَّاسْ قَاعِدِينْ يِحَجُّوا بِكُلَّ الْعَجَايِبْ الْعِيسَى قَاعِدْ يِسَوِّيهُمْ، هُو حَجَّى لِتَلَامِيذَهْ

⁴⁴ وَ قَالْ: «أَسْمَعَوْا كَلَامِي وَ أَكُرْبُوهْ فِي قُلُوبْكُو. بَعَدْ شِيَّةْ، اللّٰهْ يِسَلِّمْ إِبْن الْإِنْسَانْ لِلنَّاسْ.»

⁴⁵ لَاكِنْ مَا فِهْمَوْا كَلَامَهْ. مَعَنَى كَلَامَهْ مُلَبَّدْ لَيْهُمْ لَحَدِّي مَا عِرْفَوْه. وَ مَا سَأَلَوْه مِنَّهْ أَشَانْ هُمَّنْ خَايْفِينْ.

الصغيّر بس الكبير

⁴⁶ وَ تَلَامِيذ عِيسَى بَدَوْا يِلْغَالَطَوْا أَمْبَيْنَاتْهُمْ فِي يَاتُو مِنْهُمْ الْيَبْقَى كَبِيرْ.

⁴⁷ وَ عِيسَى عِرِفْ فِكِرْ قُلُوبْهُمْ وَ جَابْ لَيْهُمْ وِلَيْد صَغَيَّرْ وَ وَقَّفَهْ فِي جَنْبَهْ.

⁴⁸ وَ قَالْ لَيْهُمْ: «النَّادُمْ الْيَقْبَلْ الْوِلَيْد دَا بِأُسْمِي، هُو يَقْبَلْنِي أَنَا. وَ الْيَقْبَلْنِي يَقْبَلْ الرَّسَّلَانِي. أَشَانْ النَّادُمْ الصَّغَيَّرْ مِنْكُو كُلُّكُو، هُو بَسْ الْكَبِيرْ.»

⁴⁹ وَ يُوحَنَّا رَدَّ لَيَّهْ وَ قَالْ: «سَيِّدْنَا، شِفْنَا نَادُمْ وَاحِدْ الْقَاعِدْ يَطْرُدْ الشَّوَاطِينْ بِأُسْمَكْ. وَ دَوَّرْنَا نَدْحَرَوْه أَشَانْ هُو مَا قَاعِدْ يِتَابِعَكْ مَعَانَا.»

⁵⁰ وَ عِيسَى قَالْ: «مَا تَدْحَرَوْه. أَشَانْ النَّادُمْ الْمَا يِدَاوِسْكُو هُو يِسَاعِدْكُو.»

الحِلّة السامِريّة

⁵¹ وَ الْوَكِتْ الْيِنْرَفِعْ فَوْقَهْ عِيسَى فِي السَّمَاءْ قَرَّبْ. وَ أَشَانْ دَا، هُو قَرَّرْ وَ شَالْ نِيَّةْ لِيِوَجِّهْ عَلَيْ مَدِينَةْ الْقُدُسْ.

⁵² وَ رَسَّلْ مُرَسَّلِينْ قِدَّامَهْ أَشَانْ يِجَهُّزُوا لَيَّهْ كُلَّ شَيّءْ. وَ دَخَلَوْا فِي حِلَّةْ وَاحِدَةْ وَ هِي حِلَّةْ هَنَا سَامِرِيِّينْ.

⁵³ لَاكِنْ نَاسْهَا أَبَوْه لِعِيسَى أَشَانْ هُو مُوَجِّهْ عَلَيْ مَدِينَةْ الْقُدُسْ.

⁵⁴ وَكِتْ تَلَامِيذَهْ يَعْقُوبْ وَ يُوحَنَّا شَافَوْا كَدَرْ النَّاسْ دَوْل أَبَوْه لِعِيسَى، هُمَّنْ قَالَوْا: «يَا سَيِّدْنَا، نِنَادُوا نَارْ تَنْزِلْ مِنْ السَّمَاءْ تَاكُلْهُمْ وَلَّا؟»

⁵⁵ لَاكِنْ عِيسَى أَنْلَفَتْ لَيْهُمْ وَ هَرَجَاهُمْ.

⁵⁶ وَ مَشَوْا فِي حِلَّةْ آخَرَةْ.

الشُروط لليتابُعوه

⁵⁷ وَ وَكِتْ عِيسَى وَ جَمَاعْتَهْ مَاشِينْ فِي الدَّرِبْ، نَادُمْ وَاحِدْ جَاءْ حَجَّى لَيَّهْ وَ قَالْ: «نِتَابِعَكْ فِي أَيِّ بَكَانْ التَّمْشِي فَوْقَهْ.»

⁵⁸ وَ عِيسَى رَدَّ لَيَّهْ وَ قَالْ: «الْبَعَشَوْم عِنْدَهْ نُقْرَةْ وَ الطَّيْر عِنْدَهْ عُشّ وَ لَاكِنْ إِبْن الْإِنْسَانْ مَا عِنْدَهْ بَكَانْ يَرْقُدْ فَوْقَهْ.»

⁵⁹ وَ عِيسَى نَادَى نَادُمْ آخَرْ وَ قَالْ: «تَعَالْ تَابِعْنِي.» لَاكِنْ النَّادُمْ رَدَّ لَيَّهْ وَ قَالْ: «سَيِّدْنَا، أَنْطِينِي إِذِنْ أَشَانْ نَدْفِنْ أَبُويِ قُبَّالْ مَا نِتَابِعَكْ.»

⁶⁰ وَ عِيسَى رَدَّ لَيَّهْ وَ قَالْ: «خَلِّي الْمَيْتِينْ يَدْفُنُوا مَيْتِينْهُمْ. لَاكِنْ إِنْتَ دَا، أَمْشِي بَلِّغْ بِشَارَةْ مَمْلَكَةْ اللّٰهْ.»

⁶¹ وَ بَتَّانْ نَادُمْ آخَرْ قَالْ: «يَا السَّيِّدْ، أَنَا نِدَوْر نِتَابِعَكْ. لَاكِنْ أَوَّلْ كَيْ أَنْطِينِي إِذِنْ أَشَانْ نِقَبِّلْ فِي بَيْتِي نِسَلِّمْ أَهَلِي.»

⁶² وَ عِيسَى قَالْ لَيَّهْ: «كَنْ نَادُمْ بَدَا يَخْدِمْ بِالْحَرَّاتَةْ وَ يِشِيفْ وَرَايَهْ، هُو مَا جَاهِزْ لِمَمْلَكَةْ اللّٰهْ.»