لُوقا 7 - الكتاب المقدس بالعربي الدارجي هنا تشاد

إيمان هنا كبير العسْكر

¹ وَ بَعَدْ عِيسَى قَالْ كُلَّ الْكَلَامْ دَا لِلنَّاسْ، هُو مَشَى فِي حِلَّةْ كَفَرْ نَاحُومْ.

² وَ فِي نَادُمْ أَجْنَبِي هِنَاكْ وَ هُو كَبِيرْ عَسْكَرْ الرَّوْمَانِيِّينْ وَ هُو عِنْدَهْ عَبِدْ وَاحِدْ مَرْضَانْ قَرِيبْ يُمُوتْ. وَ كَبِيرْ الْعَسْكَرْ يِرِيدَهْ لِعَبْدَهْ بِلْحَيْن.

³ وَ وَكِتْ سِمِعْ خَبَرْ هَنَا عِيسَى، هُو رَسَّلْ لَيَّهْ نَاسْ مِنْ شُيُوخْ الْيَهُودْ أَشَانْ يَطُلْبُوا مِنَّهْ يَجِي يَشْفِي عَبْدَهْ.

⁴ وَ مَشَوْا لِعِيسَى وَ شَحَدَوْه بِلْحَيْن وَ قَالَوْا: «الْأَجْنَبِي دَا، عِنْدَهْ حَقّ تِسَوِّي لَيَّهْ الشَّيّءْ الطَّلَبَهْ مِنَّكْ.

⁵ أَشَانْ هُو يِحِبّ شَعَبْنَا وَ بَنَى لَيْنَا بَيْت الصَّلَاةْ.»

⁶ وَ عِيسَى مَشَى مَعَاهُمْ. وَ وَكِتْ هُو قَرَّبْ لِلْبَيْت، الْعَسْكَرِي رَسَّلْ لَيَّهْ رُفْقَانَهْ أَشَانْ يِحَجُّوا لَيَّهْ. وَ قَالَوْا: «يَا سَيِّدْنَا، أَنْجَمَّ مَا تِتَعِّبْ نَفْسَكْ. أَنَا مَا عِنْدِي حَقّ لِتَدْخُلْ فِي بَيْتِي.

⁷ أَشَانْ دَا بَسْ، أَنَا ذَاتِي خِجِلْت وَ مَا مَشَيْت لَيْك. وَ لَاكِنْ قُولْ كِلْمَةْ وَاحِدَةْ بَسْ وَ خَدَّامِي يَلْقَى الْعَافَيْ.

⁸ أَشَانْ أَنَا كُلَ عِنْدِي كَبِيرْ مِنْ فَوْق لَيِّ النِّطَبِّقْ أَمْرَهْ. وَ أَنَا كُلَ مَسْؤُولْ فِي نَاسْ التِّحِتْ مِنِّي الْيِطَبُّقُوا أَمْرِي. وَ كَنْ نُقُولْ لِوَاحِدْ ‹أَمْشِي›، هُو يَمْشِي. وَ كَنْ نُقُولْ لِنَادُمْ آخَرْ ‹تَعَالْ›، هُو يَجِي. وَ كَنْ نُقُولْ لِعَبْدِي ‹سَوِّي كَيْ›، هُو يِسَوِّيهْ.»

⁹ وَ وَكِتْ عِيسَى سِمِعْ كَلَامَهْ، هُو أَلْعَجَّبْ بِلْحَيْن وَ أَنْلَفَتْ لِلنَّاسْ الْجَايِينْ وَرَايَهْ وَ قَالْ: «نُقُولْ لَيْكُو مَا لِقِيتْ نَادُمْ وَاحِدْ مِنْ بَنِي إِسْرَائِيلْ الْعِنْدَهْ إِيمَانْ شَدِيدْ مِثِلْ إِيمَانْ النَّادُمْ دَا!»

¹⁰ وَ خَلَاصْ وَكِتْ الْمُرَسَّلِينْ قَبَّلَوْا فِي الْبَيْت، شَافَوْا الْعَبِدْ لِقِي الْعَافَيْ.

المسيح قوّم صبي ميِّت

¹¹ وَ بَعَدَيْن عِيسَى مَشَى لِحِلَّةْ وَاحِدَةْ أُسُمْهَا نَايِنْ. وَ تَلَامِيذَهْ مَعَايَهْ وَ نَاسْ كَتِيرِينْ مَاشِينْ وَرَايَهْ.

¹² وَ وَكِتْ قَرَّبْ لِبَابْ الْحِلَّةْ، هُو شَافْ نَادُمْ مَيِّتْ وَ النَّاسْ مَاشِينْ يَدْفُنُوهْ. وَ الْمَيِّتْ هُو وِلَيْد وَاحِدْ فِي أَمَّهْ وَ هِي مَرَةْ أَرْمَلَةْ. وَ نَاسْ كَتِيرِينْ مِنْ الْحِلَّةْ مَاشِينْ مَعَاهَا.

¹³ وَ وَكِتْ الرَّبّ عِيسَى شَافَاهَا، قَلْبَهْ حَنَّ لَيْهَا وَ قَالْ: «مَا تَبْكِي.»

¹⁴ وَ مَشَى لِلْمَيِّتْ وَ لِمِسْ الْبَرَنْقَالْ وَ النَّاسْ الشَّايْلِينَهْ وَقَفَوْا. وَ عِيسَى قَالْ: «يَا وِلَيْدِي، نُقُولْ لَيْك قُمّ!»

¹⁵ وَ الْمَيِّتْ قَمَّ وَ حَجَّى. وَ عِيسَى أَنْطَاهْ لِأَمَّهْ.

¹⁶ وَ الْخَوْف دَخَلْ لِكُلَّ النَّاسْ وَ هُمَّنْ مَجَّدَوْا اللّٰهْ وَ قَالَوْا: «نَبِي كَبِيرْ جَاءْ فِي أُسُطْنَا! اللّٰهْ بَيَّنْ قُدُرْتَهْ لِشَعَبَهْ!»

¹⁷ وَ فِي كُلَّ دَارْ الْيَهُودِيَّةْ وَ فِي كُلَّ الْبُلْدَانْ الْمُجَاوِرِينْ، النَّاسْ سِمْعَوْا خَبَرْ هَنَا الشَّيّءْ الْعِيسَى سَوَّاهْ.

سُؤال يَحْيَى

¹⁸ وَ تَلَامِيذ يَحْيَى مَشَوْا لِسَيِّدْهُمْ وَ أَوْرَوْه بِكُلَّ شَيّءْ الْعِيسَى قَاعِدْ يِسَوِّيهْ.

¹⁹ وَ يَحْيَى نَادَى تَلَامِيذ إِتْنَيْن وَ رَسَّلَاهُمْ لِلرَّبّ عِيسَى أَشَانْ يُقُولُوا لَيَّهْ: «إِنْتَ بَسْ النَّادُمْ الْيَجِي وَلَّا وَاجِبْ نَرْجَوْا نَادُمْ آخَرْ بَتَّانْ؟»

²⁰ وَ مَشَوْا لِعِيسَى وَ قَالَوْا: «يَحْيَى الْمُغَطِّسْ رَسَّلَانَا أَشَانْ نَسْأَلَوْك ‹إِنْتَ بَسْ النَّادُمْ الْيَجِي وَلَّا وَاجِبْ نَرْجَوْا نَادُمْ آخَرْ بَتَّانْ؟›»

²¹ وَ فِي الْوَكِتْ دَا بَسْ، عِيسَى شَفَى نَاسْ كَتِيرِينْ مِنْ الْمَرْضَانِينْ وَ التَّعْبَانِينْ وَ الْمُشَوْطِنِينْ. وَ فَتَّحْ عُيُونْ عَمْيَانِينْ كَتِيرِينْ.

²² وَ عِيسَى رَدَّ لَيْهُمْ وَ قَالْ: «أَمْشُوا وَ أَوْرُوا يَحْيَى بِكُلَّ شَيّءْ الشِّفْتُوهْ وَ سِمِعْتُوهْ. الْعَمْيَانِينْ قَاعِدِينْ يِشِيفُوا وَ الْعُرُجْ يُرُوغُوا وَ الْعِنْدُهُمْ جِدَامْ يَلْقَوْا الْعَافَيْ وَ الطَّرْشَانِينْ يَسْمَعَوْا وَ الْمَيْتِينْ يَبْعَثَوْا وَ الْمَسَاكِينْ قَاعِدِينْ يَسْمَعَوْا الْبِشَارَةْ.

²³ وَ مَبْرُوكْ لِلنَّادُمْ الْمَا يِخَلِّي إِيمَانَهْ بَيِّ.»

كلام المسيح في يَحْيَى

²⁴ وَ وَكِتْ مُرَسَّلِينْ يَحْيَى مَاشِينْ، عِيسَى بَدَا يِحَجِّي فِي يَحْيَى لِلنَّاسْ الْقَاعِدِينْ مَعَايَهْ وَ قَالْ: «وَكِتْ يَحْيَى قَاعِدْ فِي الْكَدَادَةْ، إِنْتُو مَرَقْتُوا لَيَّهْ. وَ دَوَّرْتُوا تِشِيفُوا شُنُو؟ دَوَّرْتُوا تِشِيفُوا عَقَيْقَايْ بَسْ الرِّيحْ تِهِزَّهَا وَلَّا؟

²⁵ كَنْ مَا كَيْ، دَوَّرْتُوا تِشِيفُوا شُنُو؟ نَادُمْ لَابِسْ خُلْقَانْ سَمْحِينْ وَلَّا؟ لَا. أَشَانْ النَّاسْ اللَّابْسِينْ خُلْقَانْ سَمْحِينْ وَ الْعَايْشِينْ فِي بَكَانْ حَلُو قَاعِدِينْ فِي قُصُورْ الْمُلُوكْ.

²⁶ زَيْن. مَرَقْتُوا أَشَانْ تِشِيفُوا شُنُو؟ أَشَانْ تِشِيفُوا نَبِي؟ أَيْوَى، وَ نُقُولْ لَيْكُو شِفْتُوا نَادُمْ أَكْبَرْ مِنْ نَبِي.

²⁷ دَا بَسْ هُو الْبِسَبَبَهْ الْكِتَابْ يُقُولْ: <دَاهُو نِرَسِّلْ رَسُولِي قِدَّامَكْ وَ هُو يِعَدِّلْ لَيْك الدَّرِبْ.>

²⁸ وَ نُقُولْ لَيْكُو مَا فِي نَادُمْ مَوْلُودْ مِنْ مَرَةْ أَكْبَرْ مِنْ يَحْيَى الْمُغَطِّسْ. وَ لَاكِنْ النَّادُمْ الصَّغَيَّرْ فِي مَمْلَكَةْ اللّٰهْ أَكْبَرْ مِنَّهْ.

²⁹ «وَ كُلَّ النَّاسْ سِمْعَوْا كَلَامْ يَحْيَى وَ مَعَاهُمْ نَاسْ الْجَمَارِكْ كُلَ. وَ تَابَوْا مِنْ ذُنُوبْهُمْ وَ خَلَّوْا يَحْيَى يِغَطِّسْهُمْ وَ مِثِلْ دَا، أَكَّدَوْا كَدَرْ فِكِرْ اللّٰهْ عَدِيلْ.

³⁰ وَ لَاكِنْ الْفَرِيزِيِّينْ وَ عُلَمَاءْ التَّوْرَاةْ أَبَوْا مَا خَلَّوْا يَحْيَى يِغَطِّسْهُمْ. وَ بِمِثِلْ دَا، مَا قِبْلَوْا النِّيَّةْ الْاللّٰهْ عِنْدَهْ لَيْهُمْ.

³¹ «وَ نُقُولْ شُنُو فِي النَّاسْ هَنَا الْوَكِتْ الْحَالِي دَا؟ بِشَابُهُوا شُنُو؟ هُمَّنْ مِثِلْ عِيَالْ دُقَاقْ لَامِّينْ فِي الدَّوْر وَ يِنَادُوا رُفْقَانْهُمْ وَ يُقُولُوا:

³² ‹أَنِحْنَ ضَرَبْنَا لَيْكُو الصُّفَّارَةْ لَاكِنْ إِنْتُو مَا لِعِبْتُوا. أَنِحْنَ غَنَّيْنَا غِنَيْ هَنَا الْمَوْت لَاكِنْ إِنْتُو مَا بَكَيْتُوا.›

³³ أَشَانْ يَحْيَى الْمُغَطِّسْ جَاءْ لَيْكُو وَ هُو مَا يَاكُلْ أَكِلْ وَ مَا بَشْرَبْ خَمَرْ وَ قُلْتُوا هُو مُشَوْطِنْ.

³⁴ وَ بَعَدَيْن أَنَا، إِبْن الْإِنْسَانْ، جِيتْ لَيْكُو وَ أَنَا نَاكُلْ وَ نَشْرَبْ وَ تُقُولُوا: ‹هُو أَكَّالْ وَ سَكَّارِي وَ بِقِي رَفِيقْ لِنَاسْ الْجَمَارِكْ وَ الْمُذْنِبِينْ.›

³⁵ لَاكِنْ حِكْمَةْ اللّٰهْ الصَّحِيحَةْ تِنْشَافْ فِي عَمَلْ كُلَّ النَّاسْ الْيِتَابُعُوهَا.»

المُذْنِبة و الفَرِيزِي

³⁶ وَ نَادُمْ وَاحِدْ مِنْ الْفَرِيزِيِّينْ عَزَمْ عِيسَى يَاكُلْ مَعَايَهْ. وَ عِيسَى دَخَلْ فِي بَيْت الْفَرِيزِي وَ أَنْتَكَى.

³⁷ وَ فِي مَرَةْ وَاحِدَةْ مُذْنِبَةْ مَعْرُوفَةْ فِي الْحِلَّةْ. وَ وَكِتْ هِي سِمْعَتْ كَدَرْ عِيسَى عَزَمَوْه فِي بَيْت الْفَرِيزِي، هِي قَمَّتْ شَالَتْ مَاعُونْ هَنَا حَجَرْ مَلَانْ عِطِرْ وَ مَشَتْ لَيَّهْ.

³⁸ وَ وَقَفَتْ وَرَاءْ عِيسَى جَنْب رِجِلَيْنَهْ. وَ هِي قَاعِدَةْ تَبْكِي وَ بَدَتْ تِبِلّ رِجِلَيْنَهْ بِدُمُوعْهَا وَ تُقُشُّهُمْ بِشَعَرْهَا. وَ قَاعِدَةْ تِحِبّ رِجِلَيْنَهْ وَ تَمْسَحْ فَوْقهُمْ الْعِطِرْ.

³⁹ وَ الْفَرِيزِي الْعَزَمَهْ فِي بَيْتَهْ شَافْ الشَّيّءْ الْهِي قَاعِدَةْ تِسَوِّيهْ وَ فِي قَلْبَهْ قَالْ: كَنْ صَحِيحْ النَّادُمْ دَا نَبِي، أَكِيدْ هُو يَعَرِفْ الْمَرَةْ الْقَاعِدَةْ تِلَمِّسَهْ دِي يَاتِي وَ يَعَرِفْ حَالْهَا الشَّيْنَةْ أَشَانْ هِي مُذْنِبَةْ.

⁴⁰ وَ عِيسَى رَدَّ لَيَّهْ وَ قَالْ: «يَا سِمْعَانْ. نِدَوْر نُقُولْ لَيْك كَلَامْ وَاحِدْ.» وَ الْفَرِيزِي رَدَّ لَيَّهْ وَ قَالْ: «نَعَمْ، يَا مُعَلِّمْ. أَلْفَضَّلْ. حَجِّي!»

⁴¹ وَ عِيسَى قَالْ: «يَوْم مِنْ الْأَيَّامْ، فِي نَادُمْ وَاحِدْ الْيِدَيِّنْ النَّاسْ وَ عِنْدَهْ دَيْن فَوْق نَاسَيْن. وَ الْوَاحِدْ دَيْنَهْ 500 دِينَارْ وَ التَّانِي دَيْنَهْ 50 دِينَارْ.

⁴² مَا قِدْرَوْا يِكَفُّوهْ لَيَّهْ. وَ خَلَاصْ هُو سَامَحَاهُمْ مَرَّةْ وَاحِدْ. وَ نَسْأَلَكْ يَاتُو مِنْ النَّاسَيْن دَوْل يِحِبَّهْ بِزِيَادَةْ؟»

⁴³ وَ سِمْعَانْ رَدَّ لَيَّهْ وَ قَالْ: «فِي فِكْرِي أَنَا، نُقُولْ النَّادُمْ السَّامَحَوْا لَيَّهْ الدَّيْن الْكَتِيرْ يِحِبَّهْ بِزِيَادَةْ.» وَ عِيسَى قَالْ: «فِكْرَكْ صَحِيحْ.»

⁴⁴ وَ عِيسَى أَنْلَفَتْ لِلْمَرَةْ وَ حَجَّى لِسِمْعَانْ وَ قَالْ: «الْمَرَةْ دِي شِفْتَهَا وَلَّا؟ أَنَا دَخَلْت فِي بَيْتَكْ وَ إِنْتَ مَا أَنْطَيْتنِي أَلْمِي أَشَانْ نِغَسِّلْ رِجِلَيْنِي لَاكِنْ هِي بَلَّتْ رِجِلَيْنِي بِدُمُوعْهَا وَ قَشَّتْهُمْ بِشَعَرْهَا.

⁴⁵ وَ إِنْتَ مَا سَلَّمْتِنِي بِحُبّ وَ لَاكِنْ مِنْ أَنَا دَخَلْت فِي بَيْتَكْ هِي قَاعِدَةْ تِحِبّ رِجِلَيْنِي.

⁴⁶ وَ إِنْتَ مَا أَنْطَيْتنِي دِهِنْ أَشَانْ نَمْسَحْ بَيَّهْ رَاسِي لَاكِنْ هِي مَسَحَتْ عِطِرْ فِي رِجِلَيْنِي.

⁴⁷ وَ نُقُولْ لَيْك، دَا يِوَصِّفْ كَدَرْ ذُنُوبْهَا الْكَتِيرِينْ سَامَحَوْهُمْ لَيْهَا. وَ أَشَانْ دَا، هِي تِحِبّ كَتِيرْ. لَاكِنْ النَّادُمْ السَّامَحَوْا لَيَّهْ شِيَّةْ، يِحِبّ شِيَّةْ.»

⁴⁸ وَ عِيسَى قَالْ لَيْهَا: «أَكِيدْ ذُنُوبْكِ أَنْغَفَرَوْا.»

⁴⁹ وَ النَّاسْ الْقَاعِدِينْ يَاكُلُوا مَعَايَهْ قَمَّوْا يُقُولُوا أَمْبَيْنَاتْهُمْ: «هَايْ! دَا يَاتُو الْيِسَامِحْ الْمُذْنِبِينْ»؟

⁵⁰ وَ عِيسَى حَجَّى لِلْمَرَةْ بَتَّانْ وَ قَالْ: «بِسَبَبْ إِيمَانْكِ نِجِيتِ. أَمْشِي بِسَلَامْ.»