لُوقا 3 - الكتاب المقدس بالعربي الدارجي هنا تشاد

خِدْمة النبي يَحْيَى

¹ تِبَارِي سُلْطَانْ الرَّوْمَانِيِّينْ حَكَمْ مُدَّةْ 15 سَنَةْ خَلَاصْ. وَ بِلَاطُسْ الْبُنْطِي بِقِي وَالِي هَنَا دَارْ الْيَهُودِيَّةْ. وَ هِرُودُسْ بِقِي مُحَافِظْ فِي دَارْ الْجَلِيلْ وَ أَخُوهْ فِلِبُّسْ بِقِي مُحَافِظْ فِي بُلْدَانْ إِطُورِيَةْ وَ تَرَخُونِيتُسْ. وَ لِسَنِيُوسْ بِقِي مُحَافِظْ فِي إِبِيلِينَةْ.

² وَ حَنَانْ وَ قَيَافَا بِقَوْا كُبَارَاتْ رُجَالْ الدِّينْ. وَ فِي وَكِتْهُمْ دَا بَسْ، كَلَامْ اللّٰهْ نَزَلْ لِيَحْيَى وِلَيْد زَكَرِيَّا الْقَاعِدْ فِي الْكَدَادَةْ.

³ وَ هُو قَمَّ يُرُوغْ فِي كُلَّ الْكَدَادَةْ الْجَنْب بَحَرْ الْأُرْدُنْ. هُو قَاعِدْ يِنَادِي النَّاسْ أَشَانْ يُتُوبُوا. وَ يِغَطِّسْهُمْ فِي الْأَلْمِي وَ اللّٰهْ يَغْفِرْ لَيْهُمْ ذُنُوبْهُمْ.

⁴ وَ دَا مِثِلْ الْكَلَامْ الْمَكْتُوبْ فِي كِتَابْ النَّبِي إِشَعْيَا. كَلَامَهْ يُقُولْ: <فِي حِسّ قَاعِدْ يِعِيطْ فِي الْخَلَاءْ وَ يُقُولْ: «جَهُّزُوا دَرِبْ الرَّبّ وَ عَدُّلُوا لَيَّهْ الطُّرُقْ!

⁵ خَلِّي أَيِّ وَادِي يِنْدَفِنْ وَ كُلِّ جَبَلْ وَ حَجَرْ يَبْقَى قِصَيِّرْ. وَ الْبَكَانْ الْأَعْوَجْ يَبْقَى عَدِيلْ وَ الدَّرِبْ الشَّيْن يِسْتَوِي.

⁶ وَ كُلَّ النَّاسْ يِشِيفُوا النَّجَاةْ الْاللّٰهْ يِجِيبْهَا.»>

⁷ وَ نَاسْ كَتِيرِينْ مَارْقِينْ مِنْ حِلَّالْهُمْ وَ مَاشِينْ لَيَّهْ أَشَانْ هُو يِغَطِّسْهُمْ. وَ قَالْ لَيْهُمْ: «يَا عِيَالْ الدَّابِي! يَاتُو الْقَالْ لَيْكُو أَجْرُوا مِنْ الْعَذَابْ الْجَايِ؟

⁸ سَوُّوا الْعَمَلْ الْيِوَصِّفْ كَدَرْ إِنْتُو تُبْتُوا بِالصَّحِيحْ. وَ مَا تُغُشُّوا نُفُوسْكُو. مَا تُقُولُوا: ‹مَا عِنْدِنَا عَيْب أَشَانْ أَنِحْنَ عِيَالْ إِبْرَاهِيمْ.› نُقُولْ لَيْكُو اللّٰهْ يَقْدَرْ يِشِيلْ حُجَارْ مِنْ التُّرَابْ وَ يِسَوِّي مِنْهُمْ عِيَالْ لِإِبْرَاهِيمْ فِي بَدَلْكُو!

⁹ شِيفُوا، الْفَاسْ جَاهِزَةْ لِتَقْطَعْ الشَّدَرَةْ مِنْ عِرِقْهَا. أَيِّ شَدَرَةْ الْمَا تَلْدَ عِيَالْ عَدِيلِينْ يَقْطَعَوْهَا وَ يَزْقُلُوهَا فِي النَّارْ!»

¹⁰ وَ النَّاسْ قَاعِدِينْ يَسْأَلَوْا يَحْيَى وَ يُقُولُوا: «وَاجِبْ نِسَوُّوا شُنُو؟»

¹¹ وَ رَدَّ لَيْهُمْ وَ قَالْ: «النَّادُمْ الْعِنْدَهْ خُلْقَانْ إِتْنَيْن، خَلِّي يَنْطِي وَاحِدْ لِلْمَا عِنْدَهْ. وَ النَّادُمْ الْعِنْدَهْ أَكِلْ، خَلِّي يِسَوِّي نَفْس الشَّيّءْ.»

¹² وَ وَاحِدِينْ مِنْ النَّاسْ الْيِشِيلُوا الْمِيرِي كُلَ جَوْا لَيَّهْ أَشَانْ هُو يِغَطِّسْهُمْ. وَ سَأَلَوْه وَ قَالَوْا: «سَيِّدْنَا، أَنِحْنَ وَاجِبْ نِسَوُّوا شُنُو؟»

¹³ وَ يَحْيَى قَالْ لَيْهُمْ: «مَا تِشِيلُوا زِيَادَةْ مِنْ الْأَمَرَوْكُو بَيَّهْ.»

¹⁴ وَ عَسْكَرْ وَاحِدِينْ كُلَ سَأَلَوْه وَ قَالَوْا: «وَ أَنِحْنَ، وَاجِبْ نِسَوُّوا شُنُو؟» وَ رَدَّ لَيْهُمْ وَ قَالْ: «مَا تِشِيلُوا قُرُسْ مِنْ نَاسْ بِقُوءْ وَ لَا بِتُهْمَةْ بَاطْلَةْ. وَ أَبْقَوْا رَضْيَانِينْ بِقُرُسْ شَهَرْكُو.»

يَحْيَى ردّ للناس

¹⁵ وَ النَّاسْ قَاعِدِينْ يَرْجَوْا جَيَّةْ الْمَسِيحْ. وَ أَيِّ وَاحِدْ قَاعِدْ يَسْأَلْ فِي نَفْسَهْ وَ فِي فِكِرْهُمْ أَكُونْ يَحْيَى ذَاتَهْ بَسْ الْمَسِيحْ.

¹⁶ وَ يَحْيَى رَدَّ لَيْهُمْ كُلُّهُمْ وَ قَالْ: «أَنَا نِغَطِّسْكُو فِي الْأَلْمِي وَ لَاكِنْ فِي نَادُمْ قَادِرْ مِنِّي بِلْحَيْن جَايِ وَرَايِ وَ أَنَا مَا تَمَّيْت لَيَّهْ خَدَّامْ كُلَ. وَ هُو يِغَطِّسْكُو بِالرُّوحْ الْقُدُّوسْ وَ بِنَارْ.

¹⁷ وَ عِنْدَهْ طَبَقْ فِي إِيدَيْنَهْ لِيِغَرْبِلْكُو مِثِلْ الْغَلَّةْ. وَ يِلِمّ غَلِّتَهْ مِنْ الْمَدَقّ وَ يُصُبَّهَا فِي دَبَنْقِتَهْ وَ لَاكِنْ الْأُتَّابْ يُتُشَّهْ فِي النَّارْ الْمَا تُمُوتْ أَبَداً.»

¹⁸ وَ بِكَلَامْ كَتِيرْ مِثِلْ دَا، يَحْيَى وَصَّاهُمْ لِلنَّاسْ وَ بَلَّغْ لَيْهُمْ الْبِشَارَةْ.

¹⁹ وَ فِي الْوَكِتْ دَا، هِرُودُسْ الْمُحَافِظْ أَخَدْ هِرُودِيَّةْ الْهِي أَوَّلْ مَرِةْ أَخُوهْ. وَ يَحْيَى هَرَجَهْ لِهِرُودُسْ فِي شَانْ الْأَخِيدَةْ دِي وَ فِي شَانْ كُلَّ الْفَسَالَةْ الْهُو سَوَّاهَا.

²⁰ وَ هِرُودُسْ كَرَبْ يَحْيَى فِي السِّجِنْ وَ مِثِلْ دَا، هُو زَادْ فِي ذُنُوبَهْ زِيَادَةْ.

المسيح غطّسوه

²¹ وَ وَكِتْ يَحْيَى لِسَّاعْ قَاعِدْ يِغَطِّسْ النَّاسْ، عِيسَى جَاءْ وَ يَحْيَى غَطَّسَهْ. وَ وَكِتْ عِيسَى قَاعِدْ يِصَلِّي، السَّمَاوَاتْ أَنْفَتَحَوْا.

²² وَ الرُّوحْ الْقُدُّوسْ جَاءْ لَيَّهْ فِي صُورَةْ حَمَامَةْ وَ نَزَلْ فَوْقَهْ. وَ حِسّ مِنْ السَّمَاءْ أَنْسَمَعْ وَ قَالْ: «إِنْتَ بَسْ إِبْنِي وَ أَنَا نِحِبَّكْ وَ أَنَا فَرْحَانْ بَيْك بِلْحَيْن.»

جُدود المسيح

²³ وَ عِيسَى بَدَا خِدِمْتَهْ وَكِتْ عُمْرَهْ مِثِلْ 30 سَنَةْ. وَ فِي فِكِرْ النَّاسْ، هُو وِلَيْد يُوسُفْ وِلَيْد عَالِي.

²⁴ وَ عَالِي وِلَيْد مَتَّاتْ وِلَيْد لَاوِي وِلَيْد مَلْكِي وِلَيْد يَنَّا وِلَيْد يُوسُفْ.

²⁵ وَ يُوسُفْ وِلَيْد مَتَّتَايَا وِلَيْد عَمُوسْ وِلَيْد نَاحُومْ وِلَيْد حَسْلِي وِلَيْد نَقَّايْ.

²⁶ وَ نَقَّايْ وِلَيْد مَآتْ وِلَيْد مَتَّتَايَا وِلَيْد سِمْعِينْ وِلَيْد يُوسِخْ وِلَيْد يَهُوذَا.

²⁷ وَ يَهُوذَا وِلَيْد يُوحَنَّا وِلَيْد رِيسَا وِلَيْد زَرُبَابِلْ وِلَيْد شَلْتِيِيلْ وِلَيْد نِيرِي.

²⁸ وَ نِيرِي وِلَيْد مَلْكِي وِلَيْد أَدِّي وِلَيْد قُوصَمْ وِلَيْد أَلْمُودَامْ وِلَيْد عِيرْ.

²⁹ وَ عِيرْ وِلَيْد يَشُوعْ وِلَيْد أَلِعَازَرْ وِلَيْد يُورِيمْ وِلَيْد مَتَّاتْ وِلَيْد لَاوِي.

³⁰ وَ لَاوِي وِلَيْد شِمْعُونْ وِلَيْد يَهُوذَا وِلَيْد يُوسُفْ وِلَيْد يُونَانْ وِلَيْد أَلِيَاقِيمْ.

³¹ وَ أَلِيَاقِيمْ وِلَيْد مَلَيَا وِلَيْد مَنَّا وِلَيْد مَتَّاتَا وِلَيْد نَاتَانْ وِلَيْد دَاوُدْ.

³² وَ دَاوُدْ وِلَيْد يَسَّى وِلَيْد عُبَيْد وِلَيْد بُعَازْ وِلَيْد سَلْمُونْ وِلَيْد نَحْشُونْ.

³³ وَ نَحْشُونْ وِلَيْد عَمِنَدَابْ وِلَيْد أَدْمِي وِلَيْد عَرْنِي وِلَيْد حَصْرُونْ وِلَيْد فَارِصْ وِلَيْد يَهُوذَا.

³⁴ وَ يَهُوذَا وِلَيْد يَعْقُوبْ وِلَيْد إِسْحَاقْ وِلَيْد إِبْرَاهِيمْ وِلَيْد تَارَحْ وِلَيْد نَاحُورْ.

³⁵ وَ نَاحُورْ وِلَيْد سَرُوقْ وِلَيْد رَعُوْ وِلَيْد فَالَقْ وِلَيْد عِبَارْ وِلَيْد شَالَحْ.

³⁶ وَ شَالَحْ وِلَيْد قِنَانْ وِلَيْد أَرْفَكْشَادْ وِلَيْد سَامْ وِلَيْد نُوحْ وِلَيْد لَامَكْ.

³⁷ وَ لَامَكْ وِلَيْد مَتُوشَلَحْ وِلَيْد أَخْنُوخْ وِلَيْد يَارَدْ وِلَيْد مَهْلَلِيلْ وِلَيْد قِنَانْ.

³⁸ وَ قِنَانْ وِلَيْد أَنُوشْ وِلَيْد شِيتْ وِلَيْد آدَمْ الْهُو مِنْ اللّٰهْ.