لُوقا 23 - الكتاب المقدس بالعربي الدارجي هنا تشاد

المسيح قِدّام بِلَاطُس

¹ وَ كُلَّ نَاسْ الْمَجْلَسْ قَمَّوْا وَ وَدَّوْا عِيسَى لِبِلَاطُسْ الْوَالِي الرَّوْمَانِي.

² وَ قَمَّوْا يُخُطُّوا فَوْقَهْ تُهْمَةْ. وَ قَالَوْا: «كَرَبْنَا النَّادُمْ دَا أَشَانْ هُو قَاعِدْ يِتَلِّفْ شَعَبْنَا وَ يَدْحَرْهُمْ مَا يِكَفُّوا الْمِيرِي لِسُلْطَانْ الرَّوْمَانِيِّينْ. وَ هُو سَوَّى نَفْسَهْ الْمَسِيحْ، الْمَلِكْ.»

³ وَ بِلَاطُسْ سَأَلَهْ وَ قَالْ: «إِنْتَ مَلِكْ الْيَهُودْ وَلَّا؟» وَ عِيسَى رَدَّ لَيَّهْ وَ قَالْ: «مِثِلْ إِنْتَ قُلْتَهْ.»

⁴ وَ بِلَاطُسْ حَجَّى لِكُبَارَاتْ رُجَالْ الدِّينْ وَ لِلنَّاسْ الْكَتِيرِينْ اللَّمَّوْا وَ قَالْ: «أَنَا مَا لِقِيتْ فِي النَّادُمْ دَا أَيِّ جَرِيمَةْ.»

⁵ وَ لَاكِنْ هُمَّنْ قَمَّوْا يِحَجُّوا بِشِدَّةْ وَ قَالَوْا: «هُو يِحَرِّشْ النَّاسْ بِتَعْلِيمَهْ فِي دَارْ الْيَهُودِيَّةْ كُلَّهَا. هُو بَدَا فِي دَارْ الْجَلِيلْ وَ هَسَّعْ جَاءْ هِنِي فِي مَدِينَةْ الْقُدُسْ كُلَ.»

⁶ وَ وَكِتْ بِلَاطُسْ سِمِعْ كَلَامْهُمْ دَا، هُو سَأَلَاهُمْ وَ قَالْ: «النَّادُمْ دَا مِنْ دَارْ الْجَلِيلْ وَلَّا؟»

⁷ وَ وَكِتْ هُو عِرِفْ كَدَرْ عِيسَى مِنْ مُدِيرِيِّةْ التِّحِتْ حُكُمْ هِرُودُسْ، هُو رَسَّلَهْ لِهِرُودُسْ. وَ فِي الْوَكِتْ دَا، هِرُودُسْ جَاءْ زِيَارَةْ فِي مَدِينَةْ الْقُدُسْ.

المسيح قِدّام هِرُودُس

⁸ وَ وَكِتْ هِرُودُسْ شَافْ عِيسَى، هُو فِرِحْ بِلْحَيْن أَشَانْ مِنْ وَكِتْ طَوِيلْ هُو سِمِعْ خَبَرَهْ وَ يِدَوْر يِشِيفْ عِيسَى يِسَوِّي لَيَّهْ عَجَبْ.

⁹ وَ أَشَانْ دَا، سَأَلَهْ سُؤَالْ كَتِيرْ لَاكِنْ عِيسَى مَا رَدَّ لَيَّهْ كَلَامْ.

¹⁰ وَ كُبَارَاتْ رُجَالْ الدِّينْ وَ الْعُلَمَاءْ وَاقْفِينْ جَنْبَهْ وَ قَاعِدِينْ يَتْهَمَوْه بِشِدَّةْ.

¹¹ وَ هِرُودُسْ وَ عَسْكَرَهْ حَقَرَوْا عِيسَى وَ أَشَّمَّتَوْا لَيَّهْ. وَ فِي شَمَاتِتْهُمْ دِي، لَبَّسَوْه خَلَقْ سَمَحْ بِلْحَيْن مِنْ خُلْقَانْ الْمَلِكْ. وَ خَلَاصْ، قَبَّلَوْه لِبِلَاطُسْ.

¹² وَ مِنْ الْيَوْم دَا بَسْ، هِرُودُسْ وَ بِلَاطُسْ بِقَوْا رُفْقَانْ. وَ أَوَّلْ هُمَّنْ مُخَاصِمِينْ.

قَرَار بِلَاطُس

¹³ وَ بِلَاطُسْ نَادَى كُبَارَاتْ رُجَالْ الدِّينْ وَ الشُّيُوخْ وَ نَاسْ الْمَدِينَةْ.

¹⁴ وَ قَالْ لَيْهُمْ: «إِنْتُو جِبْتُوا لَيِّ النَّادُمْ دَا وَ قُلْتُوا هُو قَاعِدْ يِتَلِّفْ الشَّعَبْ. وَ أَنَا سَأَلْتَهْ عَدِيلْ قِدَّامْكُو وَ مَا لِقِيتْ فَوْقَهْ أَيِّ جَرِيمَةْ.

¹⁵ وَ هِرُودُسْ كُلَ مَا لِقِي فَوْقَهْ شَيّءْ وَ أَشَانْ دَا، قَبَّلَهْ لَيْنَا. وَ نُقُولْ لَيْكُو هُو مَا سَوَّى شَيّءْ فَسِلْ الْوَاجِبْ لَيَّهْ الْمَوْت.

¹⁶ وَ خَلَاصْ، يَجْلُدُوهْ وَ بَعَدْ دَا، نَطِلْقَهْ.»

¹⁷ وَ فِي الْعِيدْ دَا، الْوَالِي وَاجِبْ يَطْلِقْ لَيْهُمْ نَادُمْ وَاحِدْ مِنْ الْمَكْرُوبِينْ.

¹⁸ وَ كُلَّ النَّاسْ عَاطَوْا بِحِسّ وَاحِدْ وَ قَالَوْا: «أَكْتُلْ عِيسَى دَا وَ أَطْلِقْ لَيْنَا بَرَابَاسْ!»

¹⁹ وَ بَرَابَاسْ هُو النَّادُمْ الْكَرَبَوْه فِي السِّجِنْ أَشَانْ سَوَّى فِتْنَةْ فِي الْمَدِينَةْ وَ كَتَلْ دِمَّةْ.

²⁰ وَ بِلَاطُسْ كَلَّمْ لَيْهُمْ بَتَّانْ أَشَانْ يِدَوْر يَطْلِقْ عِيسَى.

²¹ وَ لَاكِنْ كُلَّ النَّاسْ عَاطَوْا وَ قَالَوْا: «أَكْتُلَهْ فِي الصَّلِيبْ! أَكْتُلَهْ فِي الصَّلِيبْ!»

²² وَ بَتَّانْ تَالِتْ مَرَّةْ، بِلَاطُسْ حَجَّى لَيْهُمْ وَ قَالْ: «مَالَا؟ شُنُو الْفَسِلْ السَّوَّاهْ؟ أَنَا مَا لِقِيتْ فَوْقَهْ أَيِّ جَرِيمَةْ الْوَاجِبْ لَيَّهْ الْمَوْت. أَشَانْ دَا، يَجْلُدُوهْ وَ خَلَاصْ نَطِلْقَهْ.»

²³ وَ لَاكِنْ شَدَّدَوْا فِي كَلَامْهُمْ وَ بِحِسّ فَوْق قَالَوْا: «أَكْتُلُوهْ فِي الصَّلِيبْ!» وَ خَلَاصْ، عَايِطْ النَّاسْ جَبَرَهْ.

²⁴ وَ بِلَاطُسْ قَرَّرْ يَنْطِيهُمْ الشَّيّءْ الطَّلَبَوْه مِنَّهْ.

²⁵ وَ خَلَاصْ، هُو طَلَقْ النَّادُمْ الْقَاعِدْ فِي السِّجِنْ أَشَانْ الْفِتْنَةْ وَ الدِّمَّةْ. وَ لَاكِنْ سَلَّمْ لَيْهُمْ عِيسَى مِثِلْ النَّاسْ دَوَّرَوْه.

في درِب هنا الجُمْجُمة

²⁶ وَ وَكِتْ الْعَسْكَرْ مَاشِينْ يِوَدُّوا عِيسَى، لِقَوْا نَادُمْ وَاحِدْ أُسْمَهْ سِمْعَانْ الْمِنْ حِلَّةْ قَيْرَوَانْ الْجَايِ مِنْ الْكَدَادَةْ. وَ شَيَّلَوْه الصَّلِيبْ وَ جَبَرَوْه لِيِتَابِعْ عِيسَى مِنْ وَرَاءْ.

²⁷ وَ نَاسْ كَتِيرِينْ مَاشِينْ وَرَاءْ عِيسَى. وَ فِي أُسُطْهُمْ، فِي عَوِينْ الْقَاعِدَاتْ يَبْكَنْ لَيَّهْ بِحِسّ عَالِي.

²⁸ وَ عِيسَى أَنْلَفَتْ لَيْهِنْ وَ قَالْ: «يَا عَوِينْ مَدِينَةْ الْقُدُسْ، مَا تَبْكَنْ لَيِّ أَنَا. أَبْكَنْ لِنُفُوسْكَنْ وَ لِعِيَالْكَنْ.

²⁹ أَبْكَنْ أَشَانْ وَكِتْ وَاحِدْ يَجِي وَ فِي الْوَكِتْ دَا، يُقُولُوا: ‹مَبْرُوكْ لِعَوِينْ الْعَاقِرَاتْ وَ الْمَا وِلْدَنْ عِيَالْ وَ أَبَداً مَا رَضَّعَنْ صَغِيرْ.›

³⁰ وَ فِي الْوَكِتْ دَاكْ، النَّاسْ يَصْرَخَوْا مِنْ خَوْف شَدِيدْ وَ يُقُولُوا: ‹خَلِّي الْجِبَالْ يَقَعَوْا فَوْقنَا وَ خَلِّي الْحُجَارْ يَدْفُنُونَا.›

³¹ فَكِّرَنْ فِي الشَّيّءْ الْيِسَوُّوهْ لَيِّ. كَنْ يِسَوُّوا مِثِلْ دَا لِلْحَطَبْ اللَّيِّنْ، شُنُو الْيَبْقَى لِلْحَطَبْ الْيَابِسْ؟»

المسيح في الصليب

³² وَ فِي نَاسَيْن الْوَدَّوْهُمْ مِنْ الْمَدِينَةْ أَشَانْ يَكْتُلُوهُمْ فِي نَفْس الْبَكَانْ مَعَ عِيسَى. وَ هُمَّنْ مُجْرِمِينْ.

³³ وَ وَكِتْ لِحْقَوْا الْبَكَانْ الْأُسْمَهْ الْجُمْجُمَةْ، طَقَّوْا عِيسَى فِي الصَّلِيبْ وَ رَفَعَوْه فَوْق. وَ سَوَّوْا نَفْس الشَّيّءْ لِلْمُجْرِمِينْ، الْوَاحِدْ طَقَّوْه فِي صَلِيبْ جَنْب عِيسَى بِنُصَّهْ الزَّيْنَايْ وَ التَّانِي فِي صَلِيبْ آخَرْ بِنُصَّهْ الْإِسْرَايْ.

³⁴ وَ عِيسَى قَالْ: «يَا أَبُويِ، سَامِحْهُمْ أَشَانْ مَا فِهْمَوْا الشَّيّءْ الْهُمَّنْ قَاعِدِينْ يِسَوُّوهْ.» وَ الْعَسْكَرْ سَوَّوْا أَمْ عِيَيْدَاتْ أَشَانْ يِقَسُّمُوا أَمْبَيْنَاتْهُمْ خُلْقَانَهْ.

³⁵ وَ النَّاسْ وَقَفَوْا قَاعِدِينْ يِشِيفُوا. وَ الْكُبَارَاتْ قَاعِدِينْ يِشَّمَّتَوْا لَيَّهْ وَ يُقُولُوا: «هُو نَجَّى نَاسْ آخَرِينْ وَ خَلِّي يِنَجِّي نَفْسَهْ كَنْ صَحِيحْ هُو الْمَسِيحْ وَ النَّادُمْ الْاللّٰهْ عَزَلَهْ!»

³⁶ وَ الْعَسْكَرْ كُلَ أَشَّمَّتَوْا لَيَّهْ. جَوْا وَ قَدَّمَوْا لَيَّهْ شَرَابْ حَامُضْ

³⁷ وَ قَالَوْا: «كَنْ إِنْتَ مَلِكْ الْيَهُودْ، نَجِّي نَفْسَكْ!»

³⁸ وَ فَوْق مِنْ رَاسَهْ فِي كَلَامْ مَكْتُوبْ الْيُقُولْ: «دَا مَلِكْ الْيَهُودْ.»

³⁹ وَ وَاحِدْ مِنْ الْمُجْرِمِينْ الْمُعَلَّقِينْ جَنْبَهْ عَيَّرَهْ بِحِسّ عَالِي وَ قَالْ: «هَايْ! إِنْتَ مَا الْمَسِيحْ وَلَّا؟ نَجِّي نَفْسَكْ وَ نَجِّينَا أَنِحْنَ كُلَ مَعَاكْ!»

⁴⁰ لَاكِنْ الْمُجْرِمْ التَّانِي هَرَجَهْ وَ قَالْ: «هَايْ! إِنْتَ مَا خَايِفْ مِنْ اللّٰهْ وَلَّا؟ إِنْتَ لِقِيتْ نَفْس الْعَذَابْ مِثْلَهْ.

⁴¹ وَ أَنِحْنَ، حَكَمَوْنَا بِالْحَقّ أَشَانْ الْعَذَابْ الْيِسَوُّوهْ فَوْقنَا وَاجِبْ لَيْنَا بِسَبَبْ عَمَلْنَا. لَاكِنْ النَّادُمْ دَا مَا سَوَّى شَيّءْ فَسِلْ.»

⁴² وَ حَجَّى بَتَّانْ وَ قَالْ: «يَا عِيسَى، فَكِّرْ فَوْقِي وَكِتْ تَبْقَى مَلِكْ.»

⁴³ وَ عِيسَى حَجَّى لَيَّهْ وَ قَالْ: «نُقُولْ لَيْك الْحَقّ، الْيَوْم تَدْخُلْ مَعَايِ فِي الْجَنَّةْ.»

مَوْت المسيح

⁴⁴ وَ بِقِي نُصّ النَّهَارْ. لَاكِنْ الْوَطَاةْ بِقَتْ ضَلْمَةْ فِي كُلَّ الْبَلَدْ لَحَدِّي الْعَصُرْ.

⁴⁵ الْحَرَّايْ مَا قَاعِدَةْ تِضَوِّي. وَ السِّتَارْ الْفِي بَيْت اللّٰهْ أَنْشَقَّ مِنْ أُسُطْ.

⁴⁶ وَ عِيسَى عَاطْ بِحِسّ شَدِيدْ وَ قَالْ: «يَا أَبُويِ، رُوحِي نَنْطِيهَا لَيْك فِي إِيدَكْ.» وَ بَعَدْ قَالْ الْكَلَامْ دَا، خَلَاصْ مَاتْ.

⁴⁷ وَ كَبِيرْ الْعَسْكَرْ شَافْ الشَّيّءْ الْبِقِي وَ مَجَّدْ اللّٰهْ وَ قَالْ: «أَكِيدْ، الرَّاجِلْ دَا صَالِحْ!»

⁴⁸ وَ كُلَّ النَّاسْ الْكَتِيرِينْ اللَّمَّوْا لِيِشِيفُوا، شَافَوْا الشَّيّءْ الْبِقِي وَ بِقَوْا حَزْنَانِينْ. وَ وَكِتْ مُقَبِّلِينْ فِي بُيُوتْهُمْ، قَاعِدِينْ يُدُقُّوا صَدُرْهُمْ مِنْ النَّدَامَةْ.

⁴⁹ وَ كُلَّ النَّاسْ الْيَعَرْفُوا عِيسَى وَ الْعَوِينْ الْمَشَنْ وَرَايَهْ مِنْ دَارْ الْجَلِيلْ وَاقْفِينْ بَعِيدْ مِنَّهْ شِيَّةْ وَ قَاعِدِينْ يِشِيفُوا كُلَّ شَيّءْ الْقَاعِدْ يَبْقَى.

المسيح دفنوه

⁵⁰ وَ فِيَّهْ رَاجِلْ وَاحِدْ أُسْمَهْ يُوسُفْ. وَ هُو مِنْ الْمَجْلَسْ الْكَبِيرْ وَ هُو نَادُمْ زَيْن وَ صَالِحْ.

⁵¹ هُو مَا قَصَّدْ بِقَرَارْ الْمَجْلَسْ وَ لَا بِالْفِعِلْ الْكُبَارَاتْ سَوَّوْه. وَ هُو مِنْ حِلَّةْ وَاحِدَةْ هَنَا الْيَهُودْ الْأُسُمْهَا الرَّامَةْ وَ مُؤمِنْ بِمَمْلَكَةْ اللّٰهْ الْجَايَةْ.

⁵² وَ يُوسُفْ دَا، هُو مَشَى لِبِلَاطُسْ وَ سَأَلَهْ جَنَازَةْ عِيسَى.

⁵³ وَ دَلَّى الْجَنَازَةْ مِنْ الصَّلِيبْ وَ كَفَّنَاهَا بِكَفَنْ غَالِي. وَ وَدَّاهَا فِي قَبُرْ وَاحِدْ النَّكَتَوْه فِي حَجَرْ مِثِلْ كَرْكُورْ وَ لِسَّاعْ مَا دَسَّوْا فَوْقَهْ أَيِّ جَنَازَةْ. وَ رَقَّدْ فَوْقَهْ جَنَازَةْ عِيسَى.

⁵⁴ وَ دَا بِقِي فِي الْيَوْم الْيَهُودْ يِجَهُّزُوا فَوْقَهْ لِيَوْم السَّبْت وَ السَّبْت يِدَوْر يَبْدَا.

⁵⁵ وَ الْعَوِينْ الْمَشَنْ وَرَاءْ عِيسَى مِنْ دَارْ الْجَلِيلْ مَشَنْ مَعَ يُوسُفْ وَ شَافَنْ الْقَبُرْ وَ كِكَّيْف خَطَّوْا فَوْقَهْ جَنَازَةْ عِيسَى.

⁵⁶ وَ قَبَّلَنْ فِي بُيُوتْهِنْ وَ جَهَّزَنْ دَوَاءْ وَ رِيحَةْ لِلْجَنَازَةْ. وَ يَوْم السَّبْت، هِنَّ أَنْجَمَّنْ مَرَّةْ وَاحِدْ حَسَبْ وَصِيَّةْ اللّٰهْ.