لُوقا 18 - الكتاب المقدس بالعربي الدارجي هنا تشاد

مَثَل العجوز و الحاكِم

¹ وَ عِيسَى حَجَّى لَيْهُمْ بِمَثَلْ أَشَانْ يِوَصِّفْهُمْ وَاجِبْ دَايْماً يِصَلُّوا وَ مَا يَكْسَلَوْا.

² وَ قَالْ: «فِي حِلَّةْ وَاحِدَةْ، فِيهَا حَاكِمْ وَاحِدْ وَ هُو مَا خَايِفْ مِنْ اللّٰهْ وَ مَا لَمَّاهْ بِرِضَى النَّاسْ.

³ وَ فِي الْحِلَّةْ دِي، فِي عَجُوزْ أَرْمَلَةْ. وَ كُلِّ يَوْم هِي تَمْشِي لِلْحَاكِمْ وَ تُقُولْ: ‹أَنْصُرْنِي بِالْحَقّ فِي النَّادُمْ الظَّلَمْنِي.›

⁴ وَ أَوَّلْ هُو أَبَى مَا سَوَّى لَيْهَا شَيّءْ لَاكِنْ فِي الأَخِيرْ هُو قَالْ فِي نَفْسَهْ: ‹صَحِيحْ، أَنَا مَا خَايِفْ مِنْ اللّٰهْ وَ مَا لَمَّانِي بِرِضَى النَّاسْ.

⁵ لَاكِنْ الْعَجُوزْ دِي قَاعِدَةْ تِبَشْتِنِّي بِلْحَيْن. خَلِّي نَنْصُرْهَا أَشَانْ هِي مَا تِعَيِّينِي مَرَّةْ وَاحِدْ بِجَيِّتْهَا الْكَتِيرَةْ.›»

⁶ وَ الرَّبّ عِيسَى قَالْ: «الْحَاكِمْ دَا نَادُمْ ظَالِمْ لَاكِنْ فَكُّرُوا فِي كَلَامَهْ.

⁷ وَ فِي فِكِرْكُو، اللّٰهْ مَا يَنْصُرْهُمْ لِنَاسَهْ الْعَزَلَاهُمْ الْيَصْرَخَوْا لَيَّهْ لَيْل وَ نَهَارْ وَلَّا؟ يِأَخِّرْ لَيْهُمْ وَلَّا؟

⁸ نُقُولْ لَيْكُو هُو يَنْصُرْهُمْ عَجَلَةْ. وَ لَاكِنْ وَكِتْ إِبْن الْإِنْسَانْ يِقَبِّلْ فِي الْأَرْض، هُو يَلْقَى نَاسْ مُؤمِنِينْ وَلَّا؟»

مَثَل الفَرِيزِي و سيد الجمارِك

⁹ وَ عِيسَى حَجَّى بِمَثَلْ لِنَاسْ وَاحِدِينْ الْيِسَوُّوا نُفُوسْهُمْ صَالِحِينْ وَ يَحْقُرُوا الْآخَرِينْ.

¹⁰ وَ قَالْ: «يَوْم مِنْ الْأَيَّامْ، فِي نَاسَيْن دَخَلَوْا فِي بَيْت اللّٰهْ أَشَانْ يِصَلُّوا. الْوَاحِدْ مِنْ الْفَرِيزِيِّينْ وَ الْآخَرْ مِنْ نَاسْ الْجَمَارِكْ.

¹¹ وَ الْفَرِيزِي وَقَفْ بِطُولَهْ وَ صَلَّى وِحَيْدَهْ وَ قَالْ: ‹يَا اللّٰهْ، نُقُولْ لَيْك شُكْراً أَشَانْ أَنَا مَا بِقِيتْ مِثِلْ النَّاسْ الْآخَرِينْ. هُمَّنْ سَرَارِيقْ وَ فَسْلِينْ وَ زَنَّايِينْ. أَيْوَى، أَنَا مَا مِثِلْ نَادُمْ الْجَمَارِكْ دَا.

¹² أَنَا نُصُومْ يَوْمَيْن فِي الْأُسْبُوعْ وَ نَنْطِيكْ عُشُرْ هَنَا كُلَّ شَيّءْ النَّرْبَحَهْ.›

¹³ لَاكِنْ نَادُمْ الْجَمَارِكْ وَقَفْ وِحَيْدَهْ بَعِيدْ مِنْ النَّاسْ. مَا رَفَعْ رَاسَهْ فَوْق كُلَ. وَ قَاعِدْ يُدُقّ صَدْرَهْ مِنْ النَّدَامَةْ وَ قَالْ: ‹يَا اللّٰهْ، أَرْحَمْنِي. أَنَا مُذْنِبْ.›

¹⁴ «وَ نُقُولْ لَيْكُو مِنْ النَّاسَيْن دَوْل، الرَّاجِلْ التَّانِي بَسْ قَبَّلْ فِي بَيْتَهْ وَ اللّٰهْ جَعَلَهْ صَالِحْ. أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.»

المسيح بارك العيال

¹⁵ وَ النَّاسْ قَاعِدِينْ يِوَدُّوا عِيَالْهُمْ الصُّغَارْ لِعِيسَى أَشَانْ هُو يَلْمَسْهُمْ لِيِبَارِكْهُمْ. وَ تَلَامِيذَهْ شَافَوْهُمْ وَ هَرَجَوْهُمْ.

¹⁶ لَاكِنْ عِيسَى نَادَى الْعِيَالْ وَ قَالْ لِتَلَامِيذَهْ: «خَلُّوا الْعِيَالْ يَجُوا لَيِّ وَ مَا تَدْحَرَوْهُمْ أَشَانْ مَمْلَكَةْ اللّٰهْ هَنَا النَّاسْ الْمِثِلْهُمْ.

¹⁷ وَ نُقُولْ لَيْكُو الْحَقّ، نَادُمْ أَبَداً مَا يَدْخُلْ فِي مَمْلَكَةْ اللّٰهْ كَنْ مَا يَقْبَلْهَا مِثِلْ وِلَيْد صَغَيَّرْ.»

الشَيْخ الغني

¹⁸ وَ نَادُمْ وَاحِدْ مِنْ الْكُبَارَاتْ سَأَلْ عِيسَى وَ قَالْ: «يَا الْمُعَلِّمْ الْعَدِيلْ، وَاجِبْ نِسَوِّي شُنُو أَشَانْ نَلْقَى الْحَيَاةْ الْأَبَدِيَّةْ؟»

¹⁹ وَ عِيسَى رَدَّ لَيَّهْ وَ قَالْ: «مَالَا تُقُولْ أَنَا عَدِيلْ؟ وَاحِدْ بَسْ عَدِيلْ وَ هُو اللّٰهْ.

²⁰ أَكِيدْ، تَعَرِفْ الْوَصَايَا الْبُقُولُوا: <مَا تَزْنَى وَ مَا تَكْتُلْ دِمَّةْ وَ مَا تَسْرِقْ وَ مَا تَشْهَدْ بِكِدِبْ وَ كَرِّمْ أَمَّكْ وَ أَبُوكْ.>»

²¹ وَ الرَّاجِلْ قَالْ: «مِنْ أَنَا صَغَيَّرْ، نِتَابِعْ كُلَّ الْوَصَايَا دَوْل.»

²² وَ وَكِتْ عِيسَى سِمِعْ كَلَامَهْ دَا، هُو قَالْ: «شُغُلْ وَاحِدْ لِسَّاعْ قَصَّرْ لَيْك. بِيعْ كُلَّ شَيّءْ الْعِنْدَكْ وَ أَنْطِي تَمَنَهْ لِلْمَسَاكِينْ وَ مِثِلْ دَا، تَلْقَاهْ قِدَّامَكْ. وَ تَعَالْ تَابِعْنِي.»

²³ وَ وَكِتْ سِمِعْ كَلَامْ عِيسَى دَا، هُو بِقِي حَزْنَانْ أَشَانْ هُو غَنِيْ بِلْحَيْن.

²⁴ وَ عِيسَى شَافْ وِجْهَهْ وَ قَالْ: «الدَّخُولْ فِي مَمْلَكَةْ اللّٰهْ قَاسِي لِلنَّاسْ الْعِنْدُهُمْ مَالْ كَتِيرْ.

²⁵ بَتَّانْ نُقُولْ لَيْكُو، دَخُولْ الْجَمَلْ فِي قَدّ الْإِبْرَةْ هَيِّنْ مِنْ دَخُولْ سِيدْ الْمَالْ فِي مَمْلَكَةْ اللّٰهْ.»

²⁶ وَ النَّاسْ السِّمْعَوْا الْكَلَامْ دَا قَالَوْا: «كَنْ مِثِلْ دَا، يَاتُو يَقْدَرْ يَنْجَى؟»

²⁷ وَ عِيسَى رَدَّ لَيْهُمْ وَ قَالْ: «الشَّيّءْ الْقَاسِي لِلنَّاسْ، مَا قَاسِي لِلّٰهْ.»

²⁸ وَ بُطْرُسْ قَالْ: «وَ أَنِحْنَ خَلَّيْنَا كُلَّ خُمَامْنَا أَشَانْ نِتَابُعُوكْ.»

²⁹ وَ عِيسَى قَالْ لَيْهُمْ: «نُقُولْ لَيْكُو الْحَقّ، أَيِّ نَادُمْ الْخَلَّى بَيْتَهْ أَوْ مَرْتَهْ أَوْ أَخْوَانَهْ أَوْ وَالْدَيْنَهْ أَوْ عِيَالَهْ فِي شَانْ مَمْلَكَةْ اللّٰهْ،

³⁰ يَلْقَى كَتِيرْ مِنْهُمْ زِيَادَةْ فِي الزَّمَنْ الْحَاضِرْ. وَ فِي الْآخِرَةْ، يَلْقَى الْحَيَاةْ الْأَبَدِيَّةْ.»

تالِت مرّة المسيح حجّى بمَوْته

³¹ وَ عِيسَى طَرَّفْ التَّلَامِيذ الْأَتْنَا عَشَرْ وَ حَجَّى لَيْهُمْ وِحَيْدهُمْ وَ قَالْ: «شِيفُوا. أَنِحْنَ مَاشِينْ لِمَدِينَةْ الْقُدُسْ. وَ هِنَاكْ كُلَّ شَيّءْ الْأَنْبِيَاء كَتَبَوْه فِي إِبْن الْإِنْسَانْ يِتِمّ.

³² يِسَلُّمُوهْ لِلْمَا مُؤمِنِينْ وَ يِشَّمَّتَوْا لَيَّهْ وَ يِعَيُّرُوهْ وَ يِبَزُّقُوا فَوْقَهْ.

³³ وَ يَجْلُدُوهْ وَ يَكْتُلُوهْ. وَ لَاكِنْ فِي الْيَوْم التَّالِتْ هُو يَبْعَثْ.»

³⁴ وَ لَاكِنْ تَلَامِيذَهْ مَا فِهْمَوْا شَيّءْ مِنْ الْكَلَامْ دَا. كَلَامَهْ دَا مُلَبَّدْ مِنْهُمْ وَ مَا عِرْفَوْا مَعَنَى كَلَامَهْ.

المسيح شفى نادم عمْيان

³⁵ وَ وَكِتْ عِيسَى قَرَّبْ لِحِلَّةْ أَرِيحَا، عَمْيَانْ وَاحِدْ قَاعِدْ تِحِتْ جَنْب الشَّارِعْ وَ هُو قَاعِدْ يَشْحَدْ صَدَقَةْ مِنْ النَّاسْ.

³⁶ وَ الْعَمْيَانْ سِمِعْ حِسّ هَنَا النَّاسْ الْكَتِيرِينْ الْمَاشِينْ فِي الدَّرِبْ وَ سَأَلَاهُمْ وَ قَالْ: «شُنُو الْحَرَكَةْ دِي؟»

³⁷ وَ قَالَوْا لَيَّهْ: «عِيسَى الْمِنْ النَّاصِرَةْ مَاشِي فِي الدَّرِبْ دَا.»

³⁸ وَ هُو بَدَا يِعِيطْ وَ يُقُولْ: «يَا عِيسَى! يَا إِبْن دَاوُدْ! أَرْحَمْنِي!»

³⁹ وَ النَّاسْ الْمَاشِينْ قِدَّامْ عِيسَى هَرَجَوْه وَ قَالَوْا لَيَّهْ: «أَسْكُتْ!» لَاكِنْ الْعَمْيَانْ قَمَّ يِعِيطْ بِزِيَادَةْ وَ يُقُولْ: «يَا إِبْن دَاوُدْ، أَرْحَمْنِي!»

⁴⁰ وَ عِيسَى وَقَفْ وَ أَمَرَاهُمْ لِلنَّاسْ أَشَانْ يِجِيبُوا لَيَّهْ الْعَمْيَانْ. وَ وَكِتْ الْعَمْيَانْ جَاءْ قَرِيبْ، عِيسَى سَأَلَهْ وَ قَالْ:

⁴¹ «تِدَوْر أَنَا نِسَوِّي لَيْك شُنُو؟» وَ الْعَمْيَانْ قَالْ: «يَا سَيِّدْنَا، نِدَوْر نِشِيفْ!»

⁴² وَ عِيسَى قَالْ: «خَلَاصْ، شِيفْ! إِنْتَ لِقِيتْ الْعَافَيْ بِسَبَبْ إِيمَانَكْ.»

⁴³ وَ طَوَّالِي عُيُونَهْ أَنْفَتَحَوْا وَ قَمَّ يِتَابِعْ عِيسَى وَ قَاعِدْ يَشْكُرْ اللّٰهْ. وَ وَكِتْ كُلَّ النَّاسْ شَافَوْه، شَكَرَوْا اللّٰهْ كَتِيرْ.