لُوقا 14 - الكتاب المقدس بالعربي الدارجي هنا تشاد

المسيح شفى في يوم السبْت

¹ وَ يَوْم وَاحِدْ، نَادُمْ مِنْ كُبَارَاتْ الْفَرِيزِيِّينْ عَزَمْ عِيسَى أَشَانْ يَاكُلْ مَعَايَهْ وَ عِيسَى مَشَى لَيَّهْ فِي بَيْتَهْ. وَ دَا يَوْم السَّبْت وَ الضِّيفَانْ الْآخَرِينْ خَطَّوْا بَالْهُمْ فِي عِيسَى أَشَانْ يِشِيفُوا شُنُو الشَّيّءْ الْيِسَوِّيهْ.

² وَ هِنَاكْ قِدَّامَهْ فِي نَادُمْ مُوَرِّمْ.

³ وَ عِيسَى سَأَلْ عُلَمَاءْ التَّوْرَاةْ وَ الْفَرِيزِيِّينْ وَ قَالْ: «فِي يَوْم السَّبْت، حَلَالْ لَيْنَا نَشْفُوا الْمَرْضَانِينْ وَلَّا؟»

⁴ وَ مَا قَالَوْا لَيَّهْ شَيّءْ. وَ هُو كَرَبْ إِيدْ الْمَرْضَانْ وَ شَفَاهْ وَ خَلَّاهْ مَشَى.

⁵ وَ عِيسَى سَأَلَاهُمْ بَتَّانْ وَ قَالْ: «كَنْ نَادُمْ مِنْكُو عِنْدَهْ وِلَيْد وَلَّا تَوْر الْوَقَعْ فِي بِيرْ فِي يَوْم السَّبْت، يِسَوِّي شُنُو؟ مَا يَمُرْقَهْ عَجَلَةْ وَلَّا؟»

⁶ وَ مَا قِدْرَوْا يُرُدُّوا لَيَّهْ فِي الْكَلَامْ دَا.

الواجِب في العاوازيم

⁷ وَ عِيسَى شَافْ كَدَرْ أَيِّ ضَيْف دَوَّرْ يَقْعُدْ فِي الْبَكَانْ الْكُبَارَاتْ يَقْعُدُوا فَوْقَهْ. وَ حَجَّى لَيْهُمْ بِمَثَلْ وَ قَالْ:

⁸ «كَنْ نَادُمْ يَعَزِمَكْ فِي عَازُومَةْ الْعِرِسْ، مَا تُخُطّ نَفْسَكْ فِي بَكَانْ الْكُبَارَاتْ. أَكُونْ عَزَمَوْا ضَيْف كَبِيرْ مِنَّكْ.

⁹ وَ النَّادُمْ الْعَزَمَاكُو يَجِي لَيْك وَ يُقُولْ: ‹خَلِّي الرَّاجِلْ دَا يَقْعُدْ فِي بَكَانَكْ.› وَ خَلَاصْ الْعَيْب يَكُرْبَكْ وَ تُقُمّ تَمْشِي فِي الْبَكَانْ الْوَرَاءْ.

¹⁰ «لَاكِنْ كَنْ يَعَزُمُوكْ، أَمْشِي أَقْعُدْ فِي الْبَكَانْ الْوَرَاءْ. وَ فِي الْحَالَةْ دِي، وَكِتْ سِيدْ الْبَيْت يَجِي لَيْك، هُو يُقُولْ: ‹يَا رَفِيقِي، تَعَالْ قِدَّامْ.› وَ مِثِلْ دَا هُو يِشَرِّفَكْ قِدَّامْ كُلَّ النَّاسْ الْمَعَاكْ فِي الْعَازُومَةْ.

¹¹ أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ. وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.»

¹² وَ عِيسَى حَجَّى لِلنَّادُمْ الْعَزَمَهْ فِي بَيْتَهْ وَ قَالْ: «كَنْ تِسَوِّي عَازُومَةْ وَلَّا حَفْلَةْ، مَا تَعَزِمْ رُفْقَانَكْ وَ لَا أَخْوَانَكْ وَ لَا نَاسْ قَبِيلْتَكْ وَ لَا جِيرَانَكْ سِيَادْ الْمَالْ. أَشَانْ كَنْ تَعَزِمْ النَّاسْ دَوْل، أَكُونْ هُمَّنْ يَعَزُمُوكْ فِي عَازُومِتْهُمْ وَ دَا بَسْ يَبْقَى لَيْك أَجْرَكْ.

¹³ لَاكِنْ وَكِتْ تِسَوِّي عَازُومَةْ، أَعَزِمْ الْمَسَاكِينْ وَ الْمَعْضُورِينْ وَ الْعُرُجْ وَ الْعَمْيَانِينْ أَشَانْ يَاكُلُوا مَعَاكْ.

¹⁴ وَ اللّٰهْ يِبَارِكَكْ أَشَانْ هُمَّنْ مَا يَقْدَرَوْا يِقَبُّلُوا لَيْك شَيّءْ. وَ اللّٰهْ يِآجِرَكْ وَكِتْ بُعَاثْ الصَّالِحِينْ.»

مَثَل العازومة و الضيفان

¹⁵ وَ نَادُمْ وَاحِدْ الْقَاعِدْ يَاكُلْ مَعَايَهْ سِمِعْ الْكَلَامْ دَا وَ حَجَّى لِعِيسَى وَ قَالْ: «مَبْرُوكْ لِلنَّاسْ الْيِلْعَشَّوْا فِي عَازُومَةْ هَنَا مَمْلَكَةْ اللّٰهْ!»

¹⁶ وَ عِيسَى رَدَّ لَيَّهْ وَ قَالْ: «يَوْم مِنْ الْأَيَّامْ، فِي نَادُمْ وَاحِدْ سَوَّى عَازُومَةْ كَبِيرَةْ بِلْحَيْن وَ عَزَمْ فَوْقهَا نَاسْ كَتِيرِينْ.

¹⁷ وَ وَكِتْ الْعَازُومَةْ تَمَّ، هُو رَسَّلْ عَبْدَهْ لِلنَّاسْ الْمَعْزُومِينْ أَشَانْ يُقُولْ: ‹خَلَاصْ، تَعَالُوا! كُلَّ شَيّءْ جَاهِزْ لَيْكُو.›

¹⁸ وَ لَاكِنْ كُلُّهُمْ طَلَبَوْا مِنَّهْ يِسَامِحْهُمْ أَشَانْ مَا يَجُوا. النَّادُمْ الْأَوَّلْ قَالْ: ‹هَسَّعْ بَسْ بِعْت زَرَعْ وَ وَاجِبْ نَمْشِي نِشِيفَهْ. نَطْلُبْ مِنَّكْ تِسَامِحْنِي. أَنَا مَا نَجِي.›

¹⁹ وَ نَادُمْ آخَرْ قَالْ: ‹أَنَا بِعْت عَشَرَةْ تِيرَانْ أَشَانْ يَخْدُمُوا بِحَرَّاتَاتِي وَ أَنَا مَاشِي نِجَرِّبْهُمْ. أَشَانْ دَا، نَطْلُبْ مِنَّكْ تِسَامِحْنِي. أَنَا مَا نَجِي.›

²⁰ وَ نَادُمْ آخَرْ قَالْ: ‹أَخَدْت مَرَةْ وَ أَشَانْ دَا مَا نَقْدَرْ نَجِي.›

²¹ «وَ الْعَبِدْ قَبَّلْ لِسِيدَهْ وَ أَوْرَاهْ بِكَلَامْهُمْ. وَ سِيدْ الْبَيْت دَا زِعِلْ زَعَلْ شَدِيدْ وَ قَالْ لِعَبْدَهْ: ‹يَلَّا، أَمْشِي عَجَلَةْ عَجَلَةْ فِي شَوَارِعْ الْمَدِينَةْ وَ فِي كُلَّ دُرُوبْهَا وَ جِيبْ فِي بَيْتِي الْمَسَاكِينْ وَ الْمَعْضُورِينْ وَ الْعَمْيَانِينْ وَ الْعُرُجْ.›

²² وَ بَعَدْ شِيَّةْ، الْعَبِدْ قَالْ لَيَّهْ: ‹يَا سِيدِي، أَنَا سَوَّيْت مِثِلْ إِنْتَ أَمَرْتِنِي بَيَّهْ وَ الْبَكَانْ لِسَّاعْ فَضَّلْ.›

²³ وَ سِيدَهْ رَدَّ لَيَّهْ وَ قَالْ: ‹أَمْشِي بَرَّا مِنْ الْمَدِينَةْ فِي دُرُوبْ الْكَدَادَةْ وَ أَعَصِرْهُمْ لِلنَّاسْ أَشَانْ يَجُوا فِي الْعَازُومَةْ لَحَدِّي بَيْتِي يِنْمَلِي.

²⁴ وَ نُقُولْ لَيْكُو مَا فِي نَادُمْ وَاحِدْ مِنْ النَّاسْ الْأَوَّلْ عَزَمْتُهُمْ يَاكُلْ شَيّءْ مِنْ عَازُومْتِي.›»

تبِعين المسيح ما هيِّن

²⁵ وَ نَاسْ كَتِيرِينْ بِلْحَيْن مَاشِينْ مَعَ عِيسَى. وَ هُو أَنْلَفَتْ لَيْهُمْ وَ قَالْ:

²⁶ «كَنْ نَادُمْ يِدَوْر يَبْقَى تِلْمِيذِي، وَاجِبْ يِرِيدْنِي زِيَادَةْ مِنْ أَبُوهْ وَ أَمَّهْ وَ مَرْتَهْ وَ عِيَالَهْ وَ أَخْوَانَهْ وَ أَخْوَاتَهْ. وَاجِبْ يِرِيدْنِي زِيَادَةْ مِنْ نَفْسَهْ كُلَ.

²⁷ وَ كَنْ نَادُمْ أَبَى مَا يِلْحَمَّلْ تَعَبْ الصَّلِيبْ وَ مَا يِتَابِعْنِي لِلْمَوْت، مَا يَقْدَرْ يَبْقَى تِلْمِيذِي.

²⁸ «كَنْ نَادُمْ مِنْكُو يِدَوْر يَبْنِي قَصِرْ، يِسَوِّي شُنُو؟ أَوَّلْ شَيّءْ، هُو يَقْعُدْ تِحِتْ وَ يِسَوِّي الْحِسَابْ أَشَانْ يَعَرِفْ كَنْ عِنْدَهْ قُرُسْ الْوَاجِبْ لِيِكَمِّلْ الْبُنَى.

²⁹ هُو مَا يِدَوْر يُخُطّ أَسَاسْ الْقَصِرْ كَنْ مَا يَقْدَرْ يِكَمِّلَهْ أَشَانْ كُلَّ النَّاسْ الْيِشِيفُوهْ، يِشَّمَّتَوْا لَيَّهْ.

³⁰ يُقُولُوا: ‹النَّادُمْ دَا بَدَا يَبْنِي لَاكِنْ مَا قِدِرْ يِكَمِّلَهْ.›

³¹ «وَ كَنْ نَادُمْ مَلِكْ وَ يِدَوْر يِدَاوِسْ مَلِكْ آخَرْ، يِسَوِّي شُنُو؟ أَوَّلْ شَيّءْ، هُو يِفَكِّرْ عَدِيلْ. هُو يِدَوْر يَعَرِفْ كَنْ بِعَسْكَرَهْ الْعَشَرَةْ أَلِفْ هُو يَقْدَرْ يِدَاوِسْ الْمَلِكْ الْعِنْدَهْ عِشْرِينْ أَلِفْ عَسْكَرْ.

³² وَ كَنْ مَا يَقْدَرْ، هُو يِرَسِّلْ نَادُمْ أَشَانْ يِمَثِّلَهْ وَكِتْ الْعَدُو لِسَّاعْ قَاعِدْ بَعِيدْ أَشَانْ يِسَوِّي مَعَايَهْ صُلُحْ.

³³ وَ بِمِثِلْ دَا، كَنْ أَيِّ نَادُمْ مِنْكُو مَا يِخَلِّي مِنَّهْ كُلَّ شَيّءْ الْعِنْدَهْ، هُو مَا يَقْدَرْ يَبْقَى تِلْمِيذِي.

³⁴ «تَعَرْفُوا كَدَرْ الْمِلِحْ عَدِيلْ. لَاكِنْ كَنْ طَعَامَهْ بِقِي مَا فِيهْ، شُنُو يِقَبِّلَهْ؟

³⁵ الْمِلِحْ الْمِثِلْ دَا مَا عِنْدَهْ فَايْدَةْ وَ لَا لِلتُّرَابْ وَ لَا لِلْبَعَرْ. وَ خَلَاصْ، النَّاسْ يِدَفُّقُوهْ بَرَّا. أَيِّ نَادُمْ الْعِنْدَهْ أَدَانْ لِلسَّمَعْ، خَلِّي يَسْمَعْ!»