لُوقا 13 - الكتاب المقدس بالعربي الدارجي هنا تشاد

التَوْبة واجِب لكل الناس

¹ وَ فِي الْوَكِتْ دَا بَسْ، نَاسْ وَاحِدِينْ جَوْا لِعِيسَى وَ أَوْرَوْه بِخَبَرْ النَّاسْ مِنْ دَارْ الْجَلِيلْ. النَّاسْ دَوْل، بِلَاطُسْ كَتَلَاهُمْ فِي بَيْت اللّٰهْ وَ خَلْبَطْ دَمُّهُمْ مَعَ دَمّ ضَحَايَاهُمْ.

² وَ عِيسَى رَدَّ لَيْهُمْ وَ قَالْ: «بِسَبَبْ مَوْتهُمْ الشَّيْن دَا، فِي فِكِرْكُو الْجَلِيلِيِّينْ دَوْل مُذْنِبِينْ زِيَادَةْ مِنْ النَّاسْ الْآخَرِينْ الْمِنْ دَارْ الْجَلِيلْ وَلَّا؟

³ نُقُولْ لَيْكُو لَا. وَ كَنْ إِنْتُو مَا تُتُوبُوا مِنْ ذُنُوبْكُو، كُلُّكُو تَهْلَكَوْا مِثِلْهُمْ.

⁴ وَ سِمِعْتُوا خَبَرْ هَنَا النَّاسْ التَّمَانِيَةَ عَشَرْ الْقَصِرْ سِلْوَامْ وَقَعْ فَوْقهُمْ وَ كَتَلَاهُمْ. وَ فِي فِكِرْكُو، هُمَّنْ خَاطِيِّينْ زِيَادَةْ مِنْ كُلَّ النَّاسْ الْآخَرِينْ السَّاكْنِينْ فِي مَدِينَةْ الْقُدُسْ وَلَّا؟

⁵ نُقُولْ لَيْكُو لَا. وَ كَنْ إِنْتُو مَا تُتُوبُوا مِنْ ذُنُوبْكُو، كُلُّكُو تَهْلَكَوْا مِثِلْهُمْ.»

⁶ وَ عِيسَى حَجَّى لَيْهُمْ بِمَثَلْ وَ قَالْ: «نَادُمْ وَاحِدْ عِنْدَهْ جِنَيْنَةْ هَنَا عِنَبْ وَ شَدَرَةْ تِينْ كُلَ قَاعِدَةْ فَوْقهَا. وَ مَشَى لَيْهَا وَ فَتَّشْ فَوْقهَا تِينْ وَ مَا لِقِي شَيّءْ.

⁷ وَ حَجَّى لِلْخَدَّامْ الْمَسْؤُولْ فِي الْجِنَيْنَةْ وَ قَالْ: ‹شِيفْ! مِنْ تَلَاتَةْ سَنَةْ أَنَا قَاعِدْ نَجِي نِفَتِّشْ عِيَالْ مِنْ الشَّدَرَةْ دِي وَ مَا لِقِيتْ فَوْقهَا شَيّءْ. مَالَا نِخَلِّيهَا تَفْسِدْ التُّرَابْ؟ أَقْطَعْهَا!›

⁸ وَ الْخَدَّامْ رَدَّ لَيَّهْ وَ قَالْ: ‹يَا سَيِّدِي! خَلِّيهَا تَقْعُدْ سَنَةْ وَاحِدَةْ بَتَّانْ. وَ أَنَا نَحْفِرْ التُّرَابْ الْجَايْ وَ جَايْ لَيْهَا وَ نِزِيدْ لَيْهَا بَعَرْ.

⁹ أَكُونْ فِي السَّنَةْ الْجَايَةْ تَلْدَ عِيَالْ. وَ كَنْ مَا وِلْدَتْ، خَلَاصْ أَقْطَعْهَا.›»

المسيح شفى مرة في يوم السبْت

¹⁰ يَوْم السَّبْت عِيسَى قَاعِدْ يِعَلِّمْ النَّاسْ فِي بَيْت الصَّلَاةْ.

¹¹ وَ فِي مَرَةْ وَاحِدَةْ تَعْبَانَةْ. شَيْطَانْ وَاحِدْ ضَرَبَاهَا وَ مِنْ 18 سَنَةْ، ضَهَرْهَا مُكَنْجَرْ وَ مَا تَقْدَرْ تِنْعَدِلْ.

¹² وَ عِيسَى شَافَاهَا وَ نَادَاهَا. وَ قَالْ لَيْهَا: «يَا مَرَةْ زَيْنَةْ. خَلَاصْ، لِقِيتِ الْعَافَيْ. إِنْتِ مَا مَرْبُوطَةْ بَتَّانْ.»

¹³ وَ خَطَّ إِيدَيْنَهْ فَوْقهَا وَ عَجَلَةْ كَيْ هِي مَطَّطَتْ ضَهَرْهَا عَدِيلْ وَ شَكَرَتْ اللّٰهْ.

¹⁴ لَاكِنْ مَسْؤُولْ هَنَا بَيْت الصَّلَاةْ زِعِلْ أَشَانْ عِيسَى شَفَاهَا فِي يَوْم السَّبْت. وَ حَجَّى لِلنَّاسْ وَ قَالْ: «فِي الْأُسْبُوعْ عِنْدُكُو سِتَّةْ أَيَّامْ لِلْخِدْمَةْ. خَلِّي تَجُوا فِي الْأَيَّامْ دَوْل أَشَانْ تَلْقَوْا الْعَافَيْ لَاكِنْ مَا فِي يَوْم السَّبْت.»

¹⁵ وَ الرَّبّ عِيسَى رَدَّ لَيَّهْ وَ قَالْ: «يَا الْمُنَافِقِينْ! فِي يَوْم السَّبْت، أَكِيدْ أَيِّ نَادُمْ مِنْكُو يِحِلّ تَوْرَهْ وَلَّا حُمَارَهْ مِنْ شَايْتَهْ وَ يِوَدِّيهْ لِيَزْقِيهْ أَلْمِي.

¹⁶ وَ الْمَرَةْ دِي، هِي مِنْ أَوْلَادْ إِبْرَاهِيمْ وَ الشَّيْطَانْ رَبَطْهَا. وَ مِنْ 18 سَنَةْ هِي مَرْبُوطَةْ. وَ كِكَّيْف مَا وَاجِبْ نِحِلَّهَا مِنْ رُبَاطْهَا فِي يَوْم السَّبْت؟»

¹⁷ وَ بِكَلَامَهْ دَا، الْعَيْب دَخَلْ لِكُلَّ النَّاسْ الدَّوَّرَوْا يَدْحَرَوْه. وَ كُلَّ النَّاسْ فِرْحَوْا بِكُلَّ الْعَمَلْ الْمَجِيدْ الْعِيسَى قَاعِدْ يِسَوِّيهْ.

أمْثال الخرْدل و التوّارة

¹⁸ وَ بَتَّانْ عِيسَى قَالْ: «مَمْلَكَةْ اللّٰهْ هِي كِكَّيْف؟ هِي تِشَابِهْ شُنُو؟

¹⁹ هِي صَغَيْرَةْ مِثِلْ حَبَّةْ الْخَرْدَلْ. وَ رَاجِلْ وَاحِدْ شَالْهَا وَ تَيْرَبَاهَا فِي جِنَيْنِتَهْ. وَ هِي بَذَرَتْ وَ بِقَتْ كَبِيرَةْ مِثِلْ شَدَرَةْ. وَ طُيُورْ السَّمَاءْ جَوْا وَ بَنَوْا عُشُوشْهُمْ فِي فُرُوعْهَا.»

²⁰ وَ بَتَّانْ عِيسَى قَالْ: «نُقُولْ مَمْلَكَةْ اللّٰهْ تِشَابِهْ مِثِلْ شُنُو؟

²¹ مَمْلَكَةْ اللّٰهْ تِشَابِهْ مِثِلْ التَّوَّارَةْ. وَ مَرَةْ وَاحِدَةْ شَالَتْهَا وَ صَبَّتْهَا دَاخَلْ فِي لُبّ تَلَاتَةْ كَوْرَوْ هَنَا دَقِيقْ. وَ بَعَدَيْن التَّوَّارَةْ قَوَّمَتْ الْعَجِينَةْ كُلَّهَا كَيْ.»

الدرِب الضيِّق

²² وَ وَكِتْ عِيسَى مُسَافِرْ لِمَدِينَةْ الْقُدُسْ، قَاعِدْ يِعَلِّمْ النَّاسْ فِي الْمُدُنْ وَ الْحِلَّالْ الْفِي دَرْبَهْ.

²³ وَ نَادُمْ وَاحِدْ سَأَلَهْ وَ قَالْ: «يَا سَيِّدْنَا، النَّاسْ الْيَنْجَوْا شِيَّةْ وَلَّا؟» وَ عِيسَى حَجَّى لِلنَّاسْ وَ قَالْ:

²⁴ «جَاهُدُوا لِتَدْخُلُوا بِدَرِبْ الضَّيِّقْ أَشَانْ نُقُولْ لَيْكُو بَعَدَيْن نَاسْ كَتِيرِينْ يِدَوْرُوا يَدْخُلُوا وَ مَا يَقْدَرَوْا.

²⁵ كَنْ سِيدْ الْبَيْت قَمَّ سَدَّ الدَّرِبْ وَ إِنْتُو وَاقْفِينْ بَرَّا، تُقُمُّوا تُدُقُّوا الْبَابْ وَ تُقُولُوا: ‹سَيِّدْنَا، أَفْتَحْ لَيْنَا.› وَ هُو يُرُدّ لَيْكُو وَ يُقُولْ: ‹مَا نَعَرِفْكُو. إِنْتُو كَيْ مِنْ وَيْن؟›

²⁶ وَ فِي الْبَكَانْ دَا، إِنْتُو تُقُولُوا: ‹أَنِحْنَ أَكَلْنَا وَ شِرِبْنَا مَعَاكْ. وَ إِنْتَ عَلَّمْت النَّاسْ فِي شَوَارِعْنَا.›

²⁷ لَاكِنْ هُو يُقُولْ: ‹نُقُولْ لَيْكُو مَا نَعَرِفْ إِنْتُو يَاتُمَّنْ. يَلَّا كِسُّوا مِنِّي بَعِيدْ، إِنْتُو الْفَسْلِينْ!›

²⁸ «وَ فِي الْبَكَانْ دَا، تَبْكُوا وَ تِعَضُّوا سُنُونْكُو مِنْ النَّدَامَةْ أَشَانْ تِشِيفُوا إِبْرَاهِيمْ وَ إِسْحَاقْ وَ يَعْقُوبْ وَ كُلَّ الْأَنْبِيَاء يَدْخُلُوا فِي مَمْلَكَةْ اللّٰهْ وَ إِنْتُو كَمَانْ مَطْرُودِينْ مِنْهَا.

²⁹ وَ النَّاسْ يَجُوا مِنْ صَبَاحْ وَ غَرِبْ وَ مِنْ مُنْشَاقْ وَ وَطِي وَ يَدْخُلُوا يِلْعَشَّوْا فِي مَمْلَكَةْ اللّٰهْ.

³⁰ وَ خَلَاصْ النَّاسْ الْوَرَاءْ يَبْقَوْا قِدَّامْ وَ النَّاسْ الْقِدَّامْ يَبْقَوْا وَرَاءْ.»

كلام المسيح البُخُصّ القدس

³¹ وَ فِي الْوَكِتْ دَا، نَاسْ وَاحِدِينْ مِنْ الْفَرِيزِيِّينْ جَوْا لِعِيسَى وَ قَالَوْا: «يَلَّا، أَمْشِي مِنْ الْبَكَانْ دَا. هِرُودُسْ يِدَوْر يَكْتُلَكْ تَرَى!»

³² وَ رَدَّ لَيْهُمْ وَ قَالْ: «أَمْشُوا لِلْبَعَشَوْم دَا وَ قُولُوا لَيَّهْ: ‹أَسْمَعْ. الْيَوْم أَنَا نَطْرُدْ الشَّوَاطِينْ وَ نَشْفِي الْمَرْضَانِينْ وَ أَمْبَاكِرْ نِسَوِّي نَفْس الشَّيّءْ. فِي الْيَوْم التَّالِتْ حَتَّى نِكَمِّلْ خِدِمْتِي.›

³³ أَيْوَى، الْيَوْم وَ أَمْبَاكِرْ وَ أَمْبُكْرَةْ وَاجِبْ نَمْشِي قِدَّامْ أَشَانْ مَا وَاجِبْ لِأَيِّ نَبِي يُمُوتْ، إِلَّا فِي مَدِينَةْ الْقُدُسْ.

³⁴ «يَا مَدِينَةْ الْقُدُسْ! يَا مَدِينَةْ الْقُدُسْ! يَا كَتَّالِينْ الْأَنْبِيَاء! إِنْتُو التَّرْجُمُوا النَّاسْ الْاللّٰهْ يِرَسِّلْهُمْ لَيْكُو. كَمْ مَرَّةْ دَوَّرْت نِلِمّ عِيَالْكُو مِثِلْ الْجِدَادَةْ تِلِمّ عِيَالْهَا تِحِتْ جَنَاحَيْهَا. لَاكِنْ إِنْتُو أَبَيْتُوا.

³⁵ شِيفُوا يِخَلُّوا بَيْتكُو يَابِسْ. وَ خَلَاصْ نُقُولْ لَيْكُو مَا تِشِيفُونِي بَتَّانْ لَحَدِّي تُقُولُوا: <مَبْرُوكْ لِلنَّادُمْ الْجَايِ بِأُسُمْ اللّٰهْ.>»