لُوقا 11 - الكتاب المقدس بالعربي الدارجي هنا تشاد

الصلاة الربّانيّة

¹ وَ عِيسَى قَاعِدْ يِصَلِّي فِي بَكَانْ وَاحِدْ. وَ وَكِتْ هُو كَمَّلْ صَلَاتَهْ، وَاحِدْ مِنْ تَلَامِيذَهْ حَجَّى لَيَّهْ وَ قَالْ: «سَيِّدْنَا، عَلِّمْنَا نِصَلُّوا مِثِلْ يَحْيَى عَلَّمْ تَلَامِيذَهْ يِصَلُّوا.»

² وَ عِيسَى قَالْ لَيْهُمْ: «وَكِتْ تِصَلُّوا، قُولُوا: ‹يَا أَبُونَا، خَلِّي يَعَرْفُوا كَدَرْ أُسْمَكْ قُدُّوسْ. خَلِّي مَمْلَكَتَكْ تَجِي.

³ أَنْطِينَا الْأَكِلْ الْيِتِمِّنَا كُلَّ يَوْم.

⁴ سَامِحْ لَيْنَا ذُنُوبْنَا مِثِلْ أَنِحْنَ قَاعِدِينْ نِسَامُحُوا كُلَّ النَّاسْ الْخِطَوْا فَوْقنَا. مَا تِدِسِّنَا فِي التَّجْرِبَةْ.›»

مَثَل الضَيْف الجاء في اللَيْل

⁵ وَ عِيسَى حَجَّى لَيْهُمْ بِمَثَلْ وَ قَالْ: «نَسْأَلْكُو شَيّءْ وَاحِدْ. كَنْ نَادُمْ مِنْكُو عِنْدَهْ رَفِيقْ وَ هُو يَمْشِي لَيَّهْ فِي أُسْط اللَّيْل، يِنَادِيهْ وَ يُقُولْ: ‹يَا أَخُويِ، أَنْطِينِي تَلَاتَةْ خُبْزَةْ.

⁶ نِدَوْرهُمْ أَشَانْ رَفِيقْ وَاحِدْ مُسَافِرْ جَانِي وَ مَا عِنْدِي شَيّءْ نِضَيِّفَهْ بَيَّهْ.›

⁷ هَلْ أَخُوكْ السَّأَلْتَهْ دَا يُرُدّ لَيْك مِنْ دَاخَلْ وَ يُقُولْ: ‹خَلِّينِي نُنُومْ! الْبَابْ مَسْدُودْ وَ عِيَالِي مَعَايِ نَايْمِينْ. مَا نَقْدَرْ نُقُمّ لَيْك وَ لَا نَنْطِيكْ شَيّءْ.› دَا يَبْقَى وَلَّا؟

⁸ وَ نُقُولْ لَيْكُو كَنْ أَخُوكْ دَا مَا يِدَوْر يُقُمّ يَنْطِيكْ شَيّءْ فِي شَانْ إِنْتَ رَفِيقَهْ كُلَ، أَكِيدْ هُو يُقُمّ يَنْطِيكْ كُلَّ شَيّءْ التِّدَوْرَهْ فِي شَانْ إِنْتَ بَشْتَنْتَهْ.

⁹ «وَ نُقُولْ لَيْكُو أَسْأَلَوْا اللّٰهْ وَ هُو يَنْطِيكُو. فَتُّشُوا وَ تَلْقَوْا. دُقُّوا بَابْ اللّٰهْ وَ يِنْفَتِحْ لَيْكُو.

¹⁰ أَشَانْ كُلَّ نَادُمْ الْيَسْأَلْ دَا، اللّٰهْ يَنْطِيهْ. وَ أَيِّ نَادُمْ الْيِفَتِّشْ، يَلْقَى. وَ أَيِّ نَادُمْ الْيُدُقّ بَابْ اللّٰهْ، الْبَابْ يِنْفَتِحْ لَيَّهْ.

¹¹ «وَ كَنْ نَادُمْ مِنْكُو أَبُو عِيَالْ وَ وِلَيْدَهْ يَطْلُبْ مِنَّهْ حُوتَايْ، يَنْطِيهْ دَابِي فِي بَدَلْ الْحُوتَايْ وَلَّا؟

¹² وَلَّا كَنْ يَطْلُبْ مِنَّهْ بَيْض جِدَادْ، يَنْطِيهْ عَقْرَبْ وَلَّا؟ أَبَداً.

¹³ إِنْتُو الْمُذْنِبِينْ كُلَ تَعَرْفُوا كِكَّيْف تَنْطُوا شُغُلْ سَمَحْ لِعِيَالْكُو. وَ لَاكِنْ أَبُوكُو اللّٰهْ أَخَيْر زِيَادَةْ مِنْكُو. وَ هُو يَنْطِي الرُّوحْ الْقُدُّوسْ لِلنَّاسْ الْيَسْأَلَوْه.»

قالوا قُدْرة المسيح من إِبْلِيس

¹⁴ وَ يَوْم وَاحِدْ، عِيسَى يِدَوْر يَطْرُدْ شَيْطَانْ مِنْ نَادُمْ وَاحِدْ الْبِقِي أَبْكَمْ بِسَبَبْ الشَّيْطَانْ دَا. وَ الشَّيْطَانْ مَرَقْ وَ الْأَبْكَمْ حَجَّى. وَ كُلَّ النَّاسْ أَلْعَجَّبَوْا بِلْحَيْن.

¹⁵ لَاكِنْ نَاسْ وَاحِدِينْ قَالَوْا: «النَّادُمْ دَا يَطْرُدْ الشَّوَاطِينْ بِقُدْرَةْ إِبْلِيسْ كَبِيرْ الشَّوَاطِينْ.»

¹⁶ وَ نَاسْ آخَرِينْ دَوَّرَوْا يِجَرُّبُوهْ وَ طَلَبَوْا مِنَّهْ يَنْطِيهُمْ دَلِيلْ الْيِوَصِّفْ كَدَرْ قُدُرْتَهْ دِي جَايَةْ مِنْ السَّمَاءْ.

¹⁷ وَ هُو عِرِفْ فِكِرْهُمْ وَ قَالْ لَيْهُمْ: «أَيِّ مَمْلَكَةْ كَنْ نَاسْهَا يِدَّاوَسَوْا أَمْبَيْنَاتْهُمْ تَخْرَبْ. وَ بُيُوتْهَا يِدَفُّقُوا الْوَاحِدْ فِي الْآخَرْ.

¹⁸ وَ تُقُولُوا أَنَا نَطْرُدْ الشَّوَاطِينْ بِقُدْرَةْ إِبْلِيسْ. وَ لَاكِنْ كَنْ إِبْلِيسْ يِدَاوِسْ نَفْسَهْ، كِكَّيْف مَمْلَكَتَهْ تَقْدَرْ تَقْعُدْ ثَابْتَةْ؟

¹⁹ وَ كَنْ صَحِيحْ أَنَا قَاعِدْ نَطْرُدْ الشَّوَاطِينْ بِقُدْرَةْ إِبْلِيسْ، نَاسْكُو يَطُرْدُوهُمْ بِقُدْرَةْ يَاتُو؟ وَ مِثِلْ دَا، نَاسْكُو بَسْ الْيِثَبُّتُوا فَوْقكُو التُّهْمَةْ.

²⁰ وَ كَنْ أَنَا طَرَدْت الشَّوَاطِينْ بِقُدْرَةْ اللّٰهْ ذَاتَهْ، خَلَاصْ مَمْلَكَةْ اللّٰهْ قَابَلَتْكُو.

²¹ كَنْ رَاجِلْ قَوِي قَاعِدْ يَحْرِسْ قَصْرَهْ بِسِلَاحَهْ كُلَّ كَيْ، مِثِلْ دَا كُلَّ خُمَامَهْ قَاعِدْ بِالسَّلَامْ.

²² لَاكِنْ كَنْ نَادُمْ قَوِي مِنَّهْ يَجِي يَهْجِمَهْ، هُو يَغْلِبَهْ وَ يِشِيلْ مِنَّهْ سِلَاحَهْ الْأَوَّلْ كُلَّ عَشَمَهْ قَاعِدْ فَوْقَهْ. وَ خَلَاصْ يِقَسِّمْ الْخُمَامْ لِجَمَاعْتَهْ.

²³ «أَيِّ نَادُمْ الْمَا مَعَايِ، عَدُويِ. وَ أَيِّ نَادُمْ الْمَا يِلِمّ النَّاسْ مَعَايِ، يِشَتِّتْهُمْ.»

الشَيْطان اليقبِّل

²⁴ وَ عِيسَى قَالْ بَتَّانْ: «وَكِتْ شَيْطَانْ يَمْرُقْ مِنْ نَادُمْ مُشَوْطِنْ، الشَّيْطَانْ دَا يَمْشِي مِثِلْ نَادُمْ مُوَدِّرْ فِي الصَّحَرَاء. وَ يِفَتِّشْ بَكَانْ يِنْجَمَّ فَوْقَهْ وَ مَا يَلْقَاهْ. وَ يُقُولْ: ‹خَلَاصْ، نِقَبِّلْ فِي الْبَيْت الْمَرَقْت مِنَّهْ.›

²⁵ وَ يِقَبِّلْ لِلنَّادُمْ دَا وَ يَلْقَاهْ مِثِلْ بَيْت نَضِيفْ وَ مُفَرَّشْ.

²⁶ وَ الشَّيْطَانْ يَمْشِي يِجِيبْ مَعَايَهْ سَبْعَةْ شَوَاطِينْ فَسْلِينْ مِنَّهْ زِيَادَةْ وَ كُلُّهُمْ يِنْدَسَّوْا وَ يَسْكُنُوا فِي النَّادُمْ دَا وَ خَلَاصْ، حَالَةْ النَّادُمْ دَا تَبْقَى هَوَانَةْ مِنْ أَوَّلْ.»

²⁷ وَ وَكِتْ هُو قَاعِدْ يِحَجِّي لِلنَّاسْ، مَرَةْ وَاحِدَةْ فِي أُسُطْهُمْ نَادَتْ وَ قَالَتْ: «مَبْرُوكْ لِلْمَرَةْ الْوِلْدَتَكْ وَ رَبَّتَكْ.»

²⁸ لَاكِنْ عِيسَى قَالْ: «أَخَيْر تُقُولِي مَبْرُوكْ لِلنَّاسْ الْيَسْمَعَوْا كَلَامْ اللّٰهْ وَ يِتَابُعُوهْ.»

طلبوا من عِيسَى علامة

²⁹ وَ عَدَدْ النَّاسْ الْيِدَوْرُوا يَسْمَعَوْا كَلَامْ عِيسَى قَاعِدْ يِزِيدْ. وَ هُو بَدَا يُقُولْ: «نَاسْ الْوَكِتْ دَا فَسْلِينْ وَ يَطُلْبُوا مِنِّي دَلِيلْ أَشَانْ يِآمُنُوا بَيِّ. وَ اللّٰهْ مَا يَنْطِيهُمْ دَلِيلْ إِلَّا الدَّلِيلْ هَنَا النَّبِي يُونُسْ.

³⁰ مِثِلْ يُونُسْ بِقِي عَلَامَةْ لِنَاسْ مَدِينَةْ نِينَوَى، أَنَا إِبْن الْإِنْسَانْ كُلَ نَبْقَى عَلَامَةْ لِلنَّاسْ الْفِي وَكِتْنَا دَا.

³¹ وَ فِي يَوْم الْحِسَابْ، مَلِكَةْ الْوَطِي تُقُمّ سَوَا مَعَ النَّاسْ الْفِي وَكِتْنَا دَا. وَ هِي تِثَبِّتْ فَوْقهُمْ التُّهْمَةْ أَشَانْ جَاتْ مِنْ آخِرْ الْأَرْض لِتَسْمَعْ كَلَامْ الْمَلِكْ سُلَيْمَانْ الْحَكِيمْ. وَ الْيِحَجِّي لَيْكُو هَسَّعْ أَكْبَرْ مِنْ سُلَيْمَانْ وَ لَاكِنْ إِنْتُو مَا تُبْتُوا.

³² فِي يَوْم الْحِسَابْ، نَاسْ نِينَوَى يُقُمُّوا سَوَا مَعَ النَّاسْ الْفِي وَكِتْنَا دَا وَ يِثَبُّتُوا فَوْقهُمْ تُهْمَةْ أَشَانْ نَاسْ نِينَوَى تَابَوْا مِنْ ذُنُوبْهُمْ وَكِتْ يُونُسْ بَلَّغْ لَيْهُمْ كَلَامْ اللّٰهْ. وَ الْيِحَجِّي لَيْكُو هَسَّعْ أَكْبَرْ مِنْ يُونُسْ وَ لَاكِنْ إِنْتُو مَا تُبْتُوا.

مَثَل نور الفانوس

³³ «وَ مَا فِي نَادُمْ الْيِأَوْقِدْ فَانُوسْ وَ يِلَبِّدَهْ وَلَّا يِغَطِّيهْ بِمَاعُونْ. هُو يُخُطَّهْ فِي بَكَانْ فَوْق أَشَانْ النَّاسْ الْيَدْخُلُوا فِي الْبَيْت يِشِيفُوا الضَّيّ.

³⁴ «وَ الْعَيْن هِي مِثِلْ فَانُوسْ جِلْدَكْ. كَنْ عَيْنَكْ طَيْبَةْ، كُلَّ جِلْدَكْ قَاعِدْ فِي النُّورْ. وَ لَاكِنْ كَنْ عَيْنَكْ تَلْفَانَةْ، جِلْدَكْ يِنْمَلِي ضَلَامْ.

³⁵ أَشَانْ دَا، خُطّ بَالَكْ. مَا تِخَلِّي النُّورْ الْعِنْدَكْ يَبْقَى أَضْلَمْ.

³⁶ كَنْ كُلَّ جِلْدَكْ أَنْمَلَى نُورْ وَ مَا عِنْدَهْ ضَلَامْ فِي أَيِّ بَكَانْ، يَبْقَى لَيْك مِثِلْ فَانُوسْ يِضَوِّي ضَيّ تَمَامْ.»

المسيح هرج العُلماء

³⁷ وَ وَكِتْ عِيسَى كَمَّلْ الْكَلَامْ دَا، فَرِيزِي وَاحِدْ عَزَمَهْ أَشَانْ يَاكُلْ فِي بَيْتَهْ. وَ عِيسَى مَشَى فِي بَيْتَهْ وَ قَعَدْ لِلْأَكِلْ.

³⁸ وَ عِيسَى مَا غَسَّلْ إِيدَيْنَهْ لِيَبْقَوْا طَاهِرِينْ قُبَّالْ مَا يَاكُلْ وَ الْفَرِيزِي شَافَهْ وَ أَلْعَجَّبْ مِنَّهْ بِلْحَيْن.

³⁹ وَ الرَّبّ عِيسَى قَالْ لَيَّهْ: «إِنْتُو الْفَرِيزِيِّينْ وَكِتْ تِلْوَضَّوْا، دَا يَبْقَى مِثِلْ تِغَسُّلُوا الْكَاسْ وَ الصُّفْرَةْ مِنْ بَرَّا بَسْ. لَاكِنْ فِي قُلُوبْكُو دَاخَلْ إِنْتُو مَلَانِينْ مِنْ السِّرْقَةْ وَ الْفَسَالَةْ.

⁴⁰ يَا الْجُهَّالْ، إِنْتُو مَا تَعَرْفُوا كَدَرْ اللّٰهْ الْخَلَقْ النُّصّ الْبَرَّانِي خَلَقْ النُّصّ الدَّخْلَانِي كُلَ؟

⁴¹ أَنْطُوا الْخُمَامْ الْقَاعِدْ دَاخَلْ فِي صُفْرِتْكُو وَ خَلِّي يَبْقَى صَدَقَةْ لِلْمَسَاكِينْ وَ كُلَّ شَيّءْ يَبْقَى لَيْكُو طَاهِرْ.

⁴² «يَا الْفَرِيزِيِّينْ، الْعَذَابْ يَرْجَاكُو أَشَانْ إِنْتُو مُنْكَرِبِينْ فِي الْعُشُرْ لَحَدِّي تَنْطُوا لِلّٰهْ مِنْ النَّعْنَاعْ وَ الْكَمُّونْ وَ أَيِّ نَبَاتْ هَنَا الْحَرَارْ الْيُقُمّ فِي حَوْشكُو. وَ لَاكِنْ إِنْتُو نِسِيتُوا الْعَدَالَةْ وَ مَحَبَّةْ اللّٰهْ! أَوَّلْ شَيّءْ، وَاجِبْ تِسَوُّوا الْأَشْيَاءْ الْمُهِمِّينْ دَوْل وَ بَتَّانْ مَا تَنْسَوْا كَلَامْ الْعُشُرْ.

⁴³ «يَا الْفَرِيزِيِّينْ، الْعَذَابْ يَرْجَاكُو أَشَانْ تِرِيدُوا تَقْعُدُوا فِي الصَّفّ الْأَوَّلْ فِي بُيُوتْ الصَّلَاةْ وَ إِنْتُو فَرْحَانِينْ كَنْ النَّاسْ يِسَلُّمُوكُو بِإِحْتِرَامْ فِي السُّوقْ.

⁴⁴ الْعَذَابْ يَرْجَاكُو أَشَانْ إِنْتُو مِثِلْ الْقُبُورْ الْمَا عِنْدُهُمْ وَسِمْ وَ النَّاسْ رَايْغِينْ فَوْقهُمْ وَ مَا يَعَرْفُوا كَدَرْ هُمَّنْ قُبُورْ. النَّجَاسَةْ الْقَاعِدَةْ فِيكُو دَاخَلْ النَّاسْ مَا يَعَرْفُوهَا.»

⁴⁵ وَ وَاحِدْ مِنْ عُلَمَاءْ التَّوْرَاةْ رَدَّ لَيَّهْ وَ قَالْ: «يَا السَّيِّدْ، بِكَلَامَكْ دَا عَيَّرْتِنَا أَنِحْنَ كُلَ.»

⁴⁶ وَ عِيسَى قَالْ: «الْعَذَابْ يَرْجَاكُو إِنْتُو الْعُلَمَاءْ كُلَ! بِتَعْلِيمْكُو تِسَوُّوا الدِّينْ تَقِيلْ لِلنَّاسْ لَحَدِّي بُفُوتْ رَاسْهُمْ وَ أَبَداً مَا تِدَوْرُوا تِعَاوُنُوهُمْ حَتَّى بِشَيّءْ صَغَيَّرْ كُلَ.

⁴⁷ الْعَذَابْ يَرْجَاكُو أَشَانْ إِنْتُو قَاعِدِينْ تَبْنُوا قُبُورْ الْأَنْبِيَاء الْجُدُودْكُو أَبَوْهُمْ وَ كَتَلَوْهُمْ.

⁴⁸ وَ مِثِلْ دَا، إِنْتُو قَاعِدِينْ تَشْهَدَوْا كَدَرْ تِقَصُّدُوا بِالشَّيّءْ الْجُدُودْكُو سَوَّوْه. أَيْوَى، أَشَانْ هُمَّنْ بَسْ الْكَتَلَوْهُمْ وَ إِنْتُو بَسْ التَّبْنُوا قُبُورْهُمْ.

⁴⁹ وَ فِي شَانْ دَا، اللّٰهْ وَصَّفْ حِكْمَتَهْ وَكِتْ قَالْ: ‹نِرَسِّلْ لَيْهُمْ أَنْبِيَاء وَ رُسُلْ. وَاحِدِينْ مِنْهُمْ يَكْتُلُوهُمْ وَ وَاحِدِينْ مِنْهُمْ يِتَعُّبُوهُمْ.›

⁵⁰ وَ خَلَاصْ كُلَّ الْأَنْبِيَاء الْكَتَلَوْهُمْ فِي أَيِّ زَمَنْ، دِمِّتْهُمْ تَجِي فِي رَاسْ هَنَا النَّاسْ الْفِي وَكِتْنَا دَا.

⁵¹ أَيْوَى، نُقُولْ لَيْكُو مِنْ دِمَّةْ هَابِيلْ وِلَيْد آدَمْ لَحَدِّي دِمَّةْ زَكَرِيَّا الْكَتَلَوْه بَيْن بَيْت اللّٰهْ وَ الْمَدْبَحْ، دِمِّتْهُمْ كُلُّهُمْ تَجِي فِي رَاسْ النَّاسْ الْفِي وَكِتْنَا دَا.

⁵² «يَا إِنْتُو الْعُلَمَاءْ، الْعَذَابْ يَرْجَاكُو أَشَانْ شِلْتُوا مُفْتَاحْ الْعِلِمْ. إِنْتُو ذَاتْكُو مَا أَنْدَسَّيْتُوا وَ بَتَّانْ النَّاسْ الْيِدَوْرُوا يِنْدَسَّوْا، إِنْتُو دَحَرْتُوهُمْ مِنَّهْ.»

⁵³ وَكِتْ عِيسَى قَمَّ مَشَى مِنْ هِنَاكْ، الْعُلَمَاءْ وَ الْفَرِيزِيِّينْ بَدَوْا يِخَالُفُوهْ بِشِدَّةْ وَ يَسْأَلَوْه سُؤَالْ كَتِيرْ

⁵⁴ أَشَانْ يَلْقَوْا فُرْصَةْ لِيَكُرْبُوهْ بِكَلَامَهْ الْيُقُولَهْ.