لاوِيِّين 5 - الكتاب المقدس بالعربي الدارجي هنا تشاد

حالات اليجيبوا الخطا

¹ «وَكِتْ إِنْسَانْ حِضِرْ فِي مُشْكِلَةْ أَوْ يَعَرِفْ الْمُشْكِلَةْ دِي وَ حَلَّفَوْه لِيَشْهَدْ، كَنْ هُو لَبَّدْ نَفْسَهْ وَ أَبَى مَا يَشْهَدْ، النَّادُمْ دَا يُكُونْ مُذْنِبْ وَ يِلْحَمَّلْ نَتِيجَةْ خَطَايَهْ.

² «وَ كَنْ نَادُمْ بَلَا رَايْه يَلْمَسْ شَيّءْ نِجِسْ مِثِلْ رِمَّةْ هَنَا حَيْوَانْ هَنَا كَدَادَةْ نِجِسْ أَوْ رِمَّةْ هَنَا بَهِيمَةْ نِجْسَةْ أَوْ رِمَّةْ هَنَا وَاحِدْ مِنْ الزَّوَاحِفْ نِجِسْ، خَلَاصْ الْإِنْسَانْ دَا يُكُونْ نِجِسْ وَ يَبْقَى خَاطِي.

³ «وَكِتْ نَادُمْ بَلَا رَايْه يَلْمَسْ نَجَاسَةْ هَنَا إِنْسَانْ التِّنَجِّسْ، كَنْ هُو عِرِفْ خَطَايَهْ، خَلَاصْ هُو يَبْقَى خَاطِي.

⁴ «وَ وَكِتْ نَادُمْ بَلَا فِكِرْ كَلَّمْ وَ حَلَفْ فِي أَيِّ حَالَةْ لِيِسَوِّي الشَّرّ أَوْ الْخَيْر، كَنْ هُو عِرِفْ خَطَايَهْ، خَلَاصْ هُو يَبْقَى خَاطِي.

⁵ «وَ كَنْ نَادُمْ خِطِي فِي وَاحِدَةْ مِنْ الْحَالَاتْ دَوْل، وَاجِبْ يِعْتَرِفْ بِذَنْبَهْ السَّوَّاهْ.

⁶ وَ فِي شَانْ الذَّنِبْ الْهُو سَوَّاهْ، يِقَدِّمْ ضَحِيَّةْ لِلّٰهْ مِنْ الْغَنَمْ عَنْزَايْ أَوْ غَنَمَايْ ضَحِيَّةْ لِكَفَّارَةْ الْخَطَا. وَ رَاجِلْ الدِّينْ يِسَوِّي لَيَّهْ كَفَّارَةْ لِذَنْبَهْ.

ضحيّة المساكين

⁷ «وَ كَنْ نَادُمْ مَا يَقْدَرْ يَلْقَى خَرُوفْ، هُو يَقْدَرْ يِقَدِّمْ ضَحِيَّةْ لِلّٰهْ لِلذَّنِبْ الْهُو سَوَّاهْ إِتْنَيْن قِمْرِيْ أَوْ إِتْنَيْن حَمَامْ، وَاحِدَةْ لِضَحِيَّةْ كَفَّارَةْ الْخَطَا وَ الْآخَرَةْ لِلضَّحِيَّةْ الْمُحَرَّقَةْ.

⁸ وَ هُو يِوَدِّيهُمْ لِرَاجِلْ الدِّينْ. وَ فِي الْأَوَّلْ، رَاجِلْ الدِّينْ يِقَدِّمْ طَيْرَايْ لِلضَّحِيَّةْ هَنَا كَفَّارَةْ الذَّنِبْ. هُو يَكْسِرْ رَقَبَتْهَا وَ لَاكِنْ مِنْ دُونْ يَقْطَعْ رَاسْهَا.

⁹ وَ بِدَمّ الضَّحِيَّةْ، رَاجِلْ الدِّينْ يُرُشّ الدُّرْدُرْ هَنَا نَوَايِطْ الْمَدْبَحْ. وَ الْفَضَّلْ مِنْ الدَّمّ دَا، يِدَفِّقَهْ فِي قَعَرْ الْمَدْبَحْ. وَ دِي ضَحِيَّةْ لِكَفَّارَةْ الذَّنِبْ.

¹⁰ وَ الطَّيْرَايْ الْآخَرَةْ، يِقَدِّمْهَا ضَحِيَّةْ مُحَرَّقَةْ حَسَبْ الْقَوَانِينْ. وَ بِمِثِلْ دَا، رَاجِلْ الدِّينْ يِسَوِّي لِلرَّاجِلْ دَا كَفَّارَةْ لِلذَّنِبْ الْهُو سَوَّاهْ. وَ خَلَاصْ، هُو يَلْقَى الْغُفْرَانْ.

¹¹ «وَ كَنْ نَادُمْ مَا يَقْدَرْ يَلْقَى إِتْنَيْن قِمْرِيْ أَوْ إِتْنَيْن حَمَامْ، خَلَاصْ هُو يَقْدَرْ يِقَدِّمْ هَدِيَّةْ لِلذَّنِبْ الْهُو سَوَّاهْ كَوْرَوْ هَنَا دَقِيقْ هَدِيَّةْ لِكَفَّارَةْ ذَنْبَهْ. وَ مَا يِزِيدْ فَوْقهَا دِهِنْ وَ لَا لُبَانْ أَشَانْ دِي هَدِيَّةْ لِكَفَّارَةْ الذَّنِبْ.

¹² وَ هُو يِوَدِّي هَدِيّتَهْ دِي لِرَاجِلْ الدِّينْ. وَ رَاجِلْ الدِّينْ يِشِيلْ مَلْيَةْ إِيدْ مِنْ هَدِيَّةْ الذِّكْرَةْ وَ يِحَرِّقْهَا فِي الْمَدْبَحْ مِنْ فَوْق لِلضَّحِيَّةْ الْمُحَرَّقَةْ لِلّٰهْ. وَ دِي ضَحِيَّةْ لِكَفَّارَةْ الذَّنِبْ.

¹³ وَ بِمِثِلْ دَا، رَاجِلْ الدِّينْ يِسَوِّي لِلرَّاجِلْ دَا كَفَّارَةْ لِلذَّنِبْ الْهُو سَوَّاهْ مِنْ الْحَالَاتْ دَوْل. وَ هُو يَلْقَى الْغُفْرَانْ. وَ الْفَضَّلْ يُكُونْ لِرَاجِلْ الدِّينْ مِثِلْ هَدِيَّةْ هَنَا دَقِيقْ.»

ضحيّة لكفّارة الخطا

¹⁴ وَ اللّٰهْ حَجَّى لِمُوسَى وَ قَالْ:

¹⁵ وَ كَنْ نَادُمْ سَوَّى ذَنِبْ بَلَا رَايْه ضِدّ مُقَدَّسَاتْ اللّٰهْ، وَاجِبْ هُو يِقَدِّمْ لِلّٰهْ ضَحِيَّةْ لِكَفَّارَةْ الْخَطَا. وَ دَا، وَاحِدْ كَبِشْ الْمَا عِنْدَهْ أَيِّ عَيْب الْيِشِيلَهْ مِنْ الْغَنَمْ وَ تَمَنَهْ يِسَاوِي حَجَرْ فُضَّةْ حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ.

¹⁶ وَ يِكَفِّي تَمَنْ الذَّنِبْ السَّوَّاهْ ضِدّ الْبَكَانْ الْمُقَدَّسْ وَ يِزِيدْ فَوْقَهْ خُمْسَهْ وَ يَنْطِيهْ لِرَاجِلْ الدِّينْ. وَ رَاجِلْ الدِّينْ يِسَوِّي لَيَّهْ كَفَّارَةْ بِالْكَبِشْ هَنَا ضَحِيَّةْ لِكَفَّارَةْ الْخَطَا وَ هُو يَلْقَى الْغُفْرَانْ.

¹⁷ وَ كَنْ نَادُمْ يِسَوِّي ذَنِبْ بَلَا رَايْه ضِدّ وَاحِدَةْ مِنْ وَصَايَا اللّٰهْ، النَّادُمْ دَا يَبْقَى خَاطِي وَ يِلْحَمَّلْ نَتِيجَةْ خَطَايَهْ.

¹⁸ هُو يِجِيبْ لِرَاجِلْ الدِّينْ ضَحِيَّةْ لِكَفَّارَةْ الْخَطَا، وَاحِدْ كَبِشْ الْمَا عِنْدَهْ أَيِّ عَيْب الْيِشِيلَهْ مِنْ الْغَنَمْ حَسَبْ التَّمَنْ الْمُحَدَّدْ. وَ رَاجِلْ الدِّينْ يِسَوِّي لَيَّهْ كَفَّارَةْ لِلْخَطَا الْهُو سَوَّاهْ بَلَا رَايْه وَ مِنْ دُونْ يَعَرْفَهْ وَ هُو يَلْقَى الْغُفْرَانْ.

¹⁹ وَ دِي ضَحِيَّةْ لِكَفَّارَةْ الْخَطَا أَشَانْ النَّادُمْ دَا، أَكِيدْ سَوَّى ذَنِبْ قِدَّامْ اللّٰهْ.