لاوِيِّين 26 - الكتاب المقدس بالعربي الدارجي هنا تشاد

ما تصْنعوا إلٰـهات

¹ «مَا تَصْنَعَوْا لَيْكُو إِلٰـهَاتْ وَ لَا تُخُطُّوا أَصْنَامْ وَ لَا تُغُزُّوا حُجَارْ لِلْعِبَادَةْ وَ لَا تَمَاثِيلْ هَنَا حُجَارْ. مَا تُخُطُّهُمْ فِي بَلَدْكُو وَ تَسْجُدُوا قِدَّامْهُمْ. أَشَانْ أَنَا بَسْ اللّٰهْ إِلٰـهْكُو.

² أَحْفَضَوْا يَوْمِي هَنَا السَّبْت وَ أَحْتَرُمُوا بَيْتِي الْمُقَدَّسْ. وَ أَنَا بَسْ اللّٰهْ.

البركة

³ «وَ كَنْ تَابَعْتُوا شُرُوطِي وَ حَفَضْتُوا وَصِيَّاتِي وَ طَبَّقْتُوهُمْ،

⁴ أَنَا نِنَزِّلْ لَيْكُو الْمَطَرْ فِي وَكْتَهْ وَ الْأَرْض تَنْطِي إِنْتَاجْهَا وَ شَدَرْ الْكَدَادَةْ كُلَ يَنْطِي فَوَاكِهَّا.

⁵ وَ فِي بَكَانْكُو، وَكْت الدَّقِّينْ يَمْشِي لَحَدِّي الْقَطِعْ وَ الْقَطِعْ لَحَدِّي التَّيْرَابْ. وَ تَاكُلُوا مِنْ مَعَاشْكُو لَحَدِّي تَشْبَعَوْا وَ تَسْكُنُوا فِي بَلَدْكُو بِأَمَانْ.

⁶ «وَ نِجِيبْ السَّلَامْ فِي الْبَلَدْ وَ تُنُومُوا وَ مَا فِي شَيّءْ يِبَرْجِلْ نَوْمكُو. وَ نِوَدِّرْ مِنْ الْبَلَدْ الْحَيْوَانَاتْ الْفَسْلِينْ وَ السَّيْف مَا يُشُقّ بَلَدْكُو.

⁷ وَ إِنْتُو تِطَارُدُوا عُدْوَانْكُو وَ هُمَّنْ يُمُوتُوا بِالْسَّيْف قِدَّامْكُو.

⁸ وَ مِنْكُو إِنْتُو، 5 يَطُرْدُوا 100 نَاسْ وَ 100 يَطُرْدُوا 10 000 نَاسْ. وَ عُدْوَانْكُو يُمُوتُوا بِالْسَّيْف قِدَّامْكُو.

⁹ «وَ أَنَا نِوَجِّهْ عَلَيْكُو وَ نِسَوِّيكُو تَلْدَوْا وَ تِزِيدُوا وَ نِثَبِّتْ مَعَاكُو مُعَاهَدَاتِي.

¹⁰ وَ تَاكُلُوا مِنْ إِنْتَاجْكُو الْقَدِيمْ وَكِتْ طَوِيلْ لَحَدِّي تَمُرْقُوا إِنْتَاجْكُو الْقَدِيمْ لِتُضُمُّوا الْجَدِيدْ.

¹¹ وَ أَنَا نُخُطّ مَسْكَنِي فِي أُسُطْكُو وَ مَا نَكْرَهْكُو.

¹² وَ نُرُوغْ فِي أُسُطْكُو وَ نَبْقَى إِلٰـهْكُو وَ إِنْتُو تَبْقَوْا شَعَبِي.

¹³ وَ أَنَا اللّٰهْ إِلٰـهْكُو الْمَرَقْتُكُو مِنْ بَلَدْ الْمَصْرِيِّينْ لِمَا تَبْقَوْا عَبِيدْهُمْ وَ أَنَا بَسْ الْكَسَّرْت الدَّامِي الْفِي رِقَابْكُو وَ خَلَّيْتكُو مَاشِينْ رَاسْكُو مَرْفُوعْ.

اللعنة

¹⁴ «وَ كَنْ إِنْتُو مَا تَسْمَعَوْنِي وَ مَا تِطَبُّقُوا وَصِيَّاتِي

¹⁵ وَ كَنْ تَابَوْا شُرُوطِي وَ تَكْرَهَوْا قَوَانِينِي وَ مَا تِحْتَرُمُوا وَصِيَّاتِي وَ تَقْطَعَوْا مُعَاهَدَتِي،

¹⁶ خَلَاصْ دَاهُو النِّسَوِّي لَيْكُو. نِقَوِّمْ ضِدُّكُو السُّلّ وَ الْوِرْدَةْ لِنِخَوِّفْكُو. وَ هُمَّنْ دَوْل يِضَعُّفُوا شَوْفكُو وَ يَاكُلُوا حَيَاتْكُو. وَ كَنْ حَرَتُّوا كُلَ، عُدْوَانْكُو بَسْ يَاكُلُوا إِنْتَاجْكُو.

¹⁷ وَ أَنَا نُقُمّ ضِدُّكُو وَ عُدْوَانْكُو يِنَّصُرُوا فَوْقكُو وَ الْيَكْرَهَوْكُو يَحْكُمُوا فَوْقكُو وَ تَجْرُوا كَنْ مَا يِطَارُدُوكُو كُلَ.

¹⁸ «وَ كَنْ بَيْدَا كُلَ مَا سِمِعْتُونِي، أَنَا نِعَاقِبْكُو سَبْعَةْ مَرَّاتْ بِسَبَبْ ذُنُوبْكُو.

¹⁹ وَ أَنَا نِكَسِّرْ إِسْتِكْبَارْ قُدْرِتْكُو وَ نِسَوِّي سَمَاكُو قَوِي مِثِلْ حَدِيدْ وَ أَرْضُكُو مِثِلْ نَحَاسْ.

²⁰ وَ إِنْتُو تِعَيُّوا نُفُوسْكُو بَلَا فَايْدَةْ. الْأَرْض مَا تِقَوِّمْ شَيّءْ وَ شَدَرْ الْبَلَدْ كُلَ مَا يَلْدَ عِيَالْ.

²¹ «وَ كَنْ بَيْدَا كُلَ تُقُمُّوا ضِدِّي وَ مَا تَسْمَعَوْنِي، أَنَا نَضْرُبْكُو سَبْعَةْ مَرَّاتْ زِيَادَةْ بِسَبَبْ ذُنُوبْكُو.

²² وَ نِقَوِّمْ ضِدُّكُو حَيْوَانَاتْ الْكَدَادَةْ الْيَاكُلُوا عِيَالْكُو وَ يِكَمُّلُوا بَهَايِمْكُو وَ يِسَوُّوكُو شِيَّةْ وَ دُرُوبْكُو يَبْقَوْا فَاضِيِينْ.

²³ «وَ كَنْ بَيْدَا كُلَ مَا تَرْضَوْا بِعِقَابِي وَ تُقُمُّوا ضِدِّي،

²⁴ أَنَا كُلَ نُقُمّ ضِدُّكُو وَ أَنَا كُلَ نَضْرُبْكُو سَبْعَةْ مَرَّاتْ بِسَبَبْ ذُنُوبْكُو.

²⁵ وَ أَنَا نِجِيبْ لَيْكُو الْحَرِبْ بِسَبَبْ إِنْتُو نَقَضْتُوا مُعَاهَدَتِي وَ إِنْتُو تِلِمُّوا فِي مُدُنْكُو. وَ أَنَا نِرَسِّلْ لَيْكُو وَبَاءْ وَ نِسَلِّمْكُو لِعُدْوَانْكُو.

²⁶ وَ أَنَا نِوَقِّفْ مِنْكُو الْمَعَاشْ وَ عَشَرَةْ عَوِينْ يِسَوَّنْ لَيْكُو أَكِلْ فِي فُرُنْ وَاحِدْ. هِنَّ يِجِيبَنَّهْ لَيْكُو شِيَّةْ. إِنْتُو تَاكُلُوا وَ مَا تَشْبَعَوْا.

²⁷ «وَ كَنْ بَيْدَا كُلَ مَا سِمِعْتُونِي وَ قَمَّيْتُوا ضِدِّي،

²⁸ أَنَا كُلَ نُقُمّ ضِدُّكُو بِغَضَبْ شَدِيدْ وَ أَنَا ذَاتِي نِعَاقِبْكُو سَبْعَةْ مَرَّاتْ بِسَبَبْ ذُنُوبْكُو.

²⁹ وَ تَاكُلُوا لَحَمْ أَوْلَادْكُو وَ بَنَاتْكُو.

³⁰ وَ أَنَا نِدَمِّرْ بَكَانَاتْكُو الْعَالِيِينْ وَ نِكَسِّرْ مَخَابِرْكُو هَنَا الْبَخُورْ. وَ نُرُصّ جَنَازَاتْكُو مَعَ جَنَازَاتْ أَصْنَامْكُو وَ نَكْرَهْكُو.

³¹ وَ نِسَوِّي مُدُنْكُو خَرَابْ وَ بَكَانَاتْ الْمُقَدَّسِينْ فَاضِيِينْ وَ مَا نُشُمّ الرِّيحَةْ التِّحَرُّقُوهَا لِرِضَايِ.

³² وَ أَنَا ذَاتِي نِجِيبْ الْحِزِنْ فِي الْبَلَدْ وَ عُدْوَانْكُو الْيَسْكُنُوهَا يِنْبَهْتُوا.

³³ وَ كَنْ لَيْكُو إِنْتُو، نِجِيبْ لَيْكُو الْحَرِبْ وَ نِشَتِّتْكُو فِي لُبّ الْأُمَمْ. وَ بَلَدْكُو تَبْقَى خَرَابْ وَ مُدُنْكُو يِلْهَدَّمَوْا.

³⁴ «وَ كُلَّ الْوَكِتْ الْإِنْتُو قَاعِدِينْ فَوْقَهْ فِي بَلَدْ عُدْوَانْكُو، بَلَدْكُو الْخَرْبَانَةْ تِنْجَمَّ. وَ دَا يِبَدِّلْ أَيَّامْ السَّبْت الْإِنْتُو مَا أَحْتَرَمْتُوهُمْ.

³⁵ وَ فِي مُدَّةْ كُلَّ أَيَّامْ خَرَابْهَا، هِي تِنْجَمَّ وَ تِلْكَفَّى أَيَّامْ السَّبْت الْهِي مَا أَنْجَمَّتْ فَوْقهُمْ وَكِتْ إِنْتُو سَاكْنِينْ فَوْقهَا.

³⁶ «وَ كَنْ لِلْيِفَضُّلُوا مِنْكُو فِي بَلَدْ عُدْوَانْكُو، أَنَا نَقْطَعْ عَشَمْهُمْ. وَ حَرَكَةْ هَنَا وَرْشَالَايْ الشَّايْلَيْهَا الرِّيحْ كُلَ تَطْرُدْهُمْ وَ هُمَّنْ يِعَرُّدُوا مِثِلْ الْمُعَرِّدْ مِنْ الْحَرِبْ وَ يَقَعَوْا كَنْ مَا يِطَارُدُوهُمْ كُلَ.

³⁷ وَ هُمَّنْ يِتَّرْتَعَوْا الْوَاحِدْ فِي الْآخَرْ مِثِلْ فِي الْحَرِبْ، كَنْ مَا يِطَارُدُوهُمْ كُلَ. وَ إِنْتُو مَا تَقْدَرَوْا تِقَبُّلُوا عُدْوَانْكُو

³⁸ وَ تُمُوتُوا فِي لُبّ الْأُمَمْ وَ بَلَدْ عُدْوَانْكُو تَزْرُطْكُو.

³⁹ وَ الْيِفَضُّلُوا مِنْكُو يُمُوتُوا بِسَبَبْ خَطَاهُمْ فِي بُلْدَانْ عُدْوَانْكُو. وَ بَتَّانْ بِسَبَبْ خَطَا أَبَّهَاتْهُمْ الزَّادْ فِي خَطَاهُمْ، هُمَّنْ يُمُوتُوا.

اللّه جدّد مُعاهدته

⁴⁰ «وَ لَاكِنْ يِعْتَرُفُوا بِخَطَاهُمْ وَ خَطَا أَبَّهَاتْهُمْ وَ يُقُولُوا هُمَّنْ سَوَّوْا خِيَانَةْ لَحَدِّي قَمَّوْا ضِدِّي.

⁴¹ وَ أَنَا كُلَ نُقُمّ ضِدُّهُمْ وَ نِوَدِّيهُمْ فِي بَلَدْ عُدْوَانْهُمْ. وَ بَيْدَا، قُلُوبْهُمْ الْمَا طَاهِرِينْ يِعَيُّبُوهُمْ وَ عِقَابْهُمْ يِلْحَقَّقْ.

⁴² وَ أَنَا نِسَوِّي حَسَبْ مُعَاهَدَتِي مَعَ يَعْقُوبْ وَ حَسَبْ مُعَاهَدَتِي مَعَ إِسْحَاقْ وَ حَسَبْ مُعَاهَدَتِي مَعَ إِبْرَاهِيمْ وَ نِفَكِّرْ فِي الْبَلَدْ.

⁴³ وَ بَيْدَا وَكِتْ الْبَلَدْ تَبْقَى خَرْبَانَةْ وَ فَاضِيَةْ مِنْهُمْ، هِي تِنْجَمَّ مِثِلْ فِي يَوْم السَّبْت. وَ خَلَاصْ، يِعْتَرُفُوا بِعِقَابْهُمْ أَشَانْ هُمَّنْ أَبَوْا قَوَانِينِي وَ كِرْهَوْا شُرُوطِي.

⁴⁴ «وَ فِي شَانْ دَا وَكِتْ يُكُونُوا فِي بَلَدْ عُدْوَانْهُمْ، أَنَا مَا نَابَاهُمْ وَ لَا نَكْرَهُّمْ لَحَدِّي نِكَمِّلْهُمْ وَ نَقْطَعْ مُعَاهَدَتِي مَعَاهُمْ أَشَانْ أَنَا اللّٰهْ إِلٰـهُّمْ.

⁴⁵ وَ فِي شَانْهُمْ، أَنَا نِتِمّ الْمُعَاهَدَةْ الْأَوَّلْ سَوَّيْتهَا مَعَ جُدُودْهُمْ الْمَرَقْتُهُمْ مِنْ بَلَدْ مَصِرْ قِدَّامْ كُلَّ الْأُمَمْ أَشَانْ نَبْقَى إِلٰـهُّمْ. وَ أَنَا بَسْ اللّٰهْ.»

⁴⁶ وَ دَوْل الْوَصَايَا وَ الْقَوَانِينْ وَ الشُّرُوطْ الْخَطَاهُمْ اللّٰهْ بَيْنَهْ هُو وَ بَيْن بَنِي إِسْرَائِيلْ فِي جَبَلْ سِينَاء بِوَاسِطَةْ مُوسَى.